باسپاسوزگە جازىلۋ – ساياسي ناۋقان. بۇرىندارى قىزمەت ورايىمەن 10–15 ءتۇرلى گازەت-جۋرنالعا جازىلاتىنبىز. باعالارى دا قالتاعا سالماق سالمايتىن. قازىرگى باسىلىمداردى دا سونشالىقتى قىمبات دەي الماساق كەرەك, تەك ولارعا دەگەن ىنتا-ىقىلاس بولسا, جەتىپ جاتىر.
جىل سايىن جاز بەن كۇز ايلارىندا «قازپوشتا» مەكەمەسىنە ارنايى بارىپ, ءوزىم قالاعان باسىلىمدارعا جازىلامىن. رەسپۋبليكالىق «Egemen Qazaqstan», وبلىستىق «وڭتۇستىك قازاقستان», اۋداندىق «سوزاق ءۇنى» گازەتتەرىن مىندەتتى تۇردە الدىرىپ وقيمىن. وقىپ قانا قويماي, داعدىلى ادەتىمە باسىپ, ارا-تۇرا ءوزىمدى تولعاندىرىپ جۇرگەن ماسەلەلەرگە قاتىستى قالام تارتىپ قوياتىنىم بار.
ءبىر وكىنىشتىسى سول, جۇرت گازەت-جۋرنال وقۋدان قالىپ بارادى. وعان سەبەپ: ينتەرنەت, الەۋمەتتىك جەلى, اقپارات تاراتاتىن ءتۇرلى قۇرال دا ءوزىنىڭ ەلەۋلى اسەرىن تيگىزەدى. ونىڭ ۇستىنە قازىر بۇقارالىق اقپارات قۇرالدارىنىڭ ورنىنا بۇقارالىق كوممۋنيكاتسيا دەگەن ۇعىم ومىرگە كەڭىنەن ەنىپ, جەدەل بەلەڭ الا باستادى. دەسەك تە باسىلىمدارىمىز تاريحىمىز بەن مادەنيەتىمىزدى, الەۋمەتتىك-رۋحاني باعىتتاعى ۇلتتىق قۇندىلىقتارىمىزدى ۇرپاقتان-ۇرپاققا جەتكىزەتىن نەگىزگى قۇرال ەكەنى داۋسىز.
ءسوزىمدى قورىتا كەلە ايتايىن دەگەنىم, گازەت-جۋرنالعا جەتەتىن دۇنيە جوق. سەبەبى, ودان ىزدەگەن ادام ءبارىن تابادى. الەۋمەتتىك-رۋحاني ازىق دەگەنىمىز, مىنە, وسى!
گازەت ەڭ الدىمەن قوعامعا, وندا تۇراتىن ادامدارعا كەرەك. شۇكىرشىلىك, اينالامىزدا ءالى دە كوزى اشىق, كوكىرەگى وياۋ ساۋاتتى جاندار بار. ونى از دەسەڭىز, جوعارى دامىعان وركەنيەتتى ەلدەردە دە باسىلىمداردىڭ سان ميلليونداعان تارالىممەن شىعىپ جاتقانىن قايدا قويامىز؟ ەڭ باستىسى, گازەت-جۋرنال الەۋمەتتىك جەلى ەمەس, ولار – رۋحانيات قۇرالى, سولاي بولىپ قالا بەرەدى دە!
ولاي بولسا, گازەت-جۋرنال وقيىق, اعايىن!
كارىباي امزە ۇلى,
ءباسپاسوز سالاسىنىڭ ارداگەرى
تۇركىستان وبلىسى
