سۋرەت: ru.freepik.com
ماسەلەن, بيىل اتىراۋ وبلىسىندا كادرلىق رەزەرۆكە 600-گە جۋىق ادام قۇجات تاپسىردى. ىرىكتەۋدى مەملەكەتتىك قىزمەت ىستەرى اگەنتتىگىنىڭ اتىراۋ وبلىستىق دەپارتامەنتى جەرگىلىكتى اكىمدىكپەن بىرلەسىپ جۇرگىزدى. دەپارتامەنت باسشىسى نۇرلان ەركەباەۆتىڭ دەرەگىنە قاراعاندا, ارنايى كوميسسيا مۇشەلەرى ۇمىتكەرلەردى بىرنەشە سالا بويىنشا تاڭدادى. ونىڭ ىشىندە يندۋستريا, ونەركاسىپ, اگروونەركاسىپتىك كەشەن, جەر قاتىناستارى, ەكونوميكا, قارجى, تۇرعىن ءۇي-كوممۋنالدىق شارۋاشىلىق, ينفراقۇرىلىم, تسيفرلاندىرۋ جانە الەۋمەتتىك سالا بار. كادرلىق رەزەرۆكە جوعارى ءبىلىمى, كەمىندە 3 جىل جۇمىس ءوتىلى بار 35 جاستان اسپاعان جاستار قاتىستى.
ء«وتىنىش بىلدىرگەندەردىڭ اراسىنان 479 ادامنىڭ قۇجاتى قابىلدانىپ, تەستىلەۋ كەزەڭىنە جىبەرىلدى. ودان 204 ۇمىتكەر وڭ ناتيجە كورسەتىپ, جەكە قاسيەتىن باعالاۋ كەزەڭىنە ءوتتى. ال قۇزىرەتتەردى باعالاۋعا 51 ۇمىتكەر جىبەرىلگەن ەدى. الايدا 38 ۇمىتكەر قۇرىلىمدىق سۇحباتقا باردى. كوميسسيا مۇشەلەرىنىڭ شەشىمىمەن تالاپتارعا سايكەس 25 ادامدى وڭىرلىك كادر رەزەرۆىنە ىرىكتەدى. كادرلىق رەزەرۆتىڭ مۇشەلەرى مەملەكەتتىك اكىمشىلىك لاۋازىمعا ورنالاسىپ, ءتيىمدى باسقارۋ جۇيەسىن قۇرۋعا مۇمكىندىك الادى», دەيدى ن.ەركەباەۆ.
اتىراۋ وبلىسى اكىمى اپپاراتىنىڭ باسشىسى نۇرلىبەك جەڭىسبەك ۇلىنىڭ ايتۋىنشا, كادر رەزەرۆىنە الىنعان قىزمەتكەرلەر ەندى ءوز تاڭداۋى بويىنشا ۇسىنىلعان لاۋازىمدارعا كونكۋرسسىز نەمەسە تەستىلەۋدەن وتپەي-اق ورنالاسا الادى. ولار اۋداندىق جانە وبلىستىق دەڭگەيدەگى لاۋازىمدارعا تاعايىندالىپ, وزەكتى ماسەلەلەردى شەشۋگە اتسالىسادى.
«كادر رەزەرۆىنە وتكەن جاستار ءبىلىمى مەن تاجىريبەسىنىڭ ناتيجەسىندە وسىنداي جەتىستىككە جەتىپ وتىر. بۇل – مانساپتىق ءوسۋدىڭ باسپالداعى. ەندى ولار ءار سالادا باسشىلىق لاۋازىمدارعا تاعايىندالىپ, ءوڭىردىڭ وزەكتى ماسەلەلەرىن شەشۋگە ىقپال ەتە الادى. ارينە, بۇل – جاۋاپتى مىندەت. سول سەبەپتەن باتىل شەشىم قابىلداۋدى تالاپ ەتەدى. باستى ماقسات حالىققا قىزمەت ەتۋ ەكەنىن ەستەن شىعارماۋ قاجەت», دەيدى ن.جەڭىسبەك ۇلى.
كادرلىق رەزەرۆتەگى جاستاردىڭ اراسىندا قىز-كەلىنشەكتەر بار. جالپى, اتىراۋ وبلىسىنىڭ جەرگىلىكتى اتقارۋشى ورگانىندا 1 436 مەملەكەتتىك قىزمەتشى جۇمىس ىستەيدى. ونىڭ ىشىندە ەرلەردىڭ ۇلەسى – 40 پايىز. ال 60 پايىزى – ايەلدەر. ولاردىڭ 27 پايىزى باسشى لاۋازىمداردى اتقارادى. جاستاردىڭ شوعىرى 35 پايىزدى قۇرايدى.
«بۇل – رەسپۋبليكاداعى جاقسى كورسەتكىشتىڭ ءبىرى. قازىر مەملەكەتتىك قىزمەتتەگى جاستاردىڭ سانىن ۇلعايتۋ جانە ۇلەسىن ارتتىرۋ باعىتىندا جۇمىس جۇرگىزىلىپ كەلەدى. وسى ورايدا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىمەن بىرلەسكەن ارنايى مەموراندۋم بار. جوعارى وقۋ ورنىندا مەملەكەتتىك قىزمەت مەكتەبى اشىلدى. وسى ءبىلىم ورداسىنان ءبىلىم العان 41 تۇلەك مەملەكەتتىك قىزمەتتە جۇمىس ىستەپ ءجۇر. مۇمكىندىگى شەكتەۋلى ازاماتتارمەن تىعىز بايلانىس ورناتۋ قولعا الىنادى. وسىعان بايلانىستى وبلىس اكىمدىگى تاراپىنان اتالعان ساناتتاعى تۇرعىنداردى ءتيىستى بوس ورىندارعا جۇمىسقا ورنالاستىرۋ بويىنشا ۇسىنىستار بار», دەيدى ن.ەركەباەۆ.
قازىر 18 مەملەكەتتىك قىزمەتشى يكەمدى جۇمىس كەستەسىن پايدالانادى ەكەن. ونىڭ 72 پايىزى – ايەلدەر. بۇل ولارعا كاسىبي مىندەتتەردى جەكە ومىرىمەن ءتيىمدى ۇيلەستىرۋگە مۇمكىندىك بەرەدى. سونداي-اق مەملەكەتتىك قىزمەتتە مۇمكىندىگى شەكتەۋلى ازاماتتار ءۇشىن تەڭ ەڭبەك جاعدايلارى مەن مانساپتىق ءوسۋ مۇمكىندىكتەرى قاراستىرىلعان. وڭىردەگى مەملەكەتتىك قىزمەتتە 30-عا جۋىق مۇمكىندىگى شەكتەۋلى جان جۇمىس ىستەيدى.
اتىراۋ وبلىسى
