يندۋستريالىق پارك اۋماعىندا پرەمەر-مينيسترگە استانانىڭ الەۋمەتتىك-ەكونوميكالىق دامۋى تۋرالى باياندالدى. قالا اكىمىنىڭ ورىنباسارى ەۆگەني گلوتوۆ ءبىرىنشى جارتىجىلدىقتىڭ قورىتىندىسى بويىنشا استانانىڭ ءجوو كولەمى 5,5 ترلن تەڭگەگە جەتىپ, وتكەن جىلعى كورسەتكىشتەن 7%-عا اسىپ تۇسكەنىن حابارلادى. جالپى وڭىرلىك ءونىم قۇرىلىمىندا شاعىن جانە ورتا بيزنەستىڭ ۇلەسى 72%-دى قۇرايدى. بيىلعى 10 ايدا استاناعا شامامەن 1,3 ترلن تەڭگە ينۆەستيتسيا تارتىلدى. بۇل رەتتە ونەركاسىپتىك ءوندىرىس كولەمى 2023 جىلمەن سالىستىرعاندا شامامەن 7%-عا ءوستى.
ۇكىمەت باسشىسى 7,5 مىڭ شارشى مەتر اۋماقتا ورنالاسقان «Digital System Service» جشس زاۋىتىنىڭ وندىرىستىك تسەحتارىن ارالاپ كوردى. تەلەكوممۋنيكاتسيا جابدىقتارىن, ونىڭ قاتارىندا مودەمدەردى, كوممۋتاتورلاردى, باعدارلاۋىشتاردى, تەلەفون اپپاراتتارى مەن ۇيدە, كەڭسەدە جانە ونەركاسىپتىك پايدالانۋعا ارنالعان ستانسالاردى شىعارۋ جولعا قويىلعان. زاۋىتتا باعدارلامالىق جاساقتامانى ازىرلەۋدەن باستاپ دايىن ءونىمدى جيناۋعا جانە وراۋعا دەيىن ءوندىرىستىڭ تولىق تسيكلى جۇزەگە اسىرىلادى. پرەمەر-مينيسترگە جاڭعىرتۋدان كەيىن كاسىپورىننىڭ قۋاتى جىلىنا 720 مىڭ بىرلىككە دەيىن وسكەنى, ونىڭ كولەمىن 805 مىڭ قۇرىلعىعا دەيىن ۇلعايتۋ مۇمكىندىگى تۋرالى باياندالدى. 2005 جىلى اشىلعان ساتتەن باستاپ زاۋىتتى دامىتۋعا سالىنعان ينۆەستيتسيانىڭ جالپى سوماسى شامامەن 4,5 ملن دوللاردى قۇرادى. بۇگىندە ءوندىرىس 100 قىزمەتكەردى تۇراقتى جۇمىسپەن قامتاماسىز ەتىپ وتىر.
ولجاس بەكتەنوۆ يمپورتقا تاۋەلدىلىكتى ازايتۋ جانە جوعارى تەحنولوگيالىق ءونىمنىڭ ەكسپورتىن ۇلعايتۋ ماقساتىندا جاعداي جاساۋ ءۇشىن مۇنداي وندىرىستەردىڭ ماڭىزىن اتاپ ءوتتى. قازىرگى ۋاقىتتا «Digital System Service» تاۋارلار جەلىسى ەل نارىعىندا كەڭىنەن ۇسىنىلعان. كومپانيانىڭ دامۋ جوسپارىندا شەتەلدىك نارىققا شىعۋ قاراستىرىلعان, ونىڭ ىشىندە وزبەكستان, ازەربايجان, قىرعىزستان, رەسەي, اراب ەلدەرى بار.
امەريكالىق Wabtec كومپانياسىنىڭ ينۆەستيتسيالىق جوباسى ارقىلى ولجاس بەكتەنوۆ تەمىرجول ماشيناسىن جاساۋ سالاسىنىڭ دامۋىمەن تانىستى. «لوكوموتيۆ قۇراستىرۋ زاۋىتى» ماگيسترالدىق تەپلوۆوزداردى قۇراستىرۋ كاسىپورنى جىلىنا 120 بىرلىككە دەيىن شىعارادى. ءوندىرىس باستالعاننان بەرى بارلىعى 611 لوكوموتيۆ جينالدى. كومپانيا پرەزيدەنتى مارات تىلەۋباەۆ ۇكىمەت باسشىسىنا زاۋىتتا بارلىق نەگىزگى قۇراستىرۋ توراپتارى يگەرىلگەنىن, لوكاليزاتسيا دەڭگەيى بۇگىندە 75%-عا جەتكەنىن باياندادى. جوباعا سالىنعان ينۆەستيتسيانىڭ جالپى سوماسى – 30 ملرد تەڭگە. كاسىپورىندا 742 جۇمىس ورنى اشىلعان.
