فوتو: Shutterstock
بۇل تۋرالى ماجىلىستە تۇركىستان قالاسىنىڭ ەرەكشە مارتەبەسى تۋرالى زاڭ جوباسىن تالقىلاۋ بارىسىندا بەلگىلى بولدى.
ءماجىلىس دەپۋتاتى ارداق نازاروۆ تۇركىستان قالاسى رۋحاني استانا بولىپ تانىلعان سوڭ, الكوگولگە تىيىم سالۋعا بولا ما دەپ سۇرادى.
«وسى زاڭ اياسىندا, ەگەر ءبىز تۇركىستاندا الكوگول ىشۋگە, ونى ساتۋعا, ماس كۇيىندە كوشەدە جۇرۋگە تىيىم سالساق... ويتكەنى, تۇركىستان-رۋحاني استانا, بارلىق قازاقتار مۇندا رۋحانياتتى تارتۋى كەرەك. ءبىزدىڭ اتا-بابالارىمىز, اۋليەلەرىمىز, بيلەر وسىندا جاتىر. ەرتەڭ مۇندا شەتەلدەن كوپتەگەن قوناقتار كەلەدى, ەگەر ءبىزدىڭ ادامدار ولاردى ماس كۇيىندە قارسى السا, بۇل ۇيات بولادى. سوندىقتان, وسى زاڭ اياسىندا تۇركىستاندى الكوگولسىز قالا دەپ جاريالاۋ ارقىلى الكوگولگە تىيىم سالا الامىز با», دەپ سۇرادى ماجىلىسمەن تۇركىستان قالاسى اكىمدىگىنىڭ وكىلدەرىنەن.
تۇركىستان وبلىسى اكىمىنىڭ ورىنباسارى بەيسەنباي تاجىباەۆ وڭىردە «ىشىمدىكسىز اۋىل» جوباسى ىسكە اسىرىلىپ قويعانىن ايتتى.
«اتالعان جوباعا باسقا وبلىستار دا اتسالىسىپ جاتىر. بۇل باستامانى اقساقالدار قولدادى, ءتۇرلى فورماتتا پىكىرتالاس تا بولدى. ارينە, تۇركىستان تۋريستەر ءۇشىن تارتىمدى قالا. وسىعان بايلانىستى كوپتەگەن پىكىرلەر تۋىندايدى. بۇل ماسەلە وزەكتى جانە ول زاڭنامالىق نورمالار اياسىندا قاراستىرىلادى», دەپ جاۋاپ بەردى اكىمنىڭ ورىنباسارى.
