ءيا, نەگىزى مۇنى كەز كەلگەن كاسىبي پەداگوگ تەرەڭ تۇسىنەدى. الايدا كەيدە سول ىزدەنىستە جۇرگەن جاننىڭ ءوزى قولداۋعا مۇقتاج بولادى. بۇل – ەڭ الدىمەن كاسىبي قولداۋ. ءبىز «ورلەۋ» ۇلتتىق بىلىكتىلىكتى ارتتىرۋ ورتالىعىنىڭ اتىنان ەرەكشە قاجەتتىلىگى بار بالالارعا ءبىلىم بەرەتىن ينتەرناتتار, مەكتەپتەر, وڭالتۋ ورتالىقتارىنىڭ پەداگوگتەرىنە, پەداگوگ-اسسيستەنتتەرگە پسيحولوگيالىق-پەداگوگيكالىق جاعىنان قولداۋ كورسەتەمىز. سونىمەن قاتار ينستيتۋتىمىزدا تەوريالىق تۇرعىدا باعىت-باعدار بەرسەك, كەيىن رەسۋرستىق مەكتەپتە سول العان ءبىلىمى مەن جيعان تاجىريبەسىن ءىس جۇزىندە قالاي قولدانۋ كەرەگىن ايتىپ, 10 كۇن بويى تاڭنان كەشكە دەيىن تاجىريبەلىك دارىستەر وتكىزەمىز. وسىعان قوسا اۋدانداردان كەلگەن تىڭداۋشىلارعا قالاداعى مەكتەپتەردى ارالاتىپ, وزىنە قاجەتتى, ءوزى جۇمىس ىستەيتىن سالاعا ساي ارنايى مامانداردىڭ – دەفەكتولوگتەر, لوگوپەدتەر, پەداگوگ-اسسيستەنتتەردىڭ ساباعىنا قاتىستىرىپ كەرەگىن ۇيرەنۋگە مۇمكىندىك بەرەمىز. سودان سوڭ وسىنداي تولىق تەوريالىق, ودان ءارى پراكتيكالىق كۋرستان وتكەندەر ەڭبەك ەتەتىن ۇيىمىنا بارىپ ءبىلىمىن, تاجىريبەسىن وزگە ارىپتەستەرىنە بولىسەدى. سونداي ساتتە ءبىز سول كۋرسىمىزدى بىتىرگەن مامانداردى كۋرستان كەيىنگى قولداۋعا كوشەمىز. مۇنداي قولداۋدى الۋ ءۇشىن ماماندار ارنايى سايتقا تىركەلىپ, كۋرستىق جۇمىس وتكىزىپ, اشىق ساباقتارىن جۇرگىزۋگە قاتىستى تولىققاندى قولداۋ الا الادى, سوڭىندا ەسەبىن تاپسىرادى. سايت ارقىلى وسىنداي كۋرستان وتكەن پەداگوگتەر وزدەرىنىڭ اشىق ساباقتارىنىڭ ۆيدەولارىن جۇكتەپ, ءوزارا پىكىر الماسىپ, رەسپۋبليكا كولەمىندەگى ارىپتەستەرىمەن كەڭىنەن تالقىلاي الادى.
ەكىنشى – ارىپتەس رەتىندە جاناشىرلىق تانىتىپ, پسيحولوگيالىق تۇرعىدان قولداۋ. شىندىعىندا قولداۋدىڭ بۇل ءتۇرى ءبىرىنشى ايتىلماعانىمەن, وتە ماڭىزدىسى. ويتكەنى شىنايى بىلگەنىن ايتۋ, ءبولىسۋ, ءوزىنىڭ بىلگەنىن ارىپتەسىنىڭ دە بىلگەنىن قالاۋ, پسيحولوگيالىق قولداۋ ءدال وسى جاناشىرلىقتان تۋادى. سول سەبەپتى ءبىز وسى ماسەلەنى ءوزىمىز دە ۇمىتپاۋعا تىرىسامىز ءارى كۋرس وقىتاتىن ارىپتەستەردىڭ دە, كۋرس وقۋعا كەلگەن تىڭداۋشىلاردىڭ دا ەسىنە سالىپ وتىرامىز. ءبارىمىز بىلەتىندەي, دامۋى قالىپتى بالانىڭ وزىمەن جۇمىس ىستەۋ – وڭاي ەمەس, ال پسيحولوگيالىق نەمەسە فيزيولوگيالىق, ءتىپتى پسيحيكالىق جاعىنان قانداي دا ءبىر كەشەۋىلدەۋى, بۇزىلىسى بار بالامەن جۇمىس ىستەۋ – پەداگوگتەن ادەتتەگىگە قاراعاندا ەكى ەسە كوپ كۇش-جىگەردى, ىزدەنىستى, كاسىبيلىكتى قاجەت ەتەدى. سوندىقتان دا ەرەكشە بالالارمەن جۇمىس ىستەيتىن پەداگوگتەرگە ەرەكشە قولداۋ كەرەك.
ايگۇل قوزباحوۆا,
«ورلەۋ» باقو اق فيليالى قىزىلوردا وبلىسى بويىنشا كاسىبي دامۋ ينستيتۋتى كافەدراسىنىڭ اعا وقىتۋشىسى
