«قۇرىلىسى ۇزاققا سوزىلعان ەكى تۇرعىن ءۇي كەشەنىنىڭ ۇلەسكەرلەرىنىڭ ماسەلەسىن شەشتىك. ولار – «تەرريتوريا كومفورتا-1» (ەكىنشى كەزەك) جانە «جاعالاۋ 4» پوليگون 3 كوپپاتەرلى تۇرعىن ءۇي كەشەندەرى. ەكى ءۇي دە باسىنان باستاپ قايتا سالىندى.
ماسەلەن, «تەرريتوريا كومفورتا» تۇرعىن ءۇي كەشەنىنىڭ قۇرىلىسى 20 جىل بۇرىن باستالعان. ءۇيدى تەحنيكالىق تەكسەرۋ كەزىندە نىساننىڭ اپاتتى جاعدايدا ەكەنى انىقتالدى. اپاتتى تۇرعىن ءۇي كەشەنىنىڭ بلوكتارىن تولىقتاي بۇزۋ بويىنشا اۋقىمدى جۇمىس جۇرگىزىلدى. وسىعان دەيىن 1-كەزەكتىڭ قۇرىلىسى اياقتالعان بولاتىن. ول كەزدە 100-دەن استام ۇلەسكەر وتباسى پاتەر كىلتىن العان. بيىل ەكىنشى كەزەكتىڭ قۇرىلىسىن بىتىردىك. وسىلايشا, 20 جىلعا سوزىلعان ەڭ پروبلەمالى تۇرعىن ءۇي كەشەنىنىڭ ماسەلەسى ءساتتى شەشىلدى.
ال «جاعالاۋ 4» پوليگون 3 قۇرىلىسى 10 جىل بۇرىن باستالعان. جوسىقسىز ارەكەت سالدارىنان مەردىگەرلەر اۋىسىپ, ءۇيدىڭ پايدالانۋعا بەرىلۋ مەرزىمى وزگەردى. تۇرعىنداردىڭ جالپى جينالىسىندا ۇلەسكەرلەردى جاڭا «ە16, ە17, ە32» تك-عا كوشىرۋ تۋرالى شەشىم قابىلدانعان. وسىلايشا, ۇلەسكەرلەر كوپتەن كۇتكەن باسپانالارىنىڭ كىلتىن الدى. اۋماقتى اباتتاندىرۋ كوكتەمدە جالعاسادى.
قۇرىلىسى ۇزاققا سوزىلعان نىسانداردىڭ ماسەلەسى مەملەكەت باسشىسىنىڭ باقىلاۋىندا. سوڭعى جىلدارى وسىنداي 140-تان استام تۇرعىن ءۇي كەشەنى حالىق يگىلىگىنە بەرىلدى. كوپتەن كۇتكەن پاتەر كىلتىن 15,5 مىڭنان اسا ۇلەسكەر وتباسى الدى. قالعان بىرنەشە ءۇيدى جىل سوڭىنا دەيىن اياقتاۋدى جوسپارلاپ وتىرمىز», دەپ جازدى جەڭىس قاسىمبەك.
