سۋرەت: ru.freepik.com
- ارالاس جەكپە-جەك الەمىندەگى ەڭ بەلدى ۇيىم – UFC الداعى كۇندەرى تاعى ءبىر قازاقتىڭ قايسار ۇلىمەن تولىعۋى مۇمكىن. ول ءۇشىن باعلان جەڭىس ۇلىنا (18-5) 23 قاراشادا ماكاودا ۇيىمداستىرىلاتىن Road to UFC تۋرنيرىندە سۋ يون يۋگەنى (13-3) سان سوقتىرۋى قاجەت. قىتايدا تۋىپ-وسكەن قانداسىمىز اتالعان جارىستىڭ باستاپقى باسەكەلەرىندە قىتايلىق لي يۋنفەندى (11-5) ەكىنشى راۋندتا ەسىنەن تاندىرسا, جاپونيالىق توكيتاكو ناكانيسيدى (12-4) ۇپاي سانىمەن جەڭدى.
- بۇگىن كانادانىڭ ۆانكۋۆەر قالاسىندا سەمسەرلەسۋدەن الەم كۋبوگىنىڭ كەزەكتى كەزەڭى باستالدى. تۋرنيرگە ەلىمىزدىڭ ەرلەر قۇراماسى دا قاتىسادى. ولار – رۋسلان قۇربانوۆ, ەلمير ءالىمجانوۆ, ۆاديم شارلايموۆ, ەرلىك سەرتاي, كيريلل پاۆلوۆ. حالىقارالىق سەمسەرلەسۋ فەدەراتسياسىنىڭ مالىمەتىنشە, ۇيەڭكى جاپىراقتارى ەلىندە بارلىعى 25 كوماندا باق سىنايدى.
- فۋتبولدان 2026 جىلى وتەتىن الەم چەمپيوناتىنىڭ ىرىكتەۋ تۋرنيرىنە قاتىساتىن كوماندالار بەس سەبەتكە ءبولىندى. قازاقستان قۇراماسى بولگاريا, ليۋكسەمبۋرگ, ارمەنيا, كوسوۆو, ازەربايجان, ەستونيا, كيپر, ليتۆا, فارەر ارالدارى, لاتۆيا قۇرامالارىمەن بىرگە ءتورتىنشى سەبەتكە ءتۇستى. وزگە سەبەتتەگى كوماندالار مىنالار: ءبىرىنشى – فرانتسيا, يسپانيا, انگليا, پورتۋگاليا, بەلگيا, نيدەرلاند, يتاليا, گەرمانيا, حورۆاتيا, شۆەيتساريا, دانيا, اۋستريا. ەكىنشى – سەربيا, ۋكراينا, تۇركيا, شۆەتسيا, ۋەلس, پولشا, ماجارستان, گرەكيا, نورۆەگيا, رۋمىنيا, سلوۆاكيا, چەحيا. ءۇشىنشى – شوتلانديا, سلوۆەنيا, يرلانديا, فينليانديا, گرۋزيا, البانيا, سولتۇستىك ماكەدونيا, يسلانديا, سولتۇستىك يرلانديا, بوسنيا مەن گەرتسەگوۆينا, چەرنوگوريا, يزرايل. بەسىنشى – مولدوۆا, مالتا, اندوررا, گيبرالتار, ليحتەنشتەين, سان-مارينو. جەرەبە تارتىلاتىن كۇن 13 جەلتوقسانعا بەلگىلەنىپ وتىر.
- نىسانا كوزدەۋدەن ەل قۇراماسىنىڭ سپورتشىسى نيكيتا چيريۋكين ازيانىڭ جاڭارتىلعان ASC رەيتينگىندە ءبىرىنشى ورىندى ولجالادى. ول 25 مەتردەن جىلدام اتىلاتىن تاپانشامەن وق اتۋدان 1500 ۇپاي جينادى. 50 مەتردەن كىشى كاليبرلى مىلتىقپەن ءۇش قالىپتان وق اتۋ بويىنشا كونستانتين مالينوۆسكي بەسىنشى ورىندا. ءدال وسى ديستسيپلينادا الەكساندرا لە جەتىنشى ورىندى يەلەنسە, پنەۆماتيكالىق تاپانشامەن 10 مەتردەن وق اتۋدا ۆالەري راقىمجانوۆ بەسىنشى ساتىعا جايعاستى.
- حالىقارالىق ۇستەل تەننيسى فەدەراتسياسى ءوز رەيتينگىن جاڭارتتى. سوڭعى بىرنەشە WTT تۋرنيرلەرىندەگى تابىسىنان كەيىن ءجانيا بەكمۇحامبەتوۆا بىردەن بىرنەشە ساتىعا جوعارىلاپ, قازىرگى كەزدە 11 جاسقا دەيىنگى ويىنشىلار اراسىندا ەكىنشى ورىنعا ورنىقتى. قازاق قىزى تەك جاپونيالىق ميكۋ ماتسۋشيمادان عانا قالىپ كەلەدى. ال ۇزدىك ۇشتىكتى امەريكالىق يزابەلا دجوسەفف تۇيىندەيدى.
- قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» ويدا جوقتا ۇزدىكتەر ساناتىندا جۇرگەن ماگنيتوگورسكىنىڭ «مەتاللۋرگ» كلۋبىن ۇتىپ, ايدى اسپانعا ءبىر-اق شىعاردى. استانادا وتكەن ويىن باستالعان بەتتە ماكسيم مۋحامەتوۆ ەسەپ اشسا, قوناقتار لەزدە تارازى باسىن تەڭەستىردى. دەسەك تە 29 مينۋتتا كيريلل پانيۋكوۆ سوققان گول ايدىن يەلەرىنە جەڭىس سىيلادى. ەسەپ – 2:1.
