جاستىق جىگەرىن ءتيىمدى پايدالانىپ, شاراپاتى مول شارۋالاردىڭ بەل ورتاسىندا جۇرەتىن جانداردىڭ ارقاسىندا بيىل قالادا 800-دەن اسا قايىرىمدىلىق جوباسى قانات قاققان. ءبىرى قول ەڭبەگىمەن, ەندى ءبىرى كاسىبي بىلىگى ارقىلى قاراشاعا كومەك قولىن سوزعان ەرىكتىلەردىڭ دەنى – جاستار. مۇقتاجدارعا قامقورلىق تانىتۋدان باستاپ قورشاعان ورتانى قورعاۋعا دەيىنگى الەۋمەتتىك باستامالاردىڭ كەڭ اۋقىمىن قامتيتىن ۆولونتەرلىك ءىس-شارالارعا قالانىڭ 200 مىڭعا تارتا جاس تۇرعىنى ءۇن قوسقان.
الماتى قالاسى جاستار ساياساتى باسقارماسىنىڭ باسشىسى ازيز قاجدەنبەك مەگاپوليس ەرىكتىلەرى شاھارداعى ءتۇرلى ماسەلەنى شەشۋگە بەلسەنە ارالاساتىنىن ايتادى.
«ەرىكتى بولۋ – جۇرەكتىڭ ءىسى. «بالانىڭ ىستەگەنى بىلىنبەيدى» دەگەندەي, ءوز ىنتاسىمەن يگى ىستەرگە اتسالىساتىن جاستار قالامىزدىڭ يگىلىك جاساعى دەسەك, ارتىق بولماس. ولاردىڭ ءبىرى اتا-انا قامقورلىعىنسىز قالعان بالالاردى وقىتسا, كەيبىرى جالعىزىلىكتى زەينەتكەرلەرگە ارنالعان پانسيوناتتاردا شىعارماشىلىق كەشتەر ۇيىمداستىرادى, ال ەندى بىرەۋلەرى جانۋارلارعا نەمەسە قورشاعان ورتاعا كومەكتەسەدى. ۆولونتەرلەردىڭ باستاماسىمەن اتا-اناسىنىڭ قامقورلىعىنسىز قالعان بالالارعا ارنالعان ءبىلىم بەرۋ جوبالارى ۇيىمداستىرىلدى. جىل باسىنان بەرى ماركەتينگ, قارجىلىق ساۋاتتىلىق, موبيلوگرافيا, ارت-جۋرناليستيكا سەكىلدى بىرقاتار باعىت بويىنشا ساباقتار ءوتتى. بۇعان قوسا ەرىكتىلەر قارت ادامدارعا ارنالعان شىعارماشىلىق كەشتەر, بۇرالقى جانۋارلارمەن جۇمىس, ت.ب. جوبالار وتكىزدى. سونداي-اق ەرىكتىلەر كۇشىمەن 10 مىڭنان اسا ادامدى قامتىعان اشىق اسپان استىنداعى وتاندىق فيلمدەردىڭ 40-تان اسا كورسەتىلىمى ۇيىمداستىرىلدى», دەيدى ا.قاجدەنبەك.
جىل باسىندا سۋ باسقان ايماقتارعا گۋمانيتارلىق كومەك جىبەرۋ كەزىندە ەرىكتىلەر ەرەكشە ەڭبەگىمەن كوزگە تۇسكەن. زارداپ شەككەندەرگە ارنالعان 592 توننا زاتتاي كومەك جۇك كولىكتەرىنە ەرىكتىلەر كومەگىمەن تيەلىپ, بۇل جۇمىستارعا اسكەري-ينجەنەرلىك ينستيتۋتتىڭ 100-دەن اسا كۋرسانتى دا قاتىسقان.
قالانىڭ بارلىق اۋدانىندا جۇيەلى جۇمىس ىستەپ كەلە جاتقان «تىلدەر ساياباعى» جوباسى – بەلسەندى جاستاردىڭ جەمىستى ەڭبەگى. تۇرعىندارعا تەگىن ءتىل وقىتاتىن ۇيىرمەلەر كۇننىڭ سالقىنداعانىنا قاراماستان, قالانىڭ كوممۋنالدىق ورتالىقتارى بازاسىندا جۇمىسىن جالعاستىرىپ جاتىر.
