ماۋلەن اشىمباەۆ قاتىسۋشىلارعا ءىلتيپات بىلدىرە كەلىپ, مەملەكەت باسشىسى قاسىم-جومارت توقاەۆتىڭ تاپسىرماسىمەن ەلىمىزدە كرەاتيۆتى يندۋستريانى دامىتۋ ءۇشىن جۇيەلى قادامدار جاسالىپ جاتقانىن اتاپ ءوتتى.
– پرەزيدەنتىمىز قاسىم-جومارت توقاەۆ ەلىمىزدە كرەاتيۆتى يندۋستريانى دامىتۋعا قاتىستى ناقتى مىندەتتەردى بەلگىلەپ بەردى. بۇگىندە وسى باعىتتا اۋقىمدى جۇمىس اتقارىلىپ جاتىر. سونىڭ اياسىندا ەلىمىزدە العاش رەت كرەاتيۆتى يندۋستريانى قولداۋ قورى قۇرىلاتىن بولدى. سونداي-اق مەملەكەت باسشىسىنىڭ تاپسىرماسىمەن سالاعا قاجەتتى ينفراقۇرىلىمدى دامىتۋ, ونىڭ ىشىندە بىرقاتار كرەاتيۆتى ورتالىق اشۋ جۇمىستارى دا جۇيەلى جۇرگىزىلىپ كەلەدى, – دەپ پالاتا سپيكەرى مۇددەلى تاراپتاردى وتاندىق كرەاتيۆتى يندۋستريانى دامىتۋ جولىندا بىرلەسىپ ارەكەت ەتۋگە شاقىردى.
فورۋمعا قاتىسۋشىلار تسيفرلىق تەحنولوگيالاردى ەنگىزۋگە قاتىستى باستامالاردى, سونداي-اق ونەر وكىلدەرىنىڭ ءبىلىم بەرۋ, دەنساۋلىق ساقتاۋ, قۇتقارۋشىلار جانە باسقا دا سالالاردىڭ ماماندارىمەن بىرلەسكەن جوبالارىن تالقىلادى. ودان بولەك, تالانتتاردى ىزدەپ, ولاردىڭ ونىمدەرى مەن قىزمەتتەرىن ەكسپورتتاۋعا جاردەم بەرەتىن كرەاتيۆتى يندۋستريانى قولداۋ قورى اياسىنداعى بىرلەسكەن جۇمىس بارىسى ءسوز بولدى.
سونىمەن قاتار سەنات توراعاسى كرەاتيۆتى سەكتوردىڭ ەكونوميكالىق الەۋەتى جىل وتكەن سايىن ارتىپ كەلە جاتقانىن تىلگە تيەك ەتىپ, الەمدىك ترەندتەرگە جانە وتاندىق كونتەنتمەيكەرلەر نازار اۋدارۋعا ءتيىس ماڭىزدى ماسەلەلەرگە توقتالدى. ونىڭ ايتۋىنشا, ۇلتتىق قۇندىلىقتاردى دارىپتەۋ ىسىندە شىعارماشىلىق سەكتور ماڭىزدى ءرول اتقارادى.
– كرەاتيۆتى سەكتور – ۇلتتىڭ مادەنيەتى مەن قۇندىلىقتارىن دارىپتەۋدىڭ زاماناۋي ءتاسىلى. بۇگىنگىدەي سىن-قاتەرلەر جاعدايىندا ۇلتتىق ەرەكشەلىكتى ساقتاپ, دامىتۋدىڭ ماڭىزى زور. بۇل رەتتە دايىندالاتىن كونتەنتتەردىڭ مازمۇنى ايرىقشا ءرول اتقارادى. زەرتتەۋلەرگە سۇيەنسەك, قازىر جاستار شەتەلدىك ەمەس, وتاندىق كونتەنتتى كوبىرەك پايدالانعاندى ءجون سانايدى. بۇل سىزدەر سياقتى كرەاتيۆتى يندۋستريا سالاسىندا جانە تسيفرلىق ورتادا جۇرگەندەر ءۇشىن جاقسى مۇمكىندىك ەكەنى ءسوزسىز, – دەدى م.اشىمباەۆ.
ول وسى تۇرعىدا بيبىگۇل تولەگەنوۆا اتىنداعى كرەاتيۆتى مەكتەپتىڭ ميسسياسى وڭىرلەردەن كەلگەن دارىندى ازاماتتارعا قولداۋ كورسەتۋدى جانە ولاردىڭ جوبالارىن ىلگەرىلەتۋگە, الەۋەتى مەن تالانتىن اشۋعا ىقپال ەتۋدى كوزدەيتىنىن اتاپ ءوتتى.
– «QazaqSham» فورۋمىنىڭ بيبىگۇل تولەگەنوۆا اتىنداعى كرەاتيۆتى مەكتەپتە ءوتۋى تەگىن ەمەس. سەبەبى بيبىگۇل تولەگەنوۆا – ءوزى دە, ونەرى دە ۇلتىمىزدىڭ ماقتانىشىنا اينالعان دارا تۇلعا. ونىڭ كوپقىرلى شىعارماشىلىعى ەلىمىزبەن بىرگە الەمدىك دەڭگەيدە دە جوعارى باعالانادى جانە جاس تالانتتارعا ءاردايىم باعىت-باعدار كورسەتىپ تۇرادى. سوندىقتان فورۋمنىڭ وسىنداي ونەر يەسىنىڭ اتىمەن اتالاتىن كرەاتيۆتى مەكتەپتە ۇيىمداستىرىلۋىنىڭ سيمۆوليكالىق ءمانى زور دەپ قابىلدايمىز, – دەدى م.اشىمباەۆ.
ايتا كەتەيىك, بيبىگۇل تولەگەنوۆا اتىنداعى كرەاتيۆتى مەكتەپتىڭ ەرەكشەلىگى – اكادەميالىق جانە كاسىبي داعدىلاردى دامىتا وتىرىپ, دۋالدى ءبىلىم الۋ مۇمكىندىگىنىڭ بولۋى. مۇندا ءداستۇرلى باعىتتار مەن سوڭعى تەحنولوگيالىق كەڭىستىكتەردى قوسا العاندا, ءتورت فاكۋلتەت جانە 40 تاقىرىپتىق كابينەت جۇمىس ىستەيدى. ولار – دىبىس جازۋ ستۋدياسى, ءسان ديزاينى زەرتحاناسى, ART گالەرەيا, انيماتسيالىق ستۋديا, ويىن زەرتحاناسى, ۆيرتۋالدى شىنايىلىق جانە جاساندى ينتەللەكت كابينەتتەرى. بۇعان قوسا STEM زەرتحاناسى, 3D مودەلدەۋ, روبوتتەحنيكا جانە باسقا دا مامانداندىرىلعان زالدار بار.
فورۋمعا حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى, «Tan Media Group» ديرەكتورلار كەڭەسىنىڭ توراعاسى ارمانجان بايتاسوۆ, «Phenomenal Kids» جوباسىنىڭ نەگىزىن قالاۋشى ازات ابىكەن, «Balafunny» YouTube-ارناسىنىڭ نەگىزىن قالاۋشى التىناي ەسەنجانوۆا جانە كرەاتيۆتى يندۋستريا سالاسىنىڭ باسقا دا وكىلدەرى قاتىستى.
