«Astana Hub» ۇيىمداستىرعان جوباعا بارلىعى 250 ءوتىنىم ءتۇسىپ, 50 قاتىسۋشى ىرىكتەۋدەن وتكەن. ولار ءتورت ايلىق قارقىندى وقىتۋ اياسىندا يدەيا مەن كوماندا قۇرۋدان باستاپ, نارىققا باعىتتالعان ستارتاپ ازىرلەۋگە دەيىنگى ۇدەرىستەردى مەڭگەرگەن. ناتيجەسىندە, 21 ستارتاپ قۇرىلىپ, ولاردىڭ 9-ى باعدارلامانى ءساتتى اياقتادى. ال ۇزدىك جەتى كوماندا «Seed Money» باعدارلاماسى اياسىندا قارجىلاندىرۋعا يە بولدى.
«AI'preneurs» تۇلەكتەرى قىسقا ۋاقىتتىڭ ىشىندە ماڭىزدى ناتيجەلەرگە قول جەتكىزدى. ماسەلەن, «SalesFlow» شاعىن جانە ورتا بيزنەسكە ليدتەردى باسقارۋ مەن ساتىلىم ۇدەرىستەرىن وڭتايلاندىرۋعا كومەكتەسەتىن جي پلاتفورماسىن ازىرلەدى. «Salyq.AI» جەكە تۇلعالارعا سالىق دەكلاراتسيالارىن تولتىرۋدى جەڭىلدەتۋگە ارنالعان بوت جاساپ, سالىق ەسەپ-قيسابىن اۆتوماتتاندىرۋدى ۇسىنسا, «Qural.AI» كومپانيالاردىڭ HR بولىمدەرىنە قىزمەتكەرلەردىڭ ونىمدىلىگىن ارتتىرۋعا باعىتتالعان جاساندى ينتەللەكت نەگىزىندەگى جوبا جاسادى. «Skideo» فۋتبول كلۋبتارى مەن اكادەميالارىنا ارنالعان پلاتفورماسىن ۇسىنىپ, ويىنشىلار تۋرالى مالىمەتتەردى تالداۋدا جوعارى ناتيجەگە قول جەتكىزدى. ال «Re:create Video» الەۋمەتتىك جەلىلەردەگى ترەندتەردى تالداپ, تەز تارالاتىن كونتەنت جاساۋعا كومەكتەسەتىن پلاتفورما. ول دايىن يدەيالار مەن قۇرالداردى ۇسىنا وتىرىپ, بلوگەرلەر مەن بيزنەسكە وقىرماندارىن كوبەيتۋگە مۇمكىندىك بەرەدى.
«AI'preneurs» باعدارلاماسى IT ماماندارىن دايارلاۋدىڭ جوعارى دەڭگەيىن عانا ەمەس, ەلدىڭ جاساندى ينتەللەكت سالاسىنداعى الەۋەتىنىڭ زور ەكەنىن دە دالەلدەدى. قاتىسۋشىلار باعدارلامانىڭ اياسىندا مەنتورلىق قولداۋعا, تەحنوپارك ينفراقۇرىلىمىنا, حالىقارالىق سەرىكتەستىكتەرگە قول جەتكىزىپ, ءوز ستارتاپتارىن جەتىلدىرۋگە مۇمكىندىك الدى. اكسەلەراتسيا ۇدەرىسىندە جەتەكشى ترەكەرلەر ەۆگەني فرولوۆ پەن نيكولاي تيان ماڭىزدى ءرول اتقاردى. ولار ستارتاپتارمەن تىعىز جۇمىس ىستەپ, جوبالاردىڭ ءار كەزەڭىن مۇقيات قاداعالاپ وتىرعان. اپتا سايىنعى بوردميتينگتەردە گيپوتەزالاردى تالداپ, قاتىسۋشىلارعا ناقتى باعىت-باعدار بەرىپ, ولاردىڭ يدەيالارىن ىسكە اسىرۋىنا جان-جاقتى قولداۋ كورسەتتى.
«Astana Hub» باس ديرەكتورى ماعجان ماديەۆ «AI'preneurs» باعدارلاماسىنىڭ ماڭىزىن اتاپ ءوتتى. ونىڭ ايتۋىنشا, جوبا ەلىمىزدىڭ تەحنولوگيالىق ەكوجۇيەسىنە سەرپىن بەرىپ, جاساندى ينتەللەكت سالاسىندا جاھاندىق دەڭگەيدەگى تابىستارعا جەتۋگە مۇمكىندىك اشادى. العاشقى تۇلەكتەردىڭ جەتىستىگى باعدارلامانىڭ دۇرىس باعىتتا دامىپ كەلە جاتقانىن كورسەتەدى.
«AI'preneurs» – ەلىمىزدەگى جاساندى ينتەللەكت سالاسىنداعى ستارتاپتاردى دامىتۋعا ارنالعان العاشقى بىرەگەي باعدارلاما. مۇندا جوبالار نولدەن باستالىپ, قىسقا ۋاقىتتىڭ ىشىندە تاماشا ناتيجەلەرگە قول جەتكىزەدى. العاشقى تۇلەكتەردىڭ ناتيجەسى وتە جوعارى بولدى: «AI CARD» ستارتابى ەلوردالىق اۋرۋحانالاردا ءوز شەشىمدەرىن ەنگىزسە, «AVM.AI» ءىرى كومپانيالارمەن كەلىسىمشارت جاساسىپ, جۇمىس ىستەيتىن MVP-ءدى 30-دان استام پايدالانۋشى اراسىندا ءساتتى سىناقتان وتكىزىپ, فرانتسيا مەن اقش-تاعى داتا-ورتالىقتار اراسىندا 1 ميلليارد پارامەترى بار ۇلگىنى وقىتتى. «Chat Insider AI» قاراپايىم يدەيادان باستالىپ, بۇگىندە جۇمىس چاتتارىن تالداۋعا ارنالعان قىزمەتىن قازاقستاندىق جانە ەۋروپالىق كليەنتتەرگە ۇسىنىپ وتىر, ال «KAFTAN» تۇركى تىلدەرىن مەڭگەرۋگە ارنالعان يننوۆاتسيالىق ادىستەردى ۇسىنىپ, جاڭا باعىتتاردى دامىتىپ جاتىر. ءبىز باعدارلامانى كەڭەيتىپ, ودان دا كوپ تالانتتى مامانداردى تارتۋدى جوسپارلاپ وتىرمىز. «AI'preneurs» اياسىندا قۇرىلعان جوبالار جاھاندىق تابىستارعا جەتىپ, تەحنولوگيالىق دامۋعا ۇلكەن ۇلەس قوسادى دەپ سەنەمىن», دەدى م.ماديەۆ.
ايتا كەتەيىك, الداعى ۋاقىتتا «Astana Hub», «AI'preneurs» باعدارلاماسىن جالعاستىرىپ, تالانتتى مامانداردىڭ ەكىنشى لەگىن قابىلداۋدى دايىندالىپ جاتىر.
