ونى ءا.بوكەيحان الاش عىلىمي-زەرتتەۋ ينستيتۋتى, «Qyr balasy» قق جانە جوعارى دا اتالعان ءبىلىم ورداسىمەن بىرلەسىپ وتكىزدى. ءىس-شارا اياسىندا «Qyr balasy» قوعامدىق قورى باسىپ شىعارعان كىتاپتاردىڭ تۇساۋى كەسىلىپ, كوپشىلىككە تانىستىرىلدى. ايتالىق, بيىل «الاش كىتاپحاناسى» سەرياسىمەن نۇعىمان ماناي, عازىمبەك ءبىرىمجاننىڭ شىعارمالار جيناعى جانە «جەتىسۋداعى الاش تاريحى: جاركەنت ىزدەرى», «قانىش ساتباەۆ فەنومەنى» زەرتتەۋ ەڭبەكتەرى وقىرمانعا جول تارتتى. سونداي-اق «ۇلتتى وياتقان ۇلى ءسوز» سەرياسىمەن ءاليحان بوكەيحان, احمەت بايتۇرسىن ۇلى, مىرجاقىپ دۋلات ۇلى, حالەل دوسمۇحامەد ۇلى, مۇستافا شوقاي سىندى الاش زيالىلارىنىڭ ناقىل سوزدەرى توپتاستىرىلىپ, جەكە كىتاپشا رەتىندە جارىق كورگەن.
مادەني ءىس-شارا باسىندا ءسوز العان اباي قۇنانباي ۇلى اتىنداعى №87 مەكتەپ-گيمنازياسىنىڭ ديرەكتورى ايگۇل وڭداعانقىزى: ء«بىز وسىنداي ءىس-شارالار ارقىلى مەكتەبىمىزدەگى جاس ۇرپاقتاردىڭ ساناسىنا ۇلتتىق تاربيە ۇعىمىن ءسىڭىرىپ, ولاردىڭ ەلىنىڭ, جەرىنىڭ, ۇلتىنىڭ تاريحى مەن مادەنيەتىن, سالتى مەن ءداستۇرىن جاقسى بىلەتىن ءبىلىم يەلەرى ەتىپ تاربيەلەۋگە قۇلشىنىپ جاتىرمىز. ءبىر سوزبەن ايتقاندا, ءبىزدىڭ ماقساتىمىز – تۇلعا تاربيەلەۋ, قالىپتاستىرۋ», دەدى ول.
ادەبي جيىنعا قايسار ءالىم, ايگۇل سەرىكقىزى, ەربول ەردەمبەك ۇلى, مارات ابسەمەت, شولپان تىلەپينا, ساعىمباي جۇماعۇل, الماس جۇماعالي, قايىربەك كەمەڭگەر, الما سايلاۋقىزى, ت.ب. سىندى الاشتانۋشى – عالىمدار مەن روزا باقتىعاليقىزى, ريزابەك كەمەڭگەر, كاملەت باياحمەت ۇلى سەكىلدى الاش ارداقتىلارىنىڭ ۇرپاقتارى ءسوز الىپ, الاش ارىستارى تۋرالى پاراساتتى وي تولعادى. سونىمەن قاتار اباي مەكتەبىنىڭ وقۋشىلارى مىرجاقىپ دۋلات ۇلى تۋرالى «ازاماتى الاشتىڭ» اتتى قويىلىم قويدى. 11 ء«ا» سىنىپ وقۋشىسى ساياجان ازاماتقىزى م.دۋلات ۇلىنىڭ «قازاق ءتىلىنىڭ مۇڭى» ماقالاسىن, باستاۋىش سىنىپ وقۋشىلارى الاش ارىستارى تۋرالى ولەڭدەردى جاتقا وقىدى. اسىرەسە جاس سۋرەتشى نازەركە بولاتقىزىنىڭ الاش ارىستارىنىڭ ءار كەزدەگى بەينەسىن قىلقالاممەن سويلەتكەن تۋىندىلارى كەشكە قاتىسقان بارشا قاۋىمنىڭ قىزىعۋشىلىعىن تۋعىزدى. مۇنى مەكتەپ وقۋشىلارىنا ۇلتتىق ءتالىم-تاربيە بەرۋدىڭ جاڭاشا جولى دەپ تۇسىنۋگە بولادى.
مازمۇندى ءىس-شاراداعى تاعى ءبىر ەرەكشەلىك – استاناداعى الاش قايراتكەرلەرىنىڭ ەسىمى بەرىلگەن مەكتەپ ديرەكتورلارى مەن مۇعالىمدەرى دە وسى باسقوسۋعا قاتىسىپ, ءوز ويلارىمەن ءبولىستى. «Qyr balasy» قوعامدىق قورىنىڭ پرەزيدەنتى جانبولات ابايحان مەن قۇرىلتايشىسى ەرتاي ءبىلال جاڭا كراۋدفاندينگكە ۇلەس قوسقان ازاماتتارعا كىتاپتار تابىستادى.
«الاش» عىلىمي-زەرتتەۋ ينستيتۋتىنىڭ ديرەكتورى ۇشقىن ءسايدىراحمان «الاش مۇراسىن وقىتۋ – ۇلتتىق تاربيە وزەگى» تاقىرىبىندا بايانداما جاساپ, «مەكتەپتە تىلدىك ورتا قالىپتاستىرۋ, ءىس-شارالاردىڭ قازاق تىلىندە ءوتۋىن نەگىز ەتۋ, ۇلتتىق قۇندىلىقتاردى دارىپتەيتىن ارنايى جوبالار دايىنداۋ, ۇلتتىق مادەنيەتتى تاجىريبەگە ەنگىزۋ, الاش ارىستارىنىڭ اتىن يەلەنگەن مەكتەپتەردىڭ وداعىن قۇرۋ جانە سول مەكتەپتەردىڭ وقۋشىلارى اراسىندا «الاش وليمپياداسىن» وتكىزۋ» اتتى ۇسىنىسىن ورتاعا سالدى.
جيىن سوڭىندا ەربول ەردەمبەك ۇلى مەن روزا باقتىعاليقىزىنا «الاش زيالىسى» مەدالى, شولپان تىلەپينا, كاملەت باياحمەت ۇلى جانە مۇرات ەسكەندىر ۇلىنا «بارلىبەك سىرتتان ۇلى» مەدالى تابىستالدى. بەلسەندى دەمەۋشى ازاماتتاردىڭ اتىنان ۇزدىك 20 وقۋشىعا «الاش ستيپەندياسى» بەرىلدى.
