قورعاس قاقپاسىنا باراتىن جولدىڭ داڭعىل بولعانى ەلىمىز ءۇشىن ەرەكشە ماڭىزدى. سەبەبى ەكى ەل اراسىندا ساۋدا-ساتتىق جاسايتىن اعايىن دەمالىس سايىن قىتاي شەكاراسىن كۇزەتەدى. سوندىقتان اۆتوموبيل جولى قاي كەزدە دە ەلدىڭ ينفراقۇرىلىمىنىڭ ماڭىزدى بولىگى. مۇنداي نەگىزگى ارتەريالار جەرگىلىكتى تۇرعىنداردىڭ عانا ەمەس, كوپتەگەن ءتۋريستىڭ دە كەدەرگىسىز قوزعالىسىنا ىقپال ەتىپ, سونىمەن قاتار ەكونوميكانىڭ دامۋىنا, باسقا ايماقتارمەن بايلانىستى نىعايتۋعا وڭ اسەرىن تيگىزەدى. بۇل رەتتە شەكارالاس پانفيلوۆ اۋدانى دا وسى يگى ۇردىستەن تىس قالعان جوق.
ءوڭىر اكىمى ءباسپاسوز قىزمەتىنىڭ مالىمەتىنشە, ۇزىندىعى 32 كم بولاتىن «جاركەنت – قورعاس» جولى ۋچاسكەسى پانفيلوۆ اۋدانىنىڭ قىرىققۇدىق, اقكەنت, اۆات, اتامەكەن اۋىلدارى ارقىلى وتەدى. بۇل جول وتكەن عاسىردىڭ 60–70-جىلدارىندا سالىنعاندىقتان, كەيىنگى جىلدارى كولىك جۇرگىزۋشىلەر مەن جەرگىلىكتى تۇرعىندارعا ءبىرشاما جايسىزدىق تۋعىزعان ەدى. بۇل رەتتە تۇرعىندار جوندەۋ جۇمىستارىنىڭ باستالعانىن قۋانا قۇپ الىپ, قۇرىلىسشىلارعا بارىنشا قولداۋ كورسەتتى. قۇرىلىس جۇمىستارى وسى جىلدىڭ شىلدە ايىندا باستالىپ, بەلگىلەنگەن مەردىگەر ۇيىمنىڭ جول جوندەۋشىلەرى جەتىسۋ وبلىسى «قازاۆتوجول» ۇك» اق فيليالىنىڭ تاپسىرىسىمەن جۇمىستاردى بەس ايدىڭ ىشىندە اياقتادى.
ء«وڭىردىڭ ينفراقۇرىلىمىن دامىتۋ, جولداردىڭ ساپاسىن كوتەرۋ ماقساتىندا بيىل قورعاس اۋىلىنان جاركەنت قالاسىنا اپاراتىن ەسكى جولعا ورتاشا جوندەۋ جۇرگىزدىك. جوبا اياسىندا جاڭا ەكىقاباتتى اسفالت توسەۋ ەسەبىنەن جول توسەمىنىڭ ساپاسى جاقساردى. جول بويىنداعى ەلدى مەكەندەردە تروتۋار توسەلدى, جارىقتاندىرۋ, جاڭا جول بەلگىلەرى مەن اقپاراتتىق پانەلدەر ورناتىلدى, جول قوزعالىسىنىڭ قاۋىپسىزدىگىن قامتاماسىز ەتەتىن بەلگىلەر قويىلدى», دەيدى «قازاۆتوجول» اق وبلىستىق فيليالىنىڭ ديرەكتورى نۇرحات اقىلتاەۆ.
جولدىڭ اشىلۋ راسىمىنە قاتىسقان اۋىل تۇرعىندارى العىسىن ءبىلدىردى. ۇلكەنشىعان اۋىلدىق وكرۋگى قوعامدىق كەڭەسىنىڭ توراعاسى تويلىباي دومباعۇلوۆ «جاركەنت – قورعاس» جولىنىڭ ۇزىنا بويىنا تروتۋارلار, جاياۋ جۇرگىنشىلەر وتكەلدەرى, جارىقتاندىرۋ جاسالعانى اۋىل تۇرعىندارىنا قولايلى جاعداي تۋعىزعانىن اتاپ ءوتتى. ونىڭ ايتۋىنشا, جول ساپاسىن كۇن سايىن كولىگىمەن ءارلى-بەرلى ساپارلايتىن جاركەنت جۇرگىزۋشىلەرى دە وڭ باعالاپ وتىر.
جالپى, وبلىس اۋماعىندا رەسپۋبليكالىق ماڭىزى بار اۆتوجولداردى قايتا جاڭعىرتۋعا باعىتتالعان ءىرى جوبالار ىسكە اسىرىلىپ جاتىر. رەسپۋبليكالىق ماڭىزى بار ء«ۇشارال – دوستىق» جولى پايدالانۋعا بەرىلدى. جۋىردا «تالدىقورعان – ءۇشارال» اۆتوجولىن قايتا جاڭارتۋ اياقتالادى, ونداعى جۇمىستار 98%-عا ورىندالدى, نىساندى تولىق اياقتاۋ 2024 جىلدىڭ سوڭىنا جوسپارلانعان. سونداي-اق رەسپۋبليكالىق ماڭىزى بار «سارىوزەك – كوكتال», «ايدارلى – كوكتال» اۆتوجولدارىندا جوندەۋ جۇمىسى جۇرگىزىلىپ جاتىر.
بيىل وبلىستىق ماڭىزى بار اۆتوموبيل جولدارىن دامىتۋعا 24,9 ملرد تەڭگە ءبولىندى. بۇل قاراجاتقا 29 جوبا ىسكە اسىرىلادى, ونىڭ اياسىندا 193,4 كم جول جوندەلەدى. وسىلايشا, 2024 جىلدىڭ سوڭىنا قاراي جاقسى, قاناعاتتانارلىق جاعدايداعى جەرگىلىكتى اۆتوموبيل جولدارىنىڭ ۇلەسىن 94%-عا جەتكىزۋ جوسپارلانىپ وتىر.
جەتىسۋ وبلىسى
