كينوفەستيۆالدىڭ باستالۋى الدىندا ارنايى ءباسپاسوز ءماسليحاتىن وتكىزگەن ۇيىمداستىرۋشىلار حالىقارالىق ءىس-شارانىڭ نەگىزگى باعىتتارىمەن تانىستىرىپ, بايقاۋ جانە بايقاۋدان تىس باعدارلامالاردى جاريالادى. سونىمەن قاتار قازىلار القاسى تانىستىرىلىپ, الداعى كورسەتىلىمدەر تۋرالى جان-جاقتى مالىمەت بەردى.
بايگەگە قاتىساتىن فيلمدەردى ىرىكتەۋ كەزىندە فيلمگە قويىلعان نەگىزگى تالاپتاردىڭ ءبىرى – شىعارماشىلىق ءونىمنىڭ ەۋرازيا كەڭىستىگىنەن بولۋى جانە ونىڭ كوركەمدىك ساپاسى باستى شارت رەتىندە قاراستىرىلادى. وڭتۇستىك افريكا, وڭتۇستىك جانە سولتۇستىك امەريكادان جولدانعان فيلمدەر ىرىكتەۋگە مۇلدە قاتىسا المايدى. فەستيۆال ديرەكتورى, «قازاقفيلمنىڭ» پرەزيدەنتى مىندەتىن اتقارۋشى ايدار وماروۆتىڭ ايتۋىنشا, XVII «ەۋرازيا» كينوفەستيۆالىنە ازىرلىك جۇمىسى جىلدىڭ باسىنان بەرى ءجۇرىپ كەلەدى. قازىلار القاسىنىڭ 70%-ىن شەتەلدەن شاقىرىلعان مەيماندار قۇرايدى, ولاردىڭ جۇمىس كەستەسىنە ورايلاستىرا كەلىسىمگە كەلۋ ۇيىمداستىرۋ القاسىنا وڭايعا سوقپاعان. بيىلعى قازىلار القاسىنا كانن فەستيۆالىنىڭ «التىن پالما بۇتاعىنىڭ» يەگەرى, تۇركيانىڭ بەدەلدى رەجيسسەرلەرىنىڭ ءبىرى نۋري بيلگە جەيلان تورەلىك ەتەدى.
وتكەن جىلدارمەن سالىستىرعاندا, بيىلعى XVII فەستيۆالعا شاقىرىلعان الەمدىك كينو جۇلدىزدار قاراسى از. «ەۋرازيا» كينوفەستيۆالى شىعىس پەن باتىس مادەنيەتىن توعىستىرىپ, ەكى الىپ كەڭىستىكتىڭ كينوسىن جاقىنداستىرۋ ماقساتىن العا قويعان سوڭ, ءبىر كۇنگە كەلىپ-كەتكەن قالاماقىسىنا اقىلعا قونىمسىز قارجى سۇرايتىن اتاقتىلاردى ەمەس, وتاندىق كينو سالاسىن دامىتۋعا تىكەلەي ىقپالى بار پايدالى ماماندار مەن ىسكەرلىك الاڭدارىن قولايلى ساناپ, وسى ويدى جۇزەگە اسىرۋعا باسىمدىق بەرگەن.
– كينوفەستيۆال اۋقىمدى ەكى سەكتسياعا بولىنگەن, ونىڭ ءبىرى – 12 ءفيلمدى قامتىعان حالىقارالىق كونكۋرس, ەكىنشىسى – 9 فيلم ۇسىنىلاتىن ورتا ازيا جانە تۇركى الەمى سەكتسياسى. جالپى العاندا, فەستيۆالعا 15 ەلدىڭ كينەماتوگرافيستەرى قاتىسادى. ولار: بانگلادەش, وڭتۇستىك كورەيا, اۋستريا, قاتار جانە ەۋروپا, ازيا مەن تاياۋ شىعىس ەلدەرىنىڭ بىرقاتار مەملەكەتتەرى. كونكۋرسقا ارنالعان فيلمدەردىڭ كورسەتىلىمى 25–29 قاراشا ارالىعىندا «ەسەنتاي» كينوپاركىنىڭ اۋماعىندا وتەدى. سونداي-اق وسى كۇندەر ارالىعىندا ت.جۇرگەنوۆ اتىنداعى قازاق ۇلتتىق ونەر اكادەمياسىندا ىسكەرلىك الاڭدار جۇمىس ىستەيدى. فەستيۆال اياسىندا كونكۋرستان تىس كورسەتىلىمدەر, ىسكەرلىك الاڭدارى, شىعارماشىلىق كەزدەسۋلەر وتەدى.
NETPAC مۇشەسى, XVII حالىقارالىق «ەۋرازيا» كينوفەستيۆالىنىڭ باعدارلاما ديرەكتورى ديانا ءاشىموۆا: «جاساندى ينتەللەكتپەن جۇمىس ىستەۋ ءبىز ءومىر ءسۇرىپ وتىرعان كەزەڭنىڭ ەڭ بەلسەندى جاڭالىعى بولىپ وتىر. «كينەماتوگرافياداعى جاساندى ينتەللەكت جانە كرەاتيۆتى كوزقاراس» دەگەن ماسەلە وزەكتى مانگە يە, جاقىن كۇندەرى قازاقستاننىڭ نەيروجۇيەسى ماماندارىمەن بىرگە شەتەلدىڭ تاجىريبەلى ماماندارىن شاقىرىپ, دوڭگەلەك ۇستەل باسىندا بىرگە تالقىلاۋدى دىتتەپ وتىرمىز. سەبەبى كينونىڭ بولاشاعى جاساندى ينتەللەكتپەن تىكەلەي بايلانىستى. بۇل ماسەلە قازىر الەم كينەماتوگرافيستەرىنىڭ دە ەڭ كوپ تالقىلايتىن تاقىرىبىنا اينالدى» دەيدى.
ايدار وماروۆ XVII حالىقارالىق «ەۋرازيا» كينوفەستيۆالىنىڭ بيۋدجەت قارجىسىنا ارقا سۇيەمەي, «Bazis-A» حالىقارالىق قۇرىلىس كومپانياسى, «KAZ Minerals» كەن ءوندىرۋ كومپانياسى, «Sarens Kazakhstan» جشس, «Salem Entertainment» مەدياكومپانياسى, «Kinopark Theatres» كينوتەاترلار جەلىسى, «Eurasian Resources Group» (ERG) جانە «Astana Motors» سەكىلدى وتاندىق نارىق الاڭىنداعى ءىرى كومپانيالاردىڭ دەمەۋشىلىگىمەن وتەتىنىن ايىرىقشا اتاپ ءوتتى.
PhD جانە AlmaU قاۋىمداستىرىلعان پروفەسسورى ايبارشا بوجەەۆا جەتەكشىلىك ەتەتىن فەستيۆالدىڭ ىرىكتەۋ كوميسسياسى قۇرامىنا فرانتسۋز ءجۋرناليسى, كينوسىنشىسى باربارا لورەي دە لاشارە جانە قازاقستان رەجيسسەرى ازات حاكيموۆ ەندى. ولار الەمنىڭ تۇكپىر-تۇكپىرىنەن كەلگەن 60 ءفيلمدى سۇرىپتادى.
الماتى
