قازاقستاندىق ارتىستەر ەستونيا مۋزىكا جانە تەاتر اكادەمياسىنىڭ كونتسەرت زالىندا ونەر كورسەتتى. « ۇلى دالا داۋىسى» دەپ اتالعان كەش باعدارلاماسىن مارات بيسەنعاليەۆ اشىپ, بريتان كومپوزيتورى, رومانتيكالىق باعىتتاعى مۋزىكا وكىلى ەدۆارد ەلگار مەن قازاقتىڭ كلاسسيك كومپوزيتورى مۇقان تولەباەۆتىڭ شىعارمالارىن ورىندادى. «قورقىت» ەتنو-ءانسامبلى داۋلەتكەرەيدىڭ «كورۇعلى» كۇيى مەن ءانسامبلدىڭ كوركەمدىك جەتەكشىسى شولپان قورعانبەكتىڭ «امانات», «كوك تۇرىكتەر» اتتى اۆتورلىق شىعارمالارىن ۇسىندى.
كەشتىڭ كوركىن استانالىق فيلارمونيا سوليستەرى كەلتىردى. اتاپ ايتقاندا, حالىقارالىق بايقاۋلاردىڭ لاۋرەاتى انەل سمايلوۆا «كوزىڭنىڭ ءمولدىرىن-اي», نۇرايىم ەرتالاپقىزى «بەۋ, ايداي» اندەرىن اۋەلەتتى. ال حالىقارالىق بايقاۋلاردىڭ لاۋرەاتتارى فيرۋزا راحمەتوۆا, ءنۇرسات الماس, شاحريزادا تىنىشتىق جانە التىنبەك ارىستانبەكتىڭ ورىنداۋىنداعى وپەرالىق شىعارمالار كورەرمەننىڭ ەرەكشە ىقىلاسىنا بولەندى.
حەلسينكيدىڭ «Musiikkitalo» كونتسەرت زالىندا وتكەن كونتسەرتتە وپەرا ءانشىسى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى سۇندەت بايعوجين ابايدىڭ «ايتتىم سالەم, كالامقاس» انىمەن جينالعان قاۋىمدى ەرەكشە كۇيگە بولەدى. ءانشىنى رويالمەن بەلگىلى كومپوزيتور رينات عايسين سۇيەمەلدەدى.
ايتا كەتەيىك, بۇل كەشتەر استانا قالاسى ءماسليحاتى دەپۋتاتتارىنىڭ ەستونيا جانە فينلياندياعا رەسمي ساپارىنا سايكەس كەلدى.
«مۋزىكا ءتىلى – ۇلتىنا قاراماستان بارىنە تۇسىنىكتى ءتىل. ال مادەني كوپىر ەلدەر اراسىنداعى ەڭ بەرىك بايلانىس ورناتۋدىڭ جولى. فينليانديا استاناسى حەلسينكيدە وتكەن استانا قالاسىنىڭ مادەني كۇندەرى ونەردىڭ حالىقتاردى جاقىنداستىرا الاتىنىنىڭ جارقىن ۇلگىسىنە اينالدى. «The Voice of the Great Steppe» كونتسەرتتىك باعدارلاماسى دوستىقتى بەينەلەپ, قازاقستان مەن فينليانديا اراسىنداعى مادەني بايلانىستى نىعايتۋداعى ماڭىزدى قادامداردىڭ ءبىرى بولدى», دەدى استانا قالاسى ءماسليحاتىنىڭ توراعاسى ەرلان كاناليموۆ.
كەش بارىسىندا قازاقتىڭ ءان-كۇيلەرىمەن قاتار وزگە تىلدەگى تۋىندىلار دا ورىندالدى. سونىڭ ىشىندە «قورقىت» ەتنو-ءانسامبلى ايگىلى فين اۋەنى «Levan Polkka» شىعارماسىمەن كورەرمەندى تاڭعالدىردى.
