نەسيەنى ەشكىم ەرىككەننەن المايدى. ويداعى ورىندالىپ, جوسپار جۇزەگە اسپاعان سوڭ بەلورتادا قالىپ, بانك الدىندا باسى سالبىراپ, سوتقا سابىلىپ جۇرگەندەر كوپ. تاپقان ناپاقاڭ نەسيەدەن ارتىلماعاسىن جۇيكەڭ جۇقارماي كورسىن. ال ماقساتسىز قارىز الىپ, جوسپارسىز جۇمساساڭىز كىمدى كىنالايسىز؟
جالپىحالىقتىق باعدارلاماعا اينالعان «قارىزسىز قوعام» جوباسى جۇرتشىلىقتى وسىنداي كەلەڭسىزدىكتەردەن ساقتاندىرۋعا شاقىرادى. تۇرعىنداردىڭ قارجىلىق ساۋاتىن ارتتىرۋعا باعىتتالعان جوبا اياسىندا 1 200-دەن اسا الماتىلىق تەگىن ءبىلىم العان.
قالا اكىمدىگى مەن قارجى نارىعىن رەتتەۋ جانە دامىتۋ اگەنتتىگىنىڭ قولداۋىمەن «Amanat» پارتياسى جۇزەگە اسىرعان جوبا جىل باسىندا ىسكە قوسىلىپ, 12 563 ازامات ءوز بىلىكتىلىگىن شىڭداعان. وڭىرلىك كوممۋنيكاتسيالار قىزمەتى الاڭىندا وتكەن جوبا قورىتىندىسىندا الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ قاتىسۋشىلاردىڭ 22,9%-ى كوپبالالى وتباسىلار ەكەنىن, 74,3%-ىنىڭ نەسيەسى بارىن, ونىڭ ىشىندە 13,8%-ى تولەمدەرىن 90 كۇننەن اسا ۋاقىت كەشىكتىرگەندەر ەكەنىن اتاپ ءوتتى.
«جوبانىڭ ماقساتى – حالىقتىڭ قارجىلىق ساۋاتىن ارتتىرۋ, وعان جەكە قارجىنى ۇتىمدى باسقارۋ, شىعىنداردى وڭتايلاندىرۋ جانە نەسيەلەر, قارىزدار جانە جۇمىسقا ورنالاسۋ بويىنشا جەكە كەڭەس بەرۋ. وقىتۋ مىندەتتى باعدارلامالار مەن ساراپشىلار كەڭەسىن ۇسىنا وتىرىپ, الماتىنىڭ 8 اۋدانىندا ءوتتى. وقۋدان كەيىن 5 708 قاتىسۋشى جەكە بيۋدجەت قۇرۋ, بانكروتتىق بويىنشا قۇقىقتىق كەڭەس, جەڭىلدەتىلگەن نەسيەلەندىرۋگە جانە گرانتتارعا قۇجاتتار جيناۋ سەكىلدى قىزمەتتەر بويىنشا كومەك الدى. ازاماتتارعا مەملەكەتتىك باعدارلامالارعا قاتىسۋعا قوسىمشا 180 بيزنەس-جوسپار دايىنداۋعا مۇمكىندىك بەرىلىپ وتىر. جوبانى ىسكە اسىرۋ حالىقتىڭ بارلىق ساناتى اراسىندا جەكە قارجىنى باسقارۋ داعدىلارىن تۇراقتى جاقسارتۋدى قامتاماسىز ەتە وتىرىپ, 2026 جىلعا دەيىن جالعاسادى», دەيدى ب.جاۋباسوۆ.
باسقوسۋدا «Amanat» پارتياسى الماتى قالالىق فيليالى توراعاسىنىڭ ورىنباسارى قۋانىش تولەپوۆ قاناتقاقتى كەزەڭ بارىسىندا ەل اۋماعىندا 65 مىڭنان اسا ادام وقۋدان وتكەنىن اتاپ ءوتتى.
«قازىر ءار ادامنان جەكە قارجىنى باسقارۋ نەگىزدەرىن ءبىلۋ تالاپ ەتىلەدى. بۇل بيۋدجەتتى ءتيىمدى جوسپارلاۋ ءۇشىن عانا ەمەس, سونىمەن قاتار وتباسىنىڭ, قوعامنىڭ جانە جالپى ەلدىڭ ءال-اۋقاتىن ارتتىرۋ ءۇشىن ماڭىزدى», دەيدى ول.
كوپشىلىكتىڭ سۇرانىسىنا يە بولعان باعدارلاما كەلەر جىلى دا اۋقىمىن كەڭەيتپەك. اتالعان جوبادا نەسيە بويىنشا بەرەشەگى بار جانە بورىشكەرلەر تىزىمىندە تۇرعان اۋىل تۇرعىندارى, قارىزى بار جانە ونىڭ مەرزىمىن وتكىزىپ العان ازاماتتار, مەملەكەتتەن جەڭىلدىكپەن نەسيە الۋعا ۇمىتكەر كاسىپكەرلەر وقۋدان وتە الادى. قاتىسۋشىلارعا قارىزدان قۇتىلۋعا كومەكتەسۋگە تاجىريبەلىك ءبىلىم مەن كاسىپتىك جاتتىعۋلار ۇسىنۋدىڭ وڭتايلى تەتىكتەرى ىسكە اسپاق.
«ادامنىڭ قارىزسىز نەمەسە قارىزعا باتىپ ءومىر ءسۇرۋى – پسيحولوگيالىق ءارى ەموتسيانالدىق فاكتور اسەرى. مەيلى اۆتوكولىك الۋعا, مەيلى كاسىپ اشۋعا بولسىن, بانك قىزمەتىنە جۇگىنىپ, وسىماقىمەن نەسيە الماعاندار از. قوعام «قارىزعا» ءومىر سۇرۋگە ابدەن بوي الدىردى. ساۋاتتى ماقساتپەن نەمەسە قاتتى مۇقتاجدىقتان الىنعان قارىز بولسا, قۇبا-قۇپ. بىركۇندىك ماقتان مەن ءبىر جايىلاتىن داستارقان ءۇشىن, «جۇرتتان ۇيات بولماس ءۇشىن» قوماقتى قارىز الىپ, سونىڭ سالدارىنان اجىراسىپ جاتقاندار قانشاما؟ قازىر ءتىپتى كورپەمىزگە قاراي كوسىلمەي, شەتەلدەرگە بارىپ دەمالۋ ءۇشىن دە قارىز الاتىن بولدىق. ءجون-جوسىقسىز قارىز ادامدى رۋحاني تاۋەلدىلىككە الىپ كەلەدى. ءبىر سوزبەن ايتقاندا, قارىز – تىعىرىققا تىرەلۋدىڭ باسى. ازاماتتار وسىنى تەرەڭنەن زەردەلەسە يگى», دەيدى قارجى ساراپشىسى ماناپ توقتىشاقوۆ.
الماتى
