قىزىعى, تورتتاعانداپ جۇرۋگە اۋەستەر مۇنى حوببي سانايدى. ۇستانىمىن اتا-اناسى قۇپتاعاندارى دا بار كورىنەدى. سولايشا ءومىر سالتىنا اينالدىرعان. ەلىكتەۋدى ەرسى كورمەگەندەر ماسكاسىن ءوز قولدارىمەن جاساپ الىپ, ۇناعان وبرازىنا ەنەدى. جەلىكپە جاستاردىڭ ەرمەگىنەن پايدا تاۋىپ جاتقاندار دا بار. ونى ساۋدا نۇكتەلەرىنەن اڭعارۋعا بولادى. قازىر جانۋارلارشا ءجۇرىپ-تۇرامىن دەگەندەرگە دايىن رەكۆيزيت جەتكىلىكتى. ولارعا ارنالعان ارنايى ماسكالار ساۋدادا بار. كۆادروبينگكە ەلىكتەيتىندەر ماسكانىڭ باعاسىنا قاراماي ساۋداسىن قىزدىرىپ جاتقان كورىنەدى. بۇگىندە جاسوسپىرىمدەردىڭ عانا ەمەس, ەرەسەكتەر تاراپىنان دا سۇرانىس ارتقان دەسەدى.
ادامداردىڭ ءتورت اياقتاپ جۇرۋىنە «كۆادروبيكا» دەگەن اتاۋ قايدان تەلىندى؟ تاريحىن تارقاتساق, كۆادروبيكا, كۆادروبەرينگ ۇعىمىنىڭ ءتۇپ-تامىرى كۇنشىعىس ەلىنە تارتادى. بالا كۇنىنەن ءتورت اياقتاپ ءجۇرۋدى ادەتكە اينالدىرعان جاپوندىق سپرينتەر كەنيتي يتو يتكە ەلىكتەگەندەردىڭ باستاۋى دەسەك بولادى. ول 100 مەترگە تورتتاعانداپ جۇگىرىپ, گيننەستىڭ رەكوردتار كىتابىنا دا ەنىپتى. جاپون بالاسىنىڭ وسى جەتىستىگىنە تاڭىرقاعاندار ترەند قىلسا كەرەك. باستاپقىدا جاپونيا, كەيىن امەريكادا كۆادروبيكاعا اۋەستەنگەندەر قاتارى كوبەيگەن. سولاي الەم اينالعان ەلىكتەۋشىلىك الەۋمەتتىك جەلى ارقىلى بىزگە دە جەتتى.
ال جات جەردەن جەتكەن جاستار حوببيىنە قاتىستى پسيحولوگتەر پايىمى سان ءتۇرلى. وعاش قىلىققا ويىن بالالارىنىڭ ۋاقىتشا ارەكەتى دەپ باعا بەرگەن ماماندار دا بار. ەرسى قىلىقپەن اينالىسقان جەتكىنشەك ادامي قۇندىلىقتاردان الشاقتاي باستايدى دەپ الاڭداۋشىلىق بىلدىرگەندەر دە از ەمەس. Tik-tokتان تاراعان ترەند بالانىڭ ءتۇپساناسىنا تامىرىن جايماي تۇرىپ, تەز ارادا توقتاتۋ كەرەك دەپ پايىم ايتقاندار دا بولدى.
ءدىني شاريعاتپەن جۇرەتىن مەملەكەت بولماساق تا, ءداستۇر مەن يماندىلىقتى تەڭ ۇستايتىن حالىقپىز. سوندىقتان قوعامنىڭ وسى جات قۇبىلىسقا قاتىستى ورتاق كوزقاراسى بولۋى قاجەت.
كۆادروبيكانىڭ قاۋپى جوعارى مىنبەرلەردەن دە ايتىلا باستادى. ماسەلەن, ءماجىلىس دەپۋتاتى داۋلەت مۇقاەۆ ءوزىنىڭ دەپۋتاتتىق ساۋالىندا ماسەلەگە ماڭىز بەردى. ماجىلىسمەن ءتىپتى جانۋارلارشا جۇرگەندەردىڭ ارەكەتىن دەگراداتسيا دەپ دابىل قاقتى. سوندىقتان دەپۋتات جانۋارلاردىڭ قيمىل-قوزعالىسىن قايتالاعاندارعا قارسى كۇرەستى قازىر باستاپ, جەتكىنشەكتەردىڭ جەلىكپە قىلىعىن زاڭمەن تىيۋىمىز كەرەك دەپ
سانايدى.
ارۋجان سەرىكجانقىزى,
شاكارىم ۋنيۆەرسيتەتىنىڭ 2-كۋرس ستۋدەنتى
