جالپى, ەسەپتەگى ەڭ ۇزدىك كومانداعا ماراپاتتى 800 مەترگە جۇزۋدەن 3-ورىن العان «سامۇرىق-قازىنا» باسقارما توراعاسى نۇرلان جاقىپوۆ تابىستادى. ەكىنشى ورىندى «قازمۇنايگاز» كومانداسى يەلەنسە, قولا جۇلدەنى «سامۇرىق-ەنەرگو» قۇراماسى ەنشىلەدى.
«سپارتاكيادا بۇل جاي عانا سپورت ەمەس, ءبىزدىڭ قوعامدىق ءومىر مەن كورپوراتيۆتىك مادەنيەتكە قوسقان ۇلەسىمىز. ارىپتەستەرىمىز سايىستى, باق سىناستى, بىراق سىيلاستىقتان اجىرامادى, ناتيجەسىندە دوستىق جەڭىسكە جەتتى. وسى ورايدا ءىح سپارتاكيادانىڭ سۋپەركۋبوك يەلەرىن قۇتتىقتاپ قويۋعا رۇقسات ەتىڭىزدەر. وتباسىلارىڭىزعا باقىت, باستارىڭىزعا اماندىق تىلەيمىن. بيىكتەرگە بىرگە جەتە بەرەيىك, ەل يگىلىگى جولىنداعى ەڭبەكتەرىڭىز جەمىستى بولسىن!», دەدى جەڭىمپازداردى قۇتتىقتاعان «سامۇرىق-قازىنا» اق-نىڭ باسشىسى.
باس تورەشى پەتر بەلىي مەن ارداگەر سپورتشى سەرىك ابىلعازيەۆتىڭ انت بەرۋ راسىمىنەن باستالعان اۋقىمدى شاراعا 15 كومپانيانىڭ 900-گە جۋىق قىزمەتكەرى قاتىستى. «سامۇرىق-قازىنا» – ەل ەكونوميكاسىنا قوماقتى ۇلەس قوسۋدان تىس, كورپوراتيۆتىك الەۋمەتتىك جاۋاپكەرشىلىككە دە ەرەكشە ءمان بەرەتىن ەلدەگى ەڭ ءىرى جۇمىس بەرۋشى. ونىڭ كومپانيالارى توبىندا بۇگىندە 250 مىڭنان استام ادام قىزمەت ەتسە, ولاردىڭ 230 مىڭى – ءوندىرىس سالاسىنىڭ جۇمىسشىلارى, ال 84 مىڭنان استامى – جاس مامان.
قوردىڭ تەك دەنساۋلىقتى جاقسارتىپ, كورپوراتيۆتىك رۋحتى اسقاقتاتىپ قانا قويماي, كاسىبي شەبەرلىك پەن جۇمىستىڭ تيىمدىلىگىنە دە وڭ اسەر ەتەتىن باستى سپورت شاراسىندا 11 سپورت تۇرىنەن 210 مەدال ساراپقا سالىندى. جوعارىدا اتالعانداردان تىس, سپارتاكياداعا «QazaqGaz» ۇك» اق, «قازاتومونەركاسىپ» اق, «قازاقتەلەكوم» اق, «قازپوشتا» اق, «KEGOس» اق, «تاۋ-كەن سامۇرىق» ۇتك» اق, «Samruk-Kazyna Construction» اق, «Samruk-Kazyna Ondeu» جشس, «سامۇرىق-قازىنا بيزنەس سەرۆيس» جشس, «تۇركىستان» بگق, «PSA» جشس, «Samruk United» قۇراما كومانداسى قاتىستى. ەلىمىزدىڭ جەتەكشى كومپانيالارىنىڭ سپورتشىلارى ەڭ مىقتى اتاعىن ساراپقا سالىپ, جەكە سپورت تۇرلەرى: ۇستەل تەننيسى, شاحمات, توعىزقۇمالاق, قول كۇرەس, ءجۇزۋ, كوماندالىق سپورت تۇرلەرى: شاعىن فۋتبول, ۆولەيبول, باسكەتبول, ارقان تارتۋ, اسىق اتۋ, كيبەرسپورت بويىنشا ءوزارا باق سىنادى.
بەلسەندى ءارى سالاماتتى ءومىر سالتىن ناسيحاتتاپ, ەلىمىزدىڭ بارلىق ايماعىنان «سپورتقا ء«يا!» دە» ۇرانى اياسىندا باس قوسقان ءتۇرلى قىزمەت پەن ءارتۇرلى جاستاعى ەڭبەك ادامدارى ءۇشىن ناعىز مەرەكەگە اينالعان ءدۇبىرلى جارىس بارىسىندا تۇتاس وتباسىلار جانكۇيەرلىك تانىتتى. اتا-اجەلەرى مەن اتا-انالارىنا ەرىپ كەلگەن بالالارعا بولەك, تانىمدىق, ويىن الاڭقايلارى ۇيىمداستىرىلدى. جەڭىستى ساتتەرمەن بىرگە جەڭىلىستىڭ ءدامىن تاتقانداردىڭ دا جۇزىنەن رەنىش بايقالمادى. سەبەبى ءوزارا سىيلاستىعى, بىرلىگى مەن دوستىعى جاراسقان شاراعا قاتىسۋشىلار وزىنەن بۇرىن باسقالار ءۇشىن قۋانىپ, قوشەمەت ءبىلدىردى كومانداسى ءۇشىن بارىن سالىپ, ۇزەڭگىلەستەرىنىڭ ابىرويى مەن نامىسىن قورعاۋدى ويلادى. ونىڭ ۇستىنە, مەملەكەت باسشىسى كەلەسى 2025 جىلدى «جۇمىسشى ماماندىقتار جىلى» دەپ جاريالاعانى ايان.
