ەكسپوزيتسيادا ۇلتتىق كىتاپحانا قورىندا ساقتالعان ەكى مىڭنان اسا قۇندى دەرەكتەر ۇسىنىلدى. ولاردىڭ قاتارىندا سيرەك كەزدەسەتىن كىتاپتار, مەرزىمدى باسىلىمدار, نوتالىق ماتەريالدار, كومپيۋتەرلىك ديسكىلەر مەن كۇيتاباقتار بار. سونداي-اق قۇرمانعازى اتىنداعى قازاق ۇلتتىق كونسەرۆاتورياسى عىلىمي-اقپاراتتىق كىتاپحانا قورىنىڭ قولجازبالارى مەن نوتالىق باسىلىمدارى ەرەكشە نازار اۋدارتتى.
كورمەدە احمەت جۇبانوۆ پەن عازيزا جۇبانوۆانىڭ مەموريالدىق ۇيىنەن اكەلىنگەن ناگرادالار مەن مەدالدار, احمەت جۇبانوۆتىڭ قولدانعان دومبىراسى, كيگەن كيىمدەرى جانە تاريحي فوتوسۋرەتتەرى كورسەتىلدى. سونىمەن قاتار قۇددىس قوجامياروۆتىڭ ساحنالىق كيىمى ۇسىنىلدى.
سونداي-اق ءىس-شارادا قۇرمانعازى اتىنداعى قازاق ۇلتتىق كونسەرۆاتورياسى پروفەسسورلىق-وقىتۋشىلار قۇرامىنىڭ ەڭبەكتەرىنىڭ تۇساۋكەسەرى ءوتتى.
