پرەزيدەنت قازاقستان مەن رەسەيدىڭ ساياسي ىنتىماقتاستىعى مەن ەكونوميكالىق سەرىكتەستىگى جوعارى دەڭگەيدە ءوربىپ جاتقانىنا كەڭىنەن توقتالدى.
ايتا كەتەيىك, قازىر قازاقستاندا رەسەيدىڭ 23 مىڭ كومپانياسى تابىستى جۇمىس ىستەپ جاتىر. ونىڭ 4 مىڭى سوڭعى ءبىر جىلدىڭ ىشىندە قۇرىلدى. ەكى ەل اراسىنداعى ىنتىماقتاستىق قارقىنى جوعارى ەكەنى وسىدان-اق بايقالادى.
«ەكىجاقتى ينۆەستيتسيا كولەمى دە ۇلعايا ءتۇستى. 2023 جىلى رەسەي كومپانيالارى قازاقستانعا 3 ميلليارد دوللاردان استام ينۆەستيتسيا سالدى. قازاقستان دا رەسەي ەكونوميكاسىنا وسىنشا مولشەردە قارجى قۇيدى. ەلدەرىمىز بيزنەس جۇرگىزۋگە قولايلى ورتا قالىپتاستىرىپ, ينۆەستورلاردى قولداۋعا قاجەتتى بارلىق جاعدايدى جاساپ وتىر. قازاقستان مەن رەسەي ەنەرگەتيكا, ونەركاسىپ, كولىك-لوگيستيكا, اۋىل شارۋاشىلىعى جانە باسقا دا كوپتەگەن سالادا بىرلەسىپ, اۋقىمدى جۇمىس جۇرگىزىپ كەلەدى. وسىعان دەيىن جالپى قۇنى 18 ميلليارد دوللاردان اساتىن 90-نان استام جوبا ىسكە قوسىلدى. قازىر دە بولاشاعى زور 49 جوبا جۇزەگە اسىرىلىپ جاتىر», دەپ جازدى قاسىم-جومارت توقاەۆ.
وسى ماڭىزدى جوبالاردىڭ ىشىنەن قازاقستاندا 3 جىلۋ ەلەكتر ورتالىعىنىڭ قۇرىلىسى باستالعانىن جانە ەكىباستۇز گرەس-ءىن جاڭعىرتۋ جۇمىستارىن اتاپ وتۋگە بولادى. بۇل قاتاردا قازاقستاننىڭ بىرقاتار ايماعىن گازبەن قامتاماسىز ەتۋگە, سونداي-اق, وڭتۇستىك جانە شىعىس باعىتقا تاسىمالداناتىن رەسەي ەنەرگەتيكا رەسۋرستارىنىڭ كولەمىن ارتتىرۋعا قاتىستى اۋقىمدى باستامالار دا بار.
«استانا مەن ماسكەۋ ەۋرازيا ەكونوميكالىق وداعى اياسىندا تابىستى جۇمىس ىستەپ جاتىر. قازىر بۇل قۇرىلىم ەۋرازيا كەڭىستىگىندەگى ەكونوميكالىق ىقپالداستىقتىڭ ماڭىزدى تەتىگىنە اينالدى جانە حالىقارالىق دەڭگەيدە ابىروي-بەدەلگە يە بولدى», دەلىنگەن «يزۆەستيا» گازەتىندە جاريالانعان ماقالادا.
ەسكە سالايىق, بيىل ەۋرازيا ەكونوميكالىق وداعىن قۇرۋ تۋرالى شارتقا 10 جىل تولدى.
«قازاقستان مەن رەسەي جاھاندىق باسەكەگە قابىلەتىن ارتتىرۋ ءۇشىن اۋەل باستان جان-جاقتى ىقپالداستىق پەن بايلانىستى دايەكتى تۇردە نىعايتۋعا ۇمتىلدى. سول سەبەپتى, بىرلەستىك قۇرۋ تۋرالى باستاما كوتەرىپ, وسى ۇيىمنىڭ نەگىزىن قالادى. سودان بەرى ەۋرازيا ەكونوميكالىق وداعى وعان مۇشە مەملەكەتتەردىڭ ەكونوميكالىق ساياساتىن ينتەگراتسيالاۋ جانە ءوزارا ساۋدا-ساتتىقتى دامىتۋ ۇدەرىسى تابىستى جۇزەگە اسىپ جاتقان اسا ماڭىزدى پلاتفورما رەتىندە ءوزىنىڭ تيىمدىلىگىن كورسەتتى», دەپ جازدى مەملەكەت باسشىسى.
