بولات مۇحامەديەۆ – كىتاپ گرافيكاسى, كەسكىندەمە, ابستراكتسيا, ءمۇسىن, ديزاين, ارحيتەكتۋرا جانە فوتوونەردىڭ ەرەكشە ۇيلەسىمىن ۇشتاستىرا وتىرىپ, زاماناۋي تەحنولوگيالار مەن ءداستۇرلى ونەردى ۇيلەسىمدى بىرىكتىرگەن تالانتتى قىلقالام شەبەرى.
سۋرەتشى ءومىرىنىڭ ماڭىزدى بەلەستەرىن اتاپ وتپەۋ مۇمكىن ەمەس. ول قازاقستان مەن الەمنىڭ كوپتەگەن قالاسىندا ءبىلىم الىپ, شىنايى شەبەرلىك پەن ومىرگە دەگەن ەرەكشە كوزقاراس قالىپتاستىردى. ونىڭ ونەرى ەلىمىزدە عانا ەمەس, حالىقارالىق دەڭگەيدە دە مويىندالعان. كوپتەگەن حالىقارالىق ماراپاتتار مەن 12 ەلدىڭ قۇرمەتتى سۋرەتشىسى مارتەبەسىنە يە, ولاردىڭ ىشىندە 2023 جىلى پاريجدە وتكەن ابستراكتسيونيستەر اراسىنداعى دۇنيەجۇزىلىك بايقاۋدا جەڭىپ العان التىن مەدال ەرەكشە ورىن الادى. سونىمەن قاتار اۆتوردىڭ جەتىستىكتەرى امەريكالىق «Forbes» باسىلىمىندا جاريالانعان.
كورمەدە ۇسىنىلعان ەرەكشە تۋىندىلاردىڭ ءبىرى – تسيفرلىق كەسكىندەمە. بۇل سۋرەتشىنىڭ ونەرگە زاماناۋي تەحنولوگيالاردى ەنگىزۋگە دەگەن ۇمتىلىسىن بىلدىرسە كەرەك. ەكسپوزيتسيا كورەرمەندەردى شىعارماشىلىقتىڭ جاڭا مۇمكىندىكتەرىن اشۋعا شابىتتاندىرىپ, XXI عاسىر ونەرىندە تسيفرلىق تەحنولوگيالاردىڭ بىرەگەيلىگىن ايقىنداۋعا, ءاربىر ادامعا شەبەردىڭ تۋىندىلارىنان «ۋاقىت رەزونانسىن» تابۋعا مۇمكىندىك بەرۋدى كوزدەيدى. كورمە تورىندەگى اۆتوردىڭ 50 شىعارماسى ۋاقىت اعىسىن, ادام كوڭىل كۇيىنىڭ ىشكى ىرعاقتارىن بەينەلەيدى.
كورمەنى اشقان مەملەكەتتىك ورتالىق مۋزەي ديرەكتورىنىڭ ورىنباسارى اننا كۋششەنكو ءوز سوزىندە: «بولات مۇحامەديەۆ – ۋاقىت تالابىنا ساي شىعارماشىلىق شەكارالاردى كەڭەيتىپ, ونەر الەمىندە ءوز ورنىن ايقىنداعان سۋرەتشى. ونىڭ تۋىندىلارى تەرەڭ ويدىڭ, تالعامپاز شەبەرلىكتىڭ, زاماناۋي تەحنولوگيالاردى يگەرۋ قابىلەتىنىڭ كورىنىسى. كورمە سۋرەتشى شىعارماشىلىعىن تانىستىرىپ قانا قويماي, جاڭا مادەني-رۋحاني قىرلاردى اشۋعا مۇمكىندىك بەرەدى ءارى ەلىمىزدىڭ جاس سۋرەتشىلەرىنە ماڭىزدى باعدار بولارى انىق», دەپ اتاپ ءوتتى.
قازاقستان سۋرەتشىلەر وداعىنىڭ توراعاسى ومىربەك جۇبانيازوۆ ءسوز الىپ, ونەردىڭ قوعامداعى ماڭىزى مەن مادەنيەتكە تيگىزەتىن ىقپالى تۋرالى ويلارىمەن ءبولىستى. ول سۋرەتشىلەر وداعى تاراپىنان اۆتورعا «بەينەلەۋ ونەرىنە سىڭىرگەن ەڭبەگى ءۇشىن» مەدالىن تاقتى.
اتاپ وتەر بولساق, ب.مۇحامەديەۆ گەرمانيا, بولگاريا, چەحوسلوۆاكيا, پولشا, تۇركيا, جاپونيا ەلدەرىندە كىتاپ-جۋرنال ونەرى سالاسىندا 6 حالىقارالىق سىيلىققا يە بولعان. 1992–2023 جىلدار ارالىعىندا ول 11 تاقىرىپتىق ستەلا مەن 50-دەن استام شاعىن ارحيتەكتۋرالىق فورما جاساپ, بەس ارحيتەكتۋرالىق جوبانى ازىرلەگەن. ء«بىلىم جانە ەڭبەك» جۋرنالىندا جۇمىس ىستەگەن جىلدارى سۋرەتشى 24 مۇقابانى يلليۋستراتسيالاپ, «قازاقستان» باسپاسىندا ءارتۇرلى جانرداعى 300-دەن استام كىتاپتى كوركەمدەگەن, ولاردىڭ ىشىندە بالالارعا ارنالعان, عىلىمي-كوپشىلىك, كوركەم جانە اۋىلشارۋاشىلىق ادەبيەتتەرى بار.
الماتى