پرەمەر-مينيستر تەمىرجول ماشيناسىن جاساۋدى دامىتۋعا, جاڭا وندىرىستىك جانە سەرۆيستىك وبەكتىلەردى قۇرۋعا ينۆەستيتسيالاردىڭ ءوسۋىنىڭ وڭ ۇردىستەرىن اتاپ ءوتتى. مۇنداي جوبالاردى ىسكە اسىرۋ مەملەكەت باسشىسىنىڭ العا قويعان مىندەتىنە سايكەس قازاقستاننىڭ كولىك-لوگيستيكالىق حاب رەتىندە قالىپتاسۋىنا ىقپال ەتەدى.
و.بەكتەنوۆ «Ashina KZ» جشس تىگىن فابريكاسىندا جەڭىل ونەركاسىپتىڭ دامۋىمەن تانىستى. كاسىپورىننىڭ جىلدىق قۋاتى – 24 مىڭ بىرلىك ءونىم. جوبانىڭ قۇنى 1,4 ملرد تەڭگەنى قۇرايدى, 60 جۇمىس ورنى اشىلدى.
سونداي-اق جۇمىس ساپارى بارىسىندا و.بەكتەنوۆ «تاۋ-كەن التىن» جشس اففيناج زاۋىتىندا بولدى. كاسىپورىن جوعارى ساپانى قامتاماسىز ەتە وتىرىپ, التىن مەن باسقا دا باعالى مەتالداردى قوسپالاردان تازارتۋمەن اينالىسادى. زاۋىت تمد-دا تەڭدەسى جوق وزىق اففيناج تەحنولوگيالارى بويىنشا جۇمىس ىستەيدى, بۇل الەمدىك ستاندارتتارعا سايكەس كەلەتىن ونىمدەردى شىعارۋعا مۇمكىندىك بەرەدى. كاسىپورىن ىسكە قوسىلعان ساتتەن باستاپ بارلىعى 336,7 توننا تازارتىلعان التىن جانە 64,2 توننا كۇمىس ءوندىرىلدى. جىلدىق قۋاتى 25 توننا التىن مەن 50 توننا كۇمىسكە جەتەدى. «تاۋ-كەن التىن» جشس ديرەكتورى اينۇر ايدارحانوۆ زاۋىت ەنەرگيا تۇتىنۋ, سۋ مەن جىلۋ شىعىنىن ازايتا وتىرىپ, ESG-قاعيداتتارىن بەلسەندى ەنگىزگەنىن, سونداي-اق كاتاليزاتورلار مەن قالدىقتاردى قايتا وڭدەۋدى دامىتىپ جاتقانىن ايتتى. بۇل شيكىزات بازاسىن كەڭەيتۋگە ءارى نارىقتاعى ۇستانىمدى نىعايتۋعا مۇمكىندىك بەرەدى.
پرەمەر-مينيستر زاۋىتتىڭ قىزمەتى قازاقستاننىڭ باعالى مەتالداردىڭ الەمدىك نارىعىنداعى ۇستانىمىن نىعايتۋعا ىقپال ەتەتىنىنە توقتالدى. جالپى, مۇنداي وندىرىستىك جوبالار ەل ەكونوميكاسىن ءارتاراپتاندىرۋ جونىندەگى ستراتەگيانى ىسكە اسىرۋدا شەشۋشى ءرول اتقارادى.
«مەملەكەت باسشىسى ەلىمىزدىڭ ونەركاسىپتىك الەۋەتىن تولىق اشۋ مىندەتىن قويدى. بىزدە بۇل ءۇشىن بارلىق مۇمكىندىكتەر مەن قاجەتتى قۇرالدار بار. قولايلى جاعدايلارى بار وسىنداي يندۋستريالىق پاركتەر ونەركاسىپ سەكتورىنىڭ دامۋىنا ىقپال ەتەدى. قازىرگى تاڭدا قازاقستاندا ءارتۇرلى سالالىق باعىتتاعى 14 ارنايى ەكونوميكالىق ايماق جانە 20-دان اسا يندۋستريالىق ايماق جۇمىس ىستەيدى. ءبىز بۇل تاجىريبەنى جالعاستىرامىز ءارى كەڭەيتەمىز. ءبىزدىڭ مىندەتىمىز – جوعارى دەڭگەيدە قايتا وڭدەۋدى دامىتۋ, وتاندىق شيكىزاتتى ءتيىمدى پايدالانۋ جانە قايتا وڭدەۋ, سونداي-اق ءىرى كاسىپورىنداردىڭ اينالاسىندا ساباقتاس وندىرىستەردى قالىپتاستىرۋ. يمپورتقا تاۋەلدىلىكتى تومەندەتىپ قانا قويماي, قوسىلعان قۇنى ايتارلىقتاي جوعارى ونىمدەردىڭ ەكسپورتىن ارتتىرۋ ءۇشىن جاڭا مۇمكىندىكتەر جاساۋ ماڭىزدى», دەدى و.بەكتەنوۆ.