قالا بيلىگى تاراپىنان ەرىكتىلەردى وقىتۋ ىسىنە ايرىقشا ءمان بەرىلىپ وتىر. ۆولونتەرلەر مەن ۆولونتەرلىك ۇيىمدارىنا جان-جاقتى قولداۋ كورسەتۋ ءۇشىن جاستار ساياساتى باسقارماسىنىڭ قولداۋىمەن ەرىكتىلەردىڭ وڭىرلىك فرونت-كەڭسەسى جۇمىس ىستەپ كەلەدى. بيىل فرونت-كەڭسە قابىرعاسىندا ءتۇرلى باعىتتار بويىنشا 700-دەن اسا ترەنينگ, شەبەرلىك ساعات وتكىزىلگەن بولسا, جىل سوڭىنا دەيىن تاعى 500 ەرىكتىنى وقىتۋ جوسپارلانعان.
قالا تۇرعىندارى اراسىندا ۆولونتەرلىك قىزمەتتى ناسيحاتتاۋ, جاستاردىڭ الەۋمەتتىك جاۋاپكەرشىلىگىن ارتتىرۋعا جاردەمدەسۋ جانە قالانىڭ دامۋىنا ۇلەس قوساتىن بەلسەندى ۆولونتەرلەردى كوتەرمەلەۋ ماقساتىندا «يگى ىستەر مارافونى» دەپ اتالعان اۋقىمدى جوبا ءوتىپ, ونىڭ شەڭبەرىندە 10 مىڭ ادامدى قامتىعان 20 ءىس-شارا ۇيىمداستىرىلعان.
مارافوننىڭ نەگىزگى ءىس-شارالارىنىڭ قاتارىندا: بالالار ءۇيىنىڭ تاربيەلەنۋشىلەرىن قولداۋ ناۋقانى, ەكولوگيالىق شەبەرلىك سىنىپتارىن وتكىزۋ, جانۋارلارعا ارنالعان باسپانالارعا كومەك كورسەتۋ جانە جالعىزىلىكتى زەينەتكەرلەرگە ارنالعان شىعارماشىلىق كەشتەر ۇيىمداستىرۋ بار. سونداي-اق قالانى اباتتاندىرۋ چەللەندجدەرى مەن ەرىكتىلەر اراسىندا دونورلىق اكتسيا جوسپارلانعان.
«الماتى قالاسى – قازاقستاننىڭ ەڭ ءىرى مەگاپوليسى, ەلدىڭ ەكونوميكالىق جانە مادەني ءومىرىنىڭ جۇرەگى عانا ەمەس, سونىمەن قاتار قۋاتتى ەرىكتىلەر قوزعالىسىنىڭ ورتالىعى. مۇندا الەمدى جاقسى جاققا وزگەرتۋگە ۇمتىلعان مىڭداعان ادامداردىڭ كۇش-جىگەرى بىرىكتىرىلگەن. مەگاپوليستىڭ باي ءارى سەرپىندى ەرىكتىلەر قاۋىمداستىعى از قامتىلعان وتباسىلارعا كومەكتەسۋدەن باستاپ قورشاعان ورتانى قورعاۋعا دەيىنگى ءتۇرلى سالانى قامتيدى. مارافوننىڭ باستى ماقساتى – ەرىكتىلىكتى ناسيحاتتاۋ, بەلسەندىلەردى قولداۋ جانە قالا تۇرعىندارى اراسىندا الەۋمەتتىك جاۋاپكەرشىلىكتى دامىتۋ. مارافوننىڭ ءاربىر جوباسى – يگى ءىس جاساۋدا باسى بىرىككەن جانداردىڭ ءبىزدىڭ قوعامىمىزدىڭ دامۋىنا قوسقان ۇلەسى مەن ۇلگىسى», دەيدى الماتى قالاسى ەرىكتىلەر فرونت-كەڭسەسىنىڭ باسشىسى باعدات انارباەۆا.
الماتى
