فوتو: ۆەدومستۆو
ءبىلىم بەرۋ سالاسىنداعى ساپانى قامتاماسىز ەتۋ كوميتەتى مەن ونىڭ اۋماقتىق دەپارتامەنتتەرى 2024 جىلدىڭ باسىنان بەرى جۇرگىزگەن مونيتورينگ بارىسىندا 58 مەكتەپتىڭ ءبىلىم بەرۋ قىزمەتىن ليتسەنزياسىز جۇرگىزگەنىن انىقتاعان, بۇگىندە ولاردىڭ 17-ءسى قويىلاتىن تالاپتارعا سايكەستەندىرىلدى. قر اقبتك 463-بابى بويىنشا ايىپپۇل سالۋ تۋرالى سوت قاۋلىلارى شىققان. اتالعان مەكتەپتەر – استانا, الماتى قالالارىندا جانە اتىراۋ, الماتى, باتىس قازاقستان, تۇركىستان, ماڭعىستاۋ, جامبىل وبلىستارىندا ورنالاسقان.
«قر ء«بىلىم تۋرالى» زاڭىنا سايكەس بارلىق مەكتەپ ءبىلىم بەرۋ قىزمەتىن باستاماس بۇرىن رۇقسات الۋى ءتيىس. ليتسەنزيانىڭ بولماۋى مەكتەپتەردىڭ تالاپتارعا سايكەستىگى بويىنشا تەكسەرۋدەن وتپەگەنىن نەمەسە رۇقسات الۋ ءۇشىن قۇجاتتاردى تاپسىرماعانىن بىلدىرەدى. ءبىلىم بەرۋ ۇيىمدارى ءبىلىم بەرۋ قىزمەتىمەن اينالىسۋعا ليتسەنزيا العان ساتتەن باستاپ قانا قۇقىلى. ەگەر مەكتەپ مەملەكەتتىك تىركەۋدەن وتكەن ساتتەن باستاپ التى اي ىشىندە ليتسەنزيا الماسا, وندا ول سوت تارتىبىمەن جابىلۋعا ءتيىس», دەپ اتاپ ءوتتى كوميتەت توراعاسى ەرنۇر داۋەنوۆ.
ۆەدومستۆونىڭ ءباسپاسوز قىزمەتى ناقتىلاعانداي, ليتسەنزيا الۋعا قويىلاتىن نەگىزگى تالاپتار ءتيىستى ماتەريالدىق-تەحنيكالىق بازانىڭ, بىلىكتى پەداگوگيكالىق قۇرامنىڭ بولۋىن, سانيتارلىق-ەپيدەميولوگيالىق جانە ورتكە قارسى نورمالاردىڭ ساقتالۋىن, سونداي-اق ءبىلىم الۋشىلارعا مەديتسينالىق قىزمەت كورسەتۋدى ۇيىمداستىرۋدى قامتيدى. اتالعان تالاپتارعا سايكەس كەلمەۋ اكىمشىلىك جازا قولدانۋ مەن قايتالاما بۇزۋشىلىقتار بولعان جاعدايدا ءبىلىم بەرۋ مەكەمەسىنىڭ قىزمەتىن توقتاتۋ ءۇشىن نەگىز بولىپ سانالادى.
ەستەرىڭىزگە سالايىق, مەكتەپتەر باعىنىستىلىعى بويىنشا جەرگىلىكتى اتقارۋشى ورگانداردىڭ قاراماعىنا جاتادى. ءوز كەزەگىندە اۋماقتىق دەپارتامەنتتەر وڭىرلىك اكىمدىكتەر مەن ءبىلىم باسقارمالارىنىڭ باسشىلارىنا بۇزۋشىلىقتاردى جويۋ جونىندە شارالار قابىلداۋ تۋرالى رەسمي حات جولدادى.