فارحاد نۇرمۇحامەد,
تەمىرجولشى, ۆولەيبولشى:
«ۇيىمداستىرۋشىلارعا راحمەت ايتامىز. وسىنىڭ ءبارى ەڭبەكتىڭ ارقاسى. كۇنىنە ەكى مەزگىل جاتتىعۋ جاساپ وتىردىق. جەڭىسىمىزگە قۋانىپ جاتىرمىز».
تاتيانا افاناسەۆا,
«سامۇرىق-ەنەرگو» سپورت ادىسكەرى:
ء«بىز سپارتاكياداعا دايىندىققا ناقتى ءبىر ۋاقىتتى بەلگىلەپ, جينالىپ وتىردىق. كوبىنە ول كەشكى ۋاقىت. باسقا ۋاقىت بىزگە ىڭعايسىز. سەبەبى ءبىزدىڭ قىزمەتكەرلەر ءۇش نەمەسە ەكى اۋىسىمدا ەڭبەك ەتەدى».
بالميرا بەكبوسىنوۆا,
«بەساسىق» ويىنىنىڭ تورەشىسى:
«بيىل ويىنشىلارىمىزدىڭ جاقسى دايىندالىپ كەلگەنى بايقالادى. اسىعى الشىسىنان تۇسكەندەردىڭ اراسىندا جاڭا ەسىمدەر كوبەيدى. ۇلتتىق سپورتتى ۇلىقتاعان «سامۇرىق-قازىنا» جارادى».
يۋري نۋشتاەۆ,
«QazaqGaz» سپورتشىسى:
«قول كۇرەستەن 2014 جىلدان باستاپ قاتىسىپ ءجۇرمىن. بۇل سپارتاكياداداعى قارسىلاستارىم وتە مىقتى بولدى. سوندىقتان بيىل ءۇشىنشى ورىن الىپ قالدىم».
بەكجان تۇرتاي,
قتج كيبەرسپورتشىسى:
«سپارتاكياداعا كيبەرسپورت دەگەن سپورتتى قوسقانىنا راحمەت! وسى وتكەن ءۇش كۇن ىشىندە «ەنەرگيا» كۇشتى بولدى».
نۇردانا ساكەنقىزى,
«Samruk united» قۇراماسى:
«سپارتاكيادا وتە كەرەمەت ءوتتى. الداعى ۋاقىتتا دا سپورتپەن شۇعىلدانۋعا زور ىنتا-جىگەر بەرەدى. ءبىز جۇمىستا وتىرعاندا ۋاقىتتىڭ قالاي ءوتىپ جاتقانىن بايقاپ تا ۇلگەرمەيمىز. ال شىن مانىندە سپورت – ءومىرىمىزدىڭ ماڭىزدى بولىگى».
باۋىرجان تولە,
«Qazcloud» فۋتزال قۇراماسىنىڭ مۇشەسى:
«بىزگە بۇل جارىستىڭ ماڭىزى زور. سەبەبى جىل سايىن قاتىسىپ ءجۇرمىز. بۇل ءىس-شارانىڭ ۇيىمداستىرىلۋى دا ءاردايىم جوعارى دەڭگەيدە, بارشاعا قاتتى ۇنايدى. بۇگىنگى جارىسقا ۇلكەن دايىندىقپەن كەلدىك. اپتاسىنا 3 رەت جاتتىعامىز. سول ەڭبەكتىڭ جەمىسىن كوردىك دەپ سەنەمىز».
سپورتتىق جەتىستىكتەردەن باسقا, سپارتاكيادا قايىرىمدىلىق, ەكولوگيالىق باستامالارعا دا سەپ بولدى. ءاربىر قاتىسۋشى مەن جانكۇيەر مەكتەپتەردە ينكليۋزيۆتى كابينەتتەر اشۋعا قاراجات جيناۋعا ۇلەس قوسا الاتىنداي اقپاراتتىق تاقتالاردا ارنايى QR-كودتار ورنالاستىرىلدى. سونىمەن قاتار ۇيىمداستىرۋ القاسى قاتىسۋشىلاردى «تازا قازاقستان» ەكولوگيالىق اكتسياسى اياسىندا قورشاعان ورتاعا قامقورلىق تانىتىپ, تازالىق ساقتاۋعا, پلاستيك ونىمدەردى از قولدانۋعا شاقىردى.
باستى قۇندىلىعى ادام ءومىرى مەن دەنساۋلىعى سانالاتىن قور قاراماعىنداعى كومپانيالار توبىنان تىس, ەل كولەمىندە بۇقارالىق, ينكليۋزيۆتى سپورتتىڭ قارقىندى دامۋىنا قولداۋ كورسەتىپ كەلەدى. وعان دالەل, بۇگىندە بىرىڭعاي قايىرىمدىلىق وپەراتورى – «Samruk-Kazyna Trust» الەۋمەتتىك جوبالاردى دامىتۋ قورى ارقىلى كەيىنگى بىرنەشە جىلدا وڭىردە 40-قا جۋىق قازىرگى زامانعى سپورت كەشەنى مەن ويىن الاڭى سالىنىپ, بۇقارالىق سپورتپەن 90 مىڭنان استام تۇرعىن, ونىڭ ىشىندە اۋىل جاستارى قامتىلدى.
الدابەرگەن كەمپىرباي
