جوعارىداعى جاعدايدان قۇلاعدار بولعان مەزەتتە ۇيىمداستىرۋشىلار دەرەۋ شاۆقات راحمونوۆقا باسقا قارسىلاس ىزدەۋگە كىرىستى. ولاردىڭ تاڭداۋى يەن گەرريگە ءتۇستى. ول سپورتشى جايىندا ءبىز نە بىلەمىز؟ كۇنى كەشە عانا 27 جاسقا تولعان يەن يرلانديانىڭ شىعىسىنداعى فينگال وڭىرىندە ورنالاسقان پارتمارنوك دەپ اتالاتىن شاعىن عانا ەلدىمەكەندە دۇنيەگە كەلدى. ءاۋ باستا ول بوكسپەن اينالىستى. كەزەكتى ءبىر جارىستا اتىشۋلى كونور ماكگرەگوردىڭ كوزىنە ءتۇسىپ, UFC-ءدىڭ ەكس-چەمپيونى جالىندى جاسقا مما-مەن اينالىسۋعا كەڭەس بەردى. سول جوسپارىن جۇزەگە اسىرۋ جولىندا گەرريگە دزيۋدو مەن گرەپپلينگتى مەڭگەرۋگە تۋرا كەلدى.
ارالاس جەكپە-جەكتەن كاسىپقويلار اراسىنداعى ءوزىنىڭ تۇساۋكەسەر كەزدەسۋىن يەن گەرري 2019 جىلدىڭ 16 اقپانىندا وتكىزدى. سودان بەرگى بەس جىلدان اسا ۋاقىت ارالىعىندا 15 كەزدەسۋ وتكىزگەن ول بارلىعىندا جەڭىسكە جەتتى. سونىڭ سەگىزىندە قارسىلاستارىن نوكاۋتقا جىبەرسە, بىرەۋىندە «قىلعىندىرۋ» ءتاسىلىن قولداندى. تاعى جەتى باسەكەنىڭ شەشىمىن تورەشىلەر شىعاردى. گەرري ءار جىلدارى دجەيمس شيحان, ماتتەو كەليا, ماتەۋش فيگلاك, دجوردج ماكمانۋس, لوۋرەنس ترەيسي, روستەم اكمان, دجەك گرانت, دجوردان ۋيليامس, دەريان ۋيكس, گەيب گرين, سۋن كەنان, دەنيەل رودريگەس, نيل ماگني, دجەفف نيل, مايكل پەيدج سىندى ساڭلاقتاردى سابادى.
يەننىڭ بويى 191 سانتيمەتر, جارتىلاي ورتا سالماقتاعىلاردىڭ اراسىنداعى ەڭ بويشاڭى. UFC رەيتينگىندە جەتىنشى ورىندا تۇرعان يرلانديانىڭ وكىلى وسى كۇنگە دەيىن بۇل ارتىقشىلىعىن وتە ۇتىمدى پايدالانىپ كەلگەن ەدى. ال شاۆقاتپەن قالاي بولاتىنىن 7 جەلتوقساندا وتەتىن جارىستا كورەمىز.
لاس-ۆەگاستاعى جارىستا شاۆقات راحمونوۆ پەن يەن گەرريدەن بولەك, الەشاندرە پانتوجا مەن كايا اساكۋرا, الەكساندر ۆولكوۆ پەن سيريل گان نيك دياز پەن ۆيسەنتە لۋكە, موۆسار ەۆلوەۆ پەن الدجامەين ستەرلينگ, ەنتوني سميت پەن دومينيك رەيەس, كودي ديوردەن پەن دجوشۋا ۆان, مايكل كەزا پەن ماكس گريففين, برايان باتتل مەن رەندي براۋن, كلەي گۋيدا مەن چەيز حۋپەر, تاليسسون تەيشەيرا مەن لۋكاش برجەسكي, ريزۆان كۋنيەۆ پەن مارتين بۋداي, كريس ۋايدمان مەن ەريك اندەرس اراسىنداعى جەكپە-جەكتەردى تاماشالايمىز.
