باس پروكۋراتۋرانىڭ مالىمەتىنشە, 75 ەسىرتكى زەرتحاناسىنىڭ قىزمەتى توقتاتىلدى, 87 ادام, ونىڭ ىشىندە جاقىن جانە الىس شەتەل ازاماتتارى (مولدوۆا, لاتۆيا, ءۇندىستان جانە ت.ب.) ۇستالدى. 1,3 توننادان استام سينتەتيكالىق ەسىرتكى زاتتارى تاركىلەندى.
ەسىرتكى ساتۋمەن اينالىساتىن 13 قىلمىستىق توپتىڭ, ونىڭ ىشىندە 2 ترانسۇلتتىق قىلمىستىق توپتىڭ ارەكەتى اشكەرەلەندى.
«باس قاداعالاۋشى ورگان ەسىرتكىگە قارسى «ناشاكورلىققا جول جوق» ىس-شاراسىن تۇراقتى تۇردە وتكىزىپ كەلەدى. ناتيجەسىندە ەسىرتكىنى ناسيحاتتاعانى ءۇشىن 17 ادام ۇستالىپ, 10 مىڭنان استام ناركو جازبالار (گراففيتي) جويىلدى», دەلىنگەن حابارلامادا.
زاماناۋي تەحنولوگيانىڭ دامۋى ەسىرتكى ساتۋمەن اينالىساتىن ادامداردىڭ ينتەرنەت-پلاتفورمالاردى پايدالانىپ, ۇزاق ۋاقىت تاسادا قالۋىنا جانە بارلىق پروتسەستى قاشىقتان باسقارىپ وتىرۋلارىنا ىقپال ەتتى.
«قازىرگى تاڭدا ەسىرتكى دۇكەندەرىنىڭ «كۋراتورلارى» جانە ەسىرتكى بيزنەسىنىڭ باسقا دا ۇيىمداستىرۋشىلارى, سونىڭ ىشىندە ەسىرتكى ساۋداسىنان تۇسكەن زاڭسىز تابىسقا جاۋاپتى ادامدار ۇستالدى», دەپ حابارلادى باس پروكۋراتۋرا.
ءتارتىپ ساقشىلارى ەسىرتكى بيزنەسىنىڭ ءاربىر بۋىنىن, ياعني ەسىرتكى جارنامالاۋشىدان باستاپ ەسىرتكى ساۋداسىن ۇيىمداستىرۋشىلارعا دەيىن انىقتاۋعا بەل بايلاعان.
