دەپۋتات ماجىلىستە ەسىرتكى وندىرۋشىلەرىنە جازانى كۇشەيتۋگە باعىتتالعان ماڭىزدى زاڭ جوباسى تالقىلانىپ جاتقانىن جەتكىزدى.
- جازانى ءومىر بويىنا باس بوستاندىعىنان ايىرۋعا دەيىن قاتايتۋ ۇسىنىلدى. بۇل – ادىلەتتى شەشىم. دەپۋتاتتار وسى نورمانى قولداپ داۋىس بەردى. الايدا بۇدان دا كۇردەلى ماسەلە بار: قىلمىسپەن كۇرەسۋى ءتيىس ازاماتتار وزدەرى ەسىرتكى بيزنەسىنە ارالاسقان كەزدە نە بولادى؟ ءبىز قۇقىق قورعاۋ ورگاندارىنىڭ قىزمەتكەرلەرى مەن وزدەرىنىڭ لاۋازىمىن, قىزمەتتىك مۇمكىندىكتەرىن جانە اقپاراتقا قولجەتىمدىلىكتى پايدالانىپ, ەسىرتكى اينالىمىنا قاتىسقان وزگە دە لاۋازىمدى تۇلعالارعا ءومىر بويىنا باس بوستاندىعىنان ايىرۋ جازاسىن ەنگىزۋ تۋرالى ۇسىنىس جاسادىق, – دەپ جازدى اسحات ايماعامبەتوۆ تەلەگرام ارناسىنداعى پاراقشاسىندا.
دەپۋتاتتىڭ پىكىرىنشە, ەگەر ولاردىڭ كىناسى دالەلدەنسە, مۇنداي ارەكەتتەر ەڭ قاتاڭ تۇردە جازالانۋعا ءتيىس.
- سەبەبى بۇل – ازاماتتاردىڭ مۇددەسىنە جاسالعان ساتقىندىق, قوعام سەنىمىنە نۇقسان كەلتىرىپ, ەلدىڭ قاۋىپسىزدىگىنە قاتەر توندىرەدى. مەملەكەت باسشىلىعى ەسىرتكى بيزنەسىمەن جانە ونىڭ تارالۋىمەن كۇرەستى ىمىراسىز جانە جۇيەلى تۇردە جۇرگىزىپ جاتىر. قوعام ءۇشىن ۇلكەن قاۋىپ ءتوندىرىپ وتىرعان وسى ماسەلەنى جويۋعا باعىتتالعان ەسىرتكىگە تاۋەلدىلىكپەن كۇرەس جونىندەگى كەشەندى جوسپار بەكىتىلدى. سونىمەن قاتار, ۇلتتىق قاۋىپسىزدىكتى نىعايتاتىن قوسىمشا شارالار دا قابىلدانىپ جاتىر, – دەپ تۇيىندەدى اسحات ايماعامبەتوۆ.
