گازەتىمىزدىڭ 25 000-ءنومىرى شىققان كۇنى جاريالاعان «ۇلتتىق رۋحتىڭ ۇستىنى» دەگەن شاعىن ماقالادا وسىلاي دەگەن ەكەنبىز.
باس باسىلىمنىڭ 105 جىلدىعى اتالاتىن كۇنى, ياعني 2024 جىلعى 17 جەلتوقساندا «ەگەمەن قازاقستاننىڭ» 30 973 ءنومىرى جارىق كورەدى. بۇل – ءبىز جوعارىدا سانامالاپ وتكەن شارۋا, گازەتتىڭ ءبىر ءنومىرىن وقىرمان قولىنا تيگىزۋ ءۇشىن جاسالاتىن جاڭاعىداي قام-قارەكەت ...وتىز مىڭ توعىز ءجۇز جەتپىس ءۇش رەت جاسالدى دەگەن ءسوز. نە دەگەن ەرەن ەڭبەك! نە دەگەن جانكەشتى جۇمىس!
«ەگەمەننىڭ» ەل ومىرىندە الار ورنىنا ءسوز دە جەتپەيدى, باعا دا جەتپەيدى. «ۇشقىن» اتانعان كەزىندە دە, «ەڭبەك تۋى», «ەڭبەكشىل قازاق», «ەڭبەكشى قازاق», «سوتسيالدى قازاقستان», «سوتسياليستىك قازاقستان» اتانعان كەزدەرىندە دە ەل سەنىمىنەن تابىلدى. اتى وزگەرگەندە دە زاتى وزگەرگەن جوق. بۇل جىلداردا گازەت ورىنبوردان دا شىقتى, قىزىلوردادان دا شىقتى, الماتىدان دا شىقتى, استانادان دا شىقتى. قايدان شىققاندا دا ويدان شىقتى. 105 جىلدىق وسىناۋ تاريحىندا «ەگەمەن» قاشاندا ەلمەن بىرگە تىنىستادى, ەلمەن بىرگە قۋاردى, ەلمەن بىرگە قۋاندى, ونىڭ سارعايعان بەتتەرىندە كورمەگەنى جوق حالقىمىزدىڭ شىنشىل شەجىرەسى سايراپ جاتىر, باس باسىلىمنىڭ وزىنە ەجەلدەن ءتان ورنىقتى ويلاۋ, سابىرلى سويلەۋ, تەرەڭنەن تولعانۋ سياقتى قاسيەتتەرى جايناپ جاتىر.
مىنە, ءبىر عاسىردان استام ۋاقىتتان بەرى بۇل گازەت ءبىزدىڭ حالقىمىزدىڭ جان سەرىگى بولىپ كەلەدى. جيىرماسىنشى, وتىزىنشى جىلدارداعى جاڭا ءومىر قۇرۋ جانتالاسى, قىرقىنشى جىلدارداعى قىرعىن سوعىستىڭ جاڭعىرىعى, ەلۋىنشى, الپىسىنشى جىلدارداعى تىڭ يگەرۋ, الىپ قۇرىلىس اۋقىمى, ودان كەيىنگى كەزەڭدەگى حالىقتىڭ تىنىس-تىرشىلىگى وسى گازەتتىڭ بەتىنەن بارىنشا كەمەل كورىنىپ, باسىلىم تىگىندىلەرىندە قازاق ەلىنىڭ تالايلى تاريحى ءتۇزىلدى. وتكەن عاسىردىڭ 90-جىلدارىنداعى گازەت ەڭبەگى ءتىپتى ەرەسەن. شەراعاڭ – قازاقتىڭ شەرحان مۇرتازاسى باسقارعان جىلداردا بۇل باسىلىم ەگەمەندىك يدەياسىن ەڭ الدىمەن كوتەردى. دالامىزدىڭ داناگويى – ءابىش كەكىلباەۆ باسقارعان كەزەڭدە – تاۋەلسىزدىك تابالدىرىعىنداعى زامان وزگەرىپ, قوعام وزگەرىپ, ادام وزگەرىپ جاتقان جاۋاپتى شاقتا جاريالانعان ماقالالار وقىرماندى كۇردەلى قۇبىلىستاردىڭ ءمانىن تەرەڭ پايىمداۋعا ۇيرەتتى. نارىق جەتىپ, تالاي نارسەدەن پارىق كەتىپ جاتقان انا ءبىر جىلداردا دا قايتكەندە وقىلۋدى, قايتكەندە تارالۋدى عانا كۇيتتەمەدى, قازاقتىڭ قاسيەتتى ءسوزىنىڭ قادىرىن قاشىرمادى, الاش بالاسىن ارزان سوزبەن الدارقاتپادى, قايتا نامىسىن قامشىلاپ, جاڭا زاماننىڭ, جاڭا قوعامنىڭ قاتاڭ سىناعىنا دايىندادى.
