ءسۇت ءونىمى ءوندىرىسىن كوبەيتۋمەن قاتار جاڭا جۇمىس ورىندارىنىڭ اشىلۋى جەرگىلىكتى جۇرت ءۇشىن اق تۇيەنىڭ قارنى جارىلعان قۋانىشقا اينالعان. اۋىلدا قول قۋسىرىپ قاراپ وتىرعان ادام جوق. ەڭبەكاقىلارى ۋاقتىلى ءارى قوماقتى تولەنگەننەن كەيىن تۇگەلگە جۋىق ورتاق ىسكە ءوز ۇلەستەرىن قوسىپ جاتىر. كەيبىر جەرلەردەگىدەي تۋعان جەردىڭ توپىراعىنان ۇدەرە كوشۋ بايقالمايدى. بەلسەندى ءىس-قيمىلدارى ارقىلى ەل ەڭسەسىن كوتەرۋگە سەپتىگىن تيگىزىپ كەلە جاتقان سەرىكتەستىك وڭىردەگى وسى تەكتەس اۋىل شارۋاشىلىعى كاسىپورىندارىنا ەلگە دەگەن جاناشىرلىعىمەن, قامقورلىعىمەن ۇلگى. ەندى وسى تولايىم تابىستى ءسال عانا تاراتىپ ايتالىق. وتكەن جىلى قولعا الىنعان ينۆەستيتسيالىق جوبا كەزەڭ-كەزەڭىمەن جۇزەگە اسىرىلىپ, 400 باس ءىرى قاراعا شاقتالعان فەرمانىڭ قۇرىلىسى اياقتالدى. قۇرىلتايشىلار جوبانى تولىق اياقتاپ شىعۋ ءۇشىن وزدەرىنىڭ 700 ملن تەڭگە قاراجاتىن جۇمسادى. قازىر كومپانيا «كوكشە» الەۋمەتتىك-كاسىپكەرلىك كورپوراتسياسىنان 1 ملرد 87 ملن تەڭگە نەسيە الىپ, ەكىنشى فەرمانىڭ قۇرىلىسىن باستاپ كەتتى. جاڭا فەرما دا 400 باس قارا مالعا لايىقتالعان.
ءوندىرىس ءورىسىنىڭ كەڭەيۋى مال سۇمەسىمەن كۇن كورىپ وتىرعان جەرگىلىكتى جۇرتقا دا پايدالى. تولىمدى تابىسى بار جاڭا جۇمىس ورىندارى اشىلادى. بىرەۋى مال باقسا, بىرەۋى سيىر ساۋىپ, ادال ەڭبەكتەرىمەن الەۋمەتتىك-تۇرمىستىق جاعدايىن جاقسارتادى. قازاقشا ايتقاندا, كادىمگى كۇنكورىس كوزى.
ءسۇت ونىمدەرىن وڭدەۋدى جولعا قويۋ ءۇشىن جاڭا تەحنولوگيانى پايدالانىپ وتىر. ءتورت ت ۇلىك مالدىڭ بابىن تابۋ جەرگىلىكتى جۇرت ءۇشىن تاڭسىق شارۋا ەمەس. ال ءونىمىن وڭدەۋ ايرىقشا ماڭىزدى ماسەلە. بۇرىنعىداي «قويىن قۇرتتاپ, ءسۇتىن ۇرتتاپ» بارعا قاناعات دەپ جۇرە بەرۋگە بولمايدى. بار دۇنيەنى ۇقساتا بىلگەن ءجون. ادىرلى, تاستاق, ءشوبى قۇنارلى ولكە قارا مال ءۇشىن مەيلىنشە قولايلى. ايتسە دە, تىڭعا تۇرەن سالعان انەبىر جىلدارى قۇيقالى ءوڭىردىڭ قۇتى قاشقانى دا شىندىق. سوندىقتان, مال ازىعىن مەيلىنشە تۇرلەندىرىپ, مول دايىنداماي, قىر اسۋ قيىنداي بەرمەكشى. ماسەلەنىڭ ءمانىسىن جاقسى تۇسىنگەن سەرىكتەستىك «سيىردىڭ ءسۇتى تىلىندە» ەكەنىن جاقسى بىلەدى. مال باعۋ ءادىسىن دە عىلىمي نەگىزدە جەتىلدىرىپ, تولىمدى ەتۋدە.
