ءوز سوزىندە ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ مەملەكەت باسشىسى قاسىم-جومارت توقاەۆ ۇلتتىق مادەنيەت پەن ادەبيەتكە ەرەكشە نازار اۋداراتىنىن اتاپ ءوتتى. ماسەلەن, بىلتىر پرەزيدەنت «قازاقستاننىڭ حالىق جازۋشىسى» اتاعىن قايتاردى, سونداي-اق ونىڭ باستاماسىمەن كەلەسى جىلدان باستاپ 23 ءساۋىر ۇلتتىق كىتاپ كۇنى رەتىندە اتالىپ وتىلەدى.
– «Amanat» پارتياسى ۇيىمداستىرعان « ۇلى دالا» بايقاۋى مەملەكەت باسشىسىنىڭ ۇلتتىق ادەبيەتكە جۇيەلى قولداۋ كورسەتۋ جونىندەگى ساياساتىنىڭ جالعاسى سانالادى. ءبىزدىڭ بايقاۋىمىز وتاندىق تالانتتاردىڭ دامۋىنا تۇرتكى بولدى. بيىلعى بايقاۋ بالالار ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىعى اياسىندا وتكىزىلدى. مەملەكەت باسشىسىنىڭ قولداۋىمەن جىل بويى ەلىمىزدە اۋقىمدى ءىس-شارالار ءوتتى. جازۋشىنىڭ تۋعان جەرىندە ەڭسەلى ەسكەرتكىشى اشىلدى. پاريجدەگى يۋنەسكو-نىڭ شتاب-پاتەرىندە بەردىبەك سوقپاقباەۆتىڭ 100 جىلدىعىنا ارنالعان كونفەرەنتسيا ءوتتى, – دەدى پارتيا توراعاسى.
ە.قوشانوۆ «Amanat» پارتياسى جاس تالانتتاردى, قارىمدى قالامگەرلەردى ۇدايى قولدايتىنىنا باسا نازار اۋداردى.
– ءبارىمىزدىڭ ويىمىز دا, ماقساتىمىز دا ءبىر. بۇل – ەلگە قىزمەت ەتۋ, مەملەكەتىمىزدىڭ بولاشاعى ءۇشىن ايانباي تەر توگۋ. ال مەملەكەتتىڭ مۇددەسى جولىندا ادال قىزمەت ەتىپ, ەلدىڭ رۋحىن كوتەرىپ جۇرگەن تۇلعا, ول – ءبىزدىڭ پرەزيدەنتىمىز قاسىم-جومارت توقاەۆ. بايقاساڭىزدار, مەملەكەت باسشىسى وسى رۋح دەگەن ءسوزدى ءجيى ايتادى. ادىلدىك, ادالدىق, وتانسۇيگىشتىك, ەڭبەكقورلىق, ونىڭ ىشىندە ادال ەڭبەك سياقتى قۇندىلىقتارعا ەرەكشە ءمان بەرەدى. ويتكەنى بۇل قۇندىلىقتار ەلدىڭ رۋحىن كوتەرەدى. سىزدەردىڭ شىعارمالارىڭىزعا دا وسى قاسيەتتەر, قۇندىلىقتار, ەلدەگى وڭ وزگەرىستەر ارقاۋ بولۋعا ءتيىس دەپ ويلايمىن, – دەدى ءماجىلىس توراعاسى.
« ۇلى دالا» بايقاۋى بەسىنشى مارتە وتكىزىلىپ, وسى ۋاقىت ارالىعىندا يگى داستۇرگە اينالدى. بيىل بايقاۋعا قاتىسۋشىلاردان كەلىپ تۇسكەن شىعارمالاردى ىرىكتەۋ جۇمىسى 1 تامىزدان 30 قازانعا دەيىن جۇرگىزىلىپ, اقتىق سىنعا 150 شىعارما ىرىكتەلدى. ونىڭ بارلىعى اikyn.kz سايتىندا ارنايى « ۇلى دالا بايقاۋى» ايدارىمەن ورنالاستىرىلدى.
«پوەزيا» اتالىمىندا ءبىرىنشى ورىندى اقىن, adebiportal.kz جەتەكشىسى ىقىلاس وجاي ۇلى يەلەندى. ەكىنشى ورىندى اقىن, جۋرناليست مۇحتار كۇمىسبەك, ءۇشىنشى ورىندى اقىن, جۋرناليست يسلام قابۋل ۇلى الدى.
«پروزا» اتالىمى بويىنشا جازۋشى, پەداگوگ گۇلجان قاناتقىزى ۇزدىك دەپ تانىلدى. ەكىنشى ورىندى جازۋشى, مۇعالىم رامازان جەتكىزگەن ۇلى, ال ءۇشىنشى ورىندى جازۋشى توقتارالى تاڭجارىق يەلەندى.
«بالالارعا ارنالعان شىعارما» اتالىمىندا سەرىكجان نۇرباقىت ۇلى جەڭىمپاز اتاندى. ەكىنشى ورىن جازۋشى اينۇر وماروۆاعا, ءۇشىنشى ورىن اقىن ءارى تەاترتانۋشى ءابىل نۇريسلامعا بۇيىردى.
«دراماتۋرگيا» اتالىمىندا ءبىرىنشى ورىندى دراماتۋرگ قولعانات مۇرات, ەكىنشى ورىندى جازۋشى راحات الىشەر, ءۇشىنشى ورىندى اقىن اقجان امانجول يەلەندى.
«ادەبي سىن» اتالىمىندا اقەركە اسان جەڭىمپاز اتاندى. ەكىنشى ورىندى اقىن, سىنشى تىلەۋبەك باتىس, ءۇشىنشى ورىندى ارمان ادىلبەك يەلەندى.
سونىمەن قاتار ءىلياس جانسۇگىروۆ, ساكەن سەيفۋللين جانە بەيىمبەت ءمايليننىڭ تۋعانىنا 130 جىل تولۋىنا وراي تاعايىندالعان ء«ۇش بايتەرەك» ارنايى جۇلدەسى اقىن الماس تەمىربايعا تابىستالدى. جازۋشى ءارى اۋدارماشى جادىرا شامۇراتوۆا «الاش اماناتى» ارنايى سىيلىعىن يەلەندى. ال بەردىبەك سوقپاقباەۆتىڭ 100 جىلدىعىنا ارنالعان ارنايى سىيلىق اقىن, ادەبيەتتانۋشى التىنبەك مەرسادىققا بۇيىردى.
ايتا كەتەيىك, بايقاۋ اياسىندا بەردىبەك سوقپاقباەۆقا ارنالعان كورمە ۇيىمداستىرىلدى. م.تىنىشپاەۆ اتىنداعى تاريحي-ولكەتانۋ مۇراجايىنىڭ قىزمەتكەرلەرى استاناعا بالالار ادەبيەتى كلاسسيگى شىعارمالارىنىڭ العاشقى باسىلىمدارىن, قۇجاتتارى مەن جەكە زاتتارىن اكەلدى.
