سۋرەتتى تۇسىرگەن – يگور بۋرگاندينوۆ
اتالعان كومپانيا وسىدان 6 جىل بۇرىن شاعىن ۇن ديىرمەنىن ىسكە قوستى. ودان قاتتى بيدايدىڭ, كۇرىشتىڭ, قارا جانە قىزىل قۇمىقتىڭ, جۇگەرىنىڭ ۇنىن شىعارا باستادى. قازىر مۇنداعى شىققان ۇن ءونىمى ءوز ەلىمىزبەن قاتار, كورشى وزبەك ەلىنىڭ ساۋدا سورەلەرىنەن دە ورىن العان.
كومپانيا بىلتىر «دامۋ-ءوندىرىس» مەملەكەتتىك باعدارلاماسى ارقىلى «قازاقستان حالىق بانكىنەن» 270 ملن تەڭگە نەسيە العان. «دامۋ» قورى نەسيە پايىزىن سۋبسيديالاپ, كەپىلدىك بەرۋ ارقىلى قولداۋ كورسەتىپتى. بۇل قاراجاتتى گليۋتەنسىز ماكارون ونىمدەرىن ءوندىرۋدى باستاۋ ءۇشىن زاماناۋي جابدىق ساتىپ الۋعا جانە كومبينات عيماراتىن سالۋعا جۇمساعان.
«وتكەن جىلدان باستاپ جاڭا جوبا – ماكارون تسەحىن سالۋدى قولعا الدىق. نەگىزى ماكارون ەلىمىزدە ەجەلدەن بەرى كوپ. الايدا گليۋتەنسىز ۇننان جاسالعان ماكارون جوققا ءتان. سوندىقتان مۇنداي ءونىمدى شىعارۋ بويىنشا ەلدە ءبىرىنشى بولىپ تۇرمىز. تسەح عيماراتىنىڭ اۋماعى 330 شارشى مەتردى الىپ جاتىر. ساعاتىنا 200–250 كيلو ماكارون ءوندىرۋ قۋاتىنا يەمىز», دەدى كومپانيانىڭ نەگىزىن قالاۋشى مەدەلبەك اعىباەۆ.
ادەمى قاپتاماعا سالىنعان ءونىمنىڭ سىرتىنا قازاق, اعىلشىن, قىتاي, ورىس تىلدەرىندە تۇسىندىرمە جازىلعان. كومپانيانىڭ باستى ماقساتى – وتاندىق نارىقتى تولىق يگەرۋ. سەبەبى بۇل ءونىمنىڭ ادام اعزاسىنا تيگىزەر پايداسى اسا مول. نەگىزى مۇنداي ءونىمدى اللەرگياسى بار ادامدار تۇتىنادى. مىسالى, كوبىنە بيداي ۇنىنان اللەرگيا بولادى. سونداي دەرتى بار جاندار جۇگەرى مەن قارا قۇمىق ۇنىنان جاسالعان تاعام تۇتىنسا, اللەرگيا اۋرۋىنا ۇشىرامايدى.
«وسى جۇگەرى, كۇرىش, قارا جانە قىزىل قۇمىقتىڭ ۇنىنا حالىققا اۋەل باستا ءبىرىنشى بولىپ ءبىز ۇسىنعان ەدىك. ەندى ونىڭ ماكارونىن جاساۋدى قولعا الدىق. بۇل ونىمدەر ءبىرىنشى كەزەكتە اسقازانعا پايدالى. سونداي-اق مۇنى تۇتىنعان ادام سەمىرمەيدى. عىلىمي تۇرعىدا دالەلدەنگەن دايەك», دەدى جشس باس ديرەكتورى ارمان بەيسەمبينوۆ.
باس ديرەكتوردىڭ ايتۋىنشا, كومپانيانىڭ العا قويعان جوسپارى ۇلكەن. بۇگىندە سارا ۇننىڭ ءبىر بولىگىن كورشى وزبەك ەلىنە ەكسپورتتاپ وتىر. ال باستى ماقساتى ەلدەگى ساۋدا سورەلەرىن تولىق يگەرىپ بولعان سوڭ, كۇرىش, قارا, قىزىل قۇمىق جانە جۇگەرى ۇنىنان جاسالعان تاعامدارعا سۇرانىسى جوعارى قىتاي نارىعىنا شىعۋدى كوزدەپ وتىر.
قازىر ساعاتىنا 200-250 كەلى سارا ماكارون شىعارىپ وتىرعان كومبيناتتىڭ ءونىمىنىڭ ساپاسى وتە جاقسى دەپ باعالانعان. «سوندىقتان الداعى ۋاقىتتا شەت مەملەكەتتەردەن تاپسىرىس كوپ تۇسەدى دەگەن سەنىمىمىز مول. ءارى ءوز ەلىمىزدە دە ءبىزدىڭ ونىمگە دەگەن سۇرانىس كۇننەن-كۇنگە ارتىپ كەلە جاتىر», دەدى ارمان بەيسەمبينوۆ.