بۇگىنگى كۇنى جوعارى ساپالى ءونىم وڭدەيتىن تۇرىك قۇرىلعىسى الىنباق. جالپى قۇنىنىڭ توقسان پايىزى تولەنىپ تە قويىلدى. وسى ايدىڭ سوڭىنا دەيىن ءسۇت ونىمدەرىن وڭدەيتىن شەتەلدىك قۇرىلعى تولىق جەتكىزىلمەك. 410 باس گەرەفورد اسىل تۇقىمدى سيىرىنا كەلىسىمشارت جاسالدى. العاشقى 30 باس ءىرى قارا جەتكىزىلىپ, كارانتينگە قويىلعان. الداعى جىلدىڭ العاشقى جارتىجىلدىعىندا تولىق جەتكىزىلمەك. وسىلايشا, مال تۇقىمى اسىلداندىرىلىپ, ساپاسى جاقسارتىلا تۇسپەك.
سەرىكتەستىك سەنىمدى قادام جاساۋمەن قاتار الدارىنا بيىك ماقسات تا قويىپ وتىر. ناتيجەگە قول جەتكىزەتىندىگى ءسوزسىز. ويتكەنى سەرىكتەستىك باسشىسى ەرلان الين ىسكەرلىگىمەن تانىلعان ازامات. تاجىريبەلى باسشى اۋىل شارۋاشىلىعىنىڭ جىلىگىن شاعىپ, مايىن ىشكەن مايتالمان مامان عانا ەمەس, سونىمەن بىرگە, تۋعان جەردىڭ ءتۇتىنىن ءتۇزۋ ۇشىرۋعا ايانباي ات سالىسىپ جۇرگەن جاناشىر جان. ەڭبەگىنە قاراي ءۇشىنشى دارەجەلى «ەڭبەك داڭقى» وردەنىمەن جانە بىرنەشە مەدالمەن ماراپاتتالعان, جارقايىڭ اۋدانىنىڭ قۇرمەتتى ازاماتى.
جارقايىڭدىقتار ءۇشىن ەرلان ءاليننىڭ تاباندى ەڭبەگى ادەمى ۇلگىگە اينالعان. بۇل توڭىرەكتە شارۋاشىلىق تۋرالى سۇراي قالساڭىز, حالىقتىڭ دەنى وسى سەرىكتەستىكتى ماقتانا اۋىزعا الارى ءسوزسىز. اۋا رايى كۇرت وزگەرىپ, كەي جىلدارى قىرىن قاباق تانىتسا دا, جۇرتتى جاقسىلىققا باستاپ, ادال ەڭبەككە ۇيىمداستىرىپ, كۇش-قۋات, قاجىر-قايراتىن ءبىر ارنادا توعىستىرا بىلەتىن جانە بولاشاعىن بولجاپ, كەلەشەگىن كەمەل ەتۋگە تىرىساتىن ەڭبەككەر جاننىڭ بەينەسى ناعىز بۇگىنگى كۇننىڭ قاھارمانى كەيپىندە. ءبىر قىزىعى, سەرىكتەستىك باسشىسىنىڭ وتكەنىنە ۇڭىلسەڭىز, ماماندىعى وزگە تاراپتان ەكەن. اۋەلى دەنە تاربيەسىنىڭ مۇعالىمى بولعان, شاڭعى سپورتىمەن بەلسەندى اينالىسقان. اسكەري بورىشىن وتەپ كەلگەننەن كەيىن جاتتىقتىرۋشى بولىپ ەڭبەك ەتكەن. مۇمكىن قيىندىقتان قايىسپاۋ, جول-جونەكەي كەزدەسكەن بوگەسىندى بۇزىپ-جارىپ, العا ۇمتىلۋ سپورتتا قالىپتاسقان مىنەز بە ەكەن؟