كۇن سايىن ءارىپ تۇزەتكەن, ءتۇن سايىن قارىپ كۇزەتكەن جۋرناليستىك جۇمىس جانىڭدى جەپ جىبەرەتىنىنە, ايلار ەمەس, جىلدار بويى ۇيگە كەشكى ساعات ون بىردەن ەش ەرتە جەتە المايتىنىڭا, كەيدە رەداكتسيا عيماراتىنان ءتۇننىڭ ءبىر ۋاعىندا, كەيدە ءتىپتى اتقان تاڭمەن بىرگە شىعىپ بارا جاتاتىنىڭا قاراماي, وسى جاساپ جاتقان جۇمىسىمىز ەرتەڭ مىڭ-مىڭداعان ادامداردىڭ الدىنا تارتىلادى-اۋ, ولار وسى ارقىلى ەلىمىزدىڭ تىنىس-تىرشىلىگى تۋرالى وي تۇيەدى-اۋ, وسى جازىلعاندارعا قاراپ ويلانادى-اۋ, تولعانادى-اۋ دەگەندى سەزىنۋدىڭ ءوزى جىگەرىڭدى جانىپ, قاجىرىڭدى قايراپ سالاتىن. سول جىلدارداعى جۇمىسىمىز جاقسى جەمىسىن دە بەردى: 2000 جىلى 38 مىڭ دانامەن تاراعان گازەتتىڭ تارالىمى 2016 جىلى 212 مىڭعا جەتتى, ياعني بەس جارىم ەسە ءوستى. ساپالىق تۇرعىدان دا سونى سەرپىلىس جاساپ, ەل گازەتى دەگەن اتتى يەلەندى, ەلدىكتىڭ ءبىر بەلگىسىنە اينالدى. مۇنى ءدايىم ماقتانىش ەتىپ وتەمىز. ۇجىم قىزمەتكەرلەرىنىڭ تۇرمىستىق جاعدايىن جاساۋ دا ۇدايى ويدا تۇردى. 2016 جىلى «ەگەمەن قازاقستان» قىزمەتكەرلەرىنىڭ اراسىندا باسىندا باسپاناسى جوق بىردە ءبىر ادام قالماعان ەدى. ءۇي الىپ بەرە الماعاندارعا جاتاقحانا سالىپ بەرگەن بولاتىنبىز. رەداكتسيانىڭ سەگىز قاباتتىق ءزاۋلىم عيماراتى دا سول جىلدارى تۇرعىزىلدى. سول ورىنعا بۇگىندە ەكى رەداكتسيا سىيىپ وتىر.
وسى باسىلىمنىڭ باسشىسى بولۋ تۇرماق, قوسشىسى بولعان جىلدارىمدا دا ءوزىم ومىرىمدەگى باياندى ءبىر باقىتىم قازاقتىڭ باس گازەتىندە قىزمەت ەتەتىنىم دەپ سانايتىنمىن. بۇل باسىلىمنىڭ تىزگىنىن ءار جىلدارى سماعۇل سادۋاقاس ۇلى, جۇسىپبەك ايماۋىت ۇلى, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابيت مۇسىرەپوۆ, شەرحان مۇرتازا, ءابىش كەكىلباەۆ سىندى قازاقتىڭ نەبىر جاقسىسى مەن جايساڭى ۇستاعان. سول قاسيەتتى جولدى جالعاستىرۋ باقىتىن بۇيىرتقان تاعدىرىما تاۋبە دەيمىن. بۇل ءسوزىم – جۇرەگىمدى جارىپ شىققان جان سىرىم. باسىلىمنىڭ عاسىرلىق تويى تۇسىنداعى سۇحباتىمىزدىڭ تاقىرىبىنا شىعارىلعان «ازامات ەتكەن «ەگەمەن», ارداقتامايىن نەگە مەن؟» دەگەن ءسوزىمدى قايتالاي ايتامىن.
قازىر دە قالامدى قولدان تاستاماي, باس باسىلىمنىڭ ءبىر اۆتورى بولىپ جۇرگەنىمىزدى ابىروي كورەمىز. التىن ۇياداي ارداقتى دا اياۋلى ۇجىمداعى ءار قىزمەتكەرگە دە, وسى گازەتتىڭ ءار اۆتورىنا دا, قارا شاڭىراقتىڭ قاسيەتىن قاستەرلەگەن ءار وقىرمانعا دا جاقسىلىق, قۋانىش, ساتتىلىك, تابىس تىلەيمىز.
ساۋىتبەك ابدراحمانوۆ,
«ەگەمەن قازاقستان» رەسپۋبليكالىق گازەتى» اق 2000–2016 جىلدارداعى پرەزيدەنتى,
مەملەكەتتىك سىيلىقتىڭ لاۋرەاتى
