سۋرەت: regions.vlast.kz
سولتۇستىك قازاقستان وبلىسى ەكونوميكا باسقارماسىنىڭ باسشىسى قۋانىشبەك قاليجانوۆتىڭ مالىمەتىنە سۇيەنسەك, وتكەن جىلدىڭ سايكەس كەزەڭىمەن سالىستىرعاندا قۇرىلىس جۇمىستارى 27,3%-عا, تۇرعىن ءۇي قۇرىلىسى – 22,9%-عا, اۋىل شارۋاشىلىعى – 30,2%-عا, ينۆەستيتسيالار كولەمى – 9,4%-عا, بولشەك ساۋدا 1,2%-عا وسكەن.
اۋىل شارۋاشىلىعىندا ەگىستىكپەن قاتار باسقا ونىمدەردىڭ ارتۋى ون ايدا 30,2% قۇراعان. رەسپۋبليكا بويىنشا بۇل كورسەتكىش 12,7%. الايدا مال شارۋاشىلىعىنداعى ءوسىم ماردىمسىز, بار بولعانى 0,7 پايىز. ءسۇت ءوندىرۋ – 5,6%, جۇمىرتقا 4,9% ارتقان.
مال شارۋاشىلىعى كەنجە قالىپ وتىرعان اۋداندار قاتارىندا قىزىلجار, مامليۋت, ايىرتاۋ اۋداندارى اتالدى. ولار مال باسىن ارتتىرۋدا دا, ەت وندىرۋدە دە وبلىس دەڭگەيىنەن تومەندە قالىپ وتىر. سونىڭ ىشىندە قىزىلجار اۋدانىندا ەت ءوندىرۋ بىلتىردىڭ سايكەس مەرزىمىمەن سالىستىرعاندا 17 پايىزعا قۇلدىراپ كەتكەن. اۋدان اكىمى ساقتاعان سادۋاقاسوۆتىڭ ايتۋىنا قاراعاندا مۇنىڭ باستى سەبەبى برويلەر قۇس فابريكاسىنىڭ جابىلۋىمەن بايلانىستى ەكەن. ء«بىز قازىر باسقا تاۋار وندىرۋشىلەرىمىزدى قولداپ, ەت ءونىمىن ارتتىرۋ جولىندا جۇمىس جۇرگىزىپ جاتىرمىز. جىلدىڭ اياعىنا دەيىن ەت ءوندىرۋ بويىنشا بەلگىلەنگەن مەجەگە جەتىپ قالارمىز», دەدى ول. ال وسى كورسەتكىشى 2023 جىلمەن سالىستىرعاندا 9 پايىزعا ءتۇسىپ كەتكەن مامليۋت اۋدانىنىڭ سايلانعان اكىمى ەلەنا ستەپانەنكو جاعدايدى تەك كەلەسى جىلى تۇزەتۋ مۇمكىندىگى بارىن ايتتى. «بىزدە مال تۇياعىنىڭ ازايۋى بايقالادى. اۋدانداعى اگروقۇرىلىمدارمەن بۇل تاراپتا جۇمىس جۇرگىزىپ جاتىرمىز. كەلەسى جىلى 400 تۇياق مال بورداقىلايتىن شارۋاشىلىققا مەملەكەت تاراپىنان قولداۋ جاسالدى. سونىمەن قاتار قوي-ەشكىنىڭ سانىن ارتتىرىپ, 2 مىڭعا جەتكىزۋ جوسپارىمىزدا تۇر», دەدى ول.
وبلىس اكىمى اۋىل شارۋاشىلىعىنىڭ جالپى ءونىمىن بىلتىرعىمەن سالىستىرعاندا 135-140 پايىزعا ارتتىرۋ مىندەتى بەلگىلەنگەنىن جينالعانداردىڭ ەسىنە سالدى. «ال بىزدە اتالعان اۋداندار بەلگىلەنگەن جوسپاردى ورىنداي الماي وتىر. اۋدان اكىمدەرىنە وسى تاراپتاعى جۇمىستاردى جانداندىرۋ كەرەكتىگى بۇرىن دا ايتىلعان. بىراق ماسەلە سول كۇيىندە شەشىلمەي, كورسەتكىشتەر ارتتا قالىپ وتىر. ءبىزدىڭ وبلىستىڭ ەت ءوندىرۋ جونىنەن اۋتسايدەرلەرى – وسىلار», دەپ وبلىس اكىمى عاۋەز نۇرمۇحامبەتوۆ ارتتا قالعان اۋدان اكىمدەرىنە قاتاڭ ەسكەرتۋ جاسادى.
ون ايلىق مەرزىمدە وبلىستىڭ ونەركاسىپ سالاسى 548,5 ملرد تەڭگەنىڭ ءونىمىن شىعارىپ, بىلتىرعى جىلدىڭ سايكەس مەرزىمىمەن سالىستىرعاندا 113,0% ورىندالۋعا قول جەتكىزگەن. ون ايدا ەكونوميكاعا تارتىلعان مەملەكەتتىك جانە جەكەمەنشىك ينۆەستيتسيا كولەمى 370,6 ملرد تەڭگەنى قۇراپ, 109,4 پايىزعا ارتقان. ال قۇرىلىس جۇمىستارىنىڭ ءوسۋ قارقىنى بىلتىرعىمەن سالىستىرعاندا 27,3 پايىزعا ارتىپ, 147,4 ملرد تەڭگەنىڭ جۇمىسى اتقارىلعان. رەسپۋبليكالىق ورتاشا ءوسىم كورسەتكىشى – 110,2 پايىز. قۇرىلىستىڭ قارقىندى ءوسىمىنىڭ ارقاسىندا 10 ايدا وبلىستا 187 مىڭ شارشى مەتر تۇرعىن ءۇي پايدالانۋعا بەرىلدى. بىلتىرعا قاراعاندا بۇل ءوسىم 22,9 پايىزعا ارتقان.
بولشەك ساۋداداعى ءوسىم دە بىلتىرعىدان اسىپ ءتۇستى. بىلتىر 306 ملرد تەڭگەنىڭ تاۋارى ساتىلسا بيىل ول 330 ملرد تەڭگەگە جەتكەن.
الايدا بيىلعى جىلدىڭ 10 ايىندا مەملەكەتتىك بيۋدجەتتىڭ ورىندالۋ جوسپارى 87,7 پايىز بولىپ وتىر. جوسپاردا بەلگىلەنگەن 174,7 ملرد تەڭگەنىڭ ورنىنا ول 153,3 ملرد تەڭگەگە ورىندالعان. ەسەسىنە جەرگىلىكتى بيۋدجەت 103,3 پايىزعا ورىندالىپ, جوسپارداعى 97,4 ملرد تەڭگەنىڭ ورنىنا 100,6 ملرد تەڭگە تۇسكەن.
سولتۇستىك قازاقستان وبلىسى
