فورۋم 2 جىلدا ءبىر رەت وتكىزىلەدى جانە بۇل - قىلمىستىق قۇقىق سالاسىنداعى رەفورمالاردىڭ وزەكتى ماسەلەلەرىن تالقىلاۋعا ارنالعان حالىقارالىق الاڭ. ونىڭ جۇمىسىنا مەملەكەتتىك جانە قۇقىق قورعاۋ ورگاندارىنىڭ باسشىلارى, پارلامەنت دەپۋتاتتارى, ادۆوكاتتار, حالىقارالىق ۇيىمداردىڭ, جوعارى وقۋ ورىندارىنىڭ, ازاماتتىق قوعام وكىلدەرى, سونداي-اق قىرعىزستان, وزبەكستان, تاجىكستان, تۇركىمەنستان, موڭعوليا ساراپشىلارى قاتىستى.
جيىن بارىسىندا جوعارعى سوت توراعاسى اسلامبەك مەرعاليەۆ فورۋمعا قاتىسۋشىلارعا جىلى لەبىزىن بىلدىرە وتىرىپ, قازاقستاندى پروتسەسكە قاتىسۋشىلاردىڭ بارلىعىنىڭ قۇقىقتارىن قۇرمەتتەۋگە جانە قورعاۋعا باعىتتالعان تەڭگەرىمدى جۇيەنىڭ مىقتى جاقتاۋشىسى رەتىندە اتاپ ءوتتى.
سونداي-اق 30 جىل ىشىندە ناقتى باس بوستاندىعىنان ايىرۋعا سوتتالعاندار ۇلەسىنىڭ تۇراقتى تۇردە 60%-دان 38%-عا دەيىن تومەندەگەنىن جانە قوعامنان وقشاۋلاۋمەن بايلانىستى ەمەس بالامالى جازالاردى قولدانۋ تۋرالى مالىمەت بەردى.
سونىمەت قاتار اۋىر جانە اسا اۋىر قىلمىستار ءۇشىن سوتتالعانداردى شارتتى تۇردە مەرزىمىنەن بۇرىن بوساتۋ جانە جازانى اۋىستىرۋ تۋرالى وتىنىشتەردى ەنگىزۋ جوسپارلانىپ جاتقانى ايتىلدى. بۇعان قوسا الدىن الۋ شاراسىن تاڭداۋ كەزىندە اپەللياتسيا ءرولى كۇشەيتىلىپ, ەلەكتروندى بىلەزىكتەردى قولدانۋ كەڭەيدى.
بۇل قازاقستانعا زاڭ ۇستەمدىگى يندەكسىندە 142 ەلدىڭ ىشىندە 65-ورىنعا كوتەرىلۋگە مۇمكىندىك بەرەدى.
ودان كەيىن جوعارعى سوت توراعاسى كاسساتسيالىق سوتتاردى قۇرۋ ماسەلەسىنە دە توقتالىپ, قىلمىستىق پروتسەستە تاراپتاردىڭ جارىسپالىلىعى مەن تەڭ قۇقىقتىلىعىن نىعايتۋ, تەرگەۋ سۋديالارىنىڭ وكىلەتتىكتەرىن كەڭەيتۋ جونىندە ۇسىنىستار ايتتى.
بۇۇ ناشاقورلىقپەن جانە قىلمىسپەن كۇرەس باسقارماسىنىڭ اۋعانستان, ورتالىق ازيا, يران جانە پاكىستان بويىنشا ايماقتىق وكىلى, دوكتور وليۆەر شتولپە ءوز سوزىندە زاڭگەرلەردىڭ كاسىبي قۇزىرەتتىلىگىن ارتتىرۋعا, قوعامنىڭ تۇراقتىلىعىن نىعايتۋعا, سونىڭ ىشىندە ۇيىمداسقان قىلمىس, ەسىرتكى بيزنەسى جانە سىبايلاس جەمقورلىق سىن-قاتەرلەرىنە تاپ بولعان جاستارعا, سونداي-اق ورتالىق ازياداعى ايماقتىق ىنتىماقتاستىقتى كەڭەيتۋگە باعىتتالعان جۇمىستارىن ايتتى.
ونىڭ پىكىرىنشە, ساراپتامالىق فورۋم وسى سالاداعى نەگىزگى قاتىسۋشىلاردى – سۋديالاردى, پروكۋرورلاردى, قۇقىق قورعاۋ ورگاندارىنىڭ قىزمەتكەرلەرىن, ادۆوكاتتاردى, ازاماتتىق قوعام وكىلدەرى مەن حالىقارالىق ساراپشىلاردى بىرىكتىرۋگە بىرەگەي مۇمكىندىك بەرەدى.
فورۋم اياسىندا ءتۇرلى باعىتتار بويىنشا بىرنەشە سەسسيا ۇيىمداستىرىلدى.