اۋەلى «سايان» شارۋا قوجالىعىن قۇرىپتى. مالدى ءوز تولىنەن ءوسىرىپ, قاجەتتى تەحنيكانى جيناقتاعان, ەسكىنى جاماپ-جاسقاعان. ءتورت قۇبىلاسىن تەگىستەگەن سوڭ «تەمىرلان» جاۋاپكەرشىلىگى شەكتەۋلى سەرىكتەستىگىن قۇرعان. بۇگىنگى بوساعاسىنا بەرەكە بىتكەن ۇجىمنىڭ العاشقى باستاۋى وسىلايشا قالىپتاسقان. كەيىن ەرلان قينۋاربەك ۇلى ءىستىڭ كوزىن تابا بىلگەن ىلكىمدىلىگىنىڭ ارقاسىندا شارۋاسىن مىعىمداي تۇسكەن. يگىلىگىن ەل كورىپ وتىر. سەرىكتەستىك ونىمدەرى ساپاسى جاعىنان جوعارى باعالانادى. تۇتىنۋشىلار تاراپىنان وكپە-ناز ايتىلعان ەمەس. شالعايداعى شاعىن اۋىلدىڭ شىرايىن كەلتىرىپ وتىرعان دا وسى. جالعىز ءتورت ت ۇلىك مال عانا ەمەس, تىڭ دالا توسىندە اقىق ءدان دە وسىرەدى. ەگىستىك القابى 45 مىڭ گەكتاردى قۇرايدى. كەشەگى كەڭەس زامانىنداعى ەكى كەڭشاردىڭ جەرى. وسىنشاما جەردى وڭدەۋ ءۇشىن قۋاتتى تەحنيكا, قاجىرلى جۇمىس كۇشى كەرەك ەكەندىگى بەلگىلى. بولاشاقتىڭ جايىن ويلاعان شارۋاشىلىق باسشىسى اۋىل شارۋاشىلىعىنا قاجەتتى تەحنيكانى ءجۇز پايىز جاڭعىرتقان.
«تەمىرلان» سەرىكتەستىگى قازىر بەرى قويعاندا اۋدانداعى, ءارى قويعاندا وڭىردەگى ەتەك-جەڭى كەڭ پىشىلگەن ءىرى اۋىل شارۋاشىلىعى كاسىپورنى ساناتىندا. سەرىكتەستىك ءوز شارۋاسىن ىجداعاتتاۋمەن قاتار, اۋداننىڭ الەۋمەتتىك-تۇرمىستىق جاعدايىنىڭ جاقسارۋىنا كوپ كومەك كورسەتتى. ەلدى مەكەندەردىڭ جولىن جوندەۋگە, ءبىلىم مەن مادەني نىساندارىپ جاڭعىرتۋعا ات سالىسىپ كەلەدى.
بيىل ءتورت بىردەي ينۆەستيتسيالىق جوبانى قولعا الىپ, جۇزەگە اسىرىپ جاتىر. ەگىن شارۋاشىلىعىندا تابىسقا قول جەتكىزۋ ءۇشىن 340 گەكتار القاپتى سۋارمالى ەگىستىككە كوشىرۋ ماقساتىندا يتالياندىق قۇرىلعى ساتىپ العان. جەلىلىك ەلەۆاتورعا ساپاسى مىقتى تۇرىك قۇرىلعىسىن ورناتقان.
سەرىكتەستىك تابىسقا قول جەتكىزۋمەن قاتار, ءوز اۋىلىمەن بىرگە تۇتاس اۋداننىڭ دا احۋالىن جاقسارتۋعا سەپتىگىن تيگىزىپ كەلەدى.
اقمولا وبلىسى,
جارقايىڭ اۋدانى
