فوتو: ۇكىمەتتىڭ ءباسپاسوز قىزمەتى
وتىرىس بارىسىندا سەناتورلار «قازاقستان رەسپۋبليكاسىنىڭ ۇلتتىق قورىنان 2025-2027 جىلدارعا ارنالعان كەپىلدەندىرىلگەن ترانسفەرت تۋرالى» زاڭدى قاراپ, ماقۇلدادى.
قۇجات نورمالارىنا سايكەس مەملەكەتتىك مىندەتتەمەلەردى ورىنداۋ بويىنشا شىعىستاردى قامتاماسىز ەتۋ ءۇشىن ۇلتتىق قوردان 2025, 2026 جانە 2027 جىلدارعا ارنالعان رەسپۋبليكالىق بيۋدجەتكە كەپىلدەندىرىلگەن ترانسفەرتتىڭ مولشەرى 2 ترلن تەڭگەنى قۇرايدى. زاڭنىڭ قابىلدانۋى بيۋدجەتتىڭ تەڭگەرىمدىلىگىن قامتاماسىز ەتۋگە جانە ۇلتتىق قوردىڭ تۇراقتاندىرۋ فۋنكتسياسىن ىسكە اسىرۋعا مۇمكىندىك بەرەدى.
سونىمەن قاتار دەپۋتاتتار «2025 – 2027 جىلدارعا ارنالعان رەسپۋبليكالىق بيۋدجەت تۋرالى» زاڭدى دا قارادى. بيۋدجەتتىڭ باسىم مىندەتى مەملەكەتتىڭ الەۋمەتتىك مىندەتتەمەلەرىن ورىنداۋ جانە ەل پرەزيدەنتىنىڭ تاپسىرمالارىن ىسكە اسىرۋ بولىپ قالا بەرەدى.
ماسەلەن, الداعى ءۇش جىلعا ارنالعان رەسپۋبليكالىق بيۋدجەتتىڭ پارامەترلەرى بيۋدجەتتىك قاعيدالاردىڭ ساقتالۋىن جانە بيۋدجەت شىعىستارىنىڭ الەۋمەتتىك-ەكونوميكالىق دامۋدىڭ باسىم باعىتتارىنا شوعىرلانۋىن ەسكەرە وتىرىپ ايقىندالعان.
«بيۋدجەت شىعىستارىنىڭ ءبىرىنشى كەزەكتەگى باعىتتارى مەملەكەتتىك الەۋمەتتىك مىندەتتەمەلەردى تولىق كولەمدە ورىنداۋ, عىلىمدى, ءبىلىم بەرۋدى, مەديتسينانى قولداۋدى كۇشەيتۋ ارقىلى ادامي كاپيتالدى دامىتۋ بولىپ قالا بەرەدى. اتاپ ايتقاندا, رەسپۋبليكالىق بيۋدجەت شىعىستارىنىڭ جالپى كولەمى 2025 جىلى 25 750 ملرد تەڭگە, 2026 جىلى 23 168 ملرد تەڭگە جانە 2027 جىلى 24 566 ملرد تەڭگە سوماسىندا جوسپارلانىپ وتىر. قاراجات قازىرگى جاعدايلارعا بەيىمدەلە وتىرىپ, ەكونوميكالىق ۇلگى قالىپتاستىرۋعا, سونداي-اق مەملەكەتتىك قارجىنىڭ تۇراقتىلىعىن قامتاماسىز ەتۋگە جانە حالىقتىڭ تابىسىن ارتتىرۋ ءۇشىن جاعداي جاساۋ ارقىلى ازاماتتاردىڭ ءال-اۋقاتىن جاقسارتۋعا باعىتتالادى», دەلىنگەن حابارلامادا.
سەناتورلار كونتسەپتۋالدى تۇردە رەسپۋبليكالىق بيۋدجەتتى قولدادى, دەگەنمەن, ونى قاراۋ بارىسىندا بىرقاتار وزگەرىستەر ەنگىزدى. ناقتى ايتقاندا, دەپۋتاتتار كەلەسى جىلعا قوسىمشا 60 ملرد تەڭگە ءبولۋدى ۇسىندى. بۇل قاراجات وڭىرلىك دامۋعا, سۋمەن جابدىقتاۋ جانە سۋ بۇرۋ پروبلەمالارىن شەشۋگە, «اۋىل – ەل بەسىگى» باعدارلاماسىن ىسكە اسىرۋعا, سونداي-اق باسقا دا باعىتتارعا ارنالعان. وسىعان بايلانىستى ۇسىنىلعان تۇزەتۋلەرمەن زاڭدى ماجىلىسكە قايتارۋ تۋرالى شەشىم قابىلداندى.
