بارلىق بانككە بىرىڭعاي QR-كود ەنگىزىلەدى

بانكارالىق QR تولەم قىز­مەتى – ازاماتتارعا QR ار­قىلى تولەم­دەر­دى تەز ءارى ىڭ­عايلى ىسكە اسىرۋعا كومەك­تەسەتىن ۇلت­تىق تسيفرلىق قارجىلىق ينفرا­قۇرىلىمنىڭ (NDFI) ماڭىزدى بولشەگى. بۇل ءتۇرلى بانكتىڭ بىرنەشە تەرمينالىن ورناتۋ شىعىنىن ازايتادى, ازاماتتار كەز كەلگەن بانكتىڭ تەر­مينالى ارقىلى QR-كودپەن تو­لەم جاسايدى. سونداي-اق بانكارا­لىق ترانزاكتسيالاردى وڭ­دەۋ شىعىندارىن تومەندەتىپ, كليەنتتەرگە ۇسىناتىن تولەم قىزمەتتەرى كەڭەيە تۇسەدى. قازىر بۇعان بانكتەر كەزەڭ-كەزەڭىمەن قو­سى­لىپ جاتىر. جوبانى كەڭ اۋقىمدا قوسۋ كەلەر جىلعا جوس­پار­لانىپ وتىر.

– قازىر ۇلتتىق بانك ينفرا­قۇ­رى­­لىمىنىڭ نەگىزىندە بانكارالىق QR تولەمدەر جۇيە­سى قۇرىلىپ جاتىر. بۇل جۇيە بۇكىل ەلگە, بار­لىق نارىق قاتىسۋشىسىنا جانە ولاردىڭ كليەنتتەرىنە ار­نالعان. ونى ەنگىزۋ بانكتەردىڭ تولەم مۇمكىندىگى مەن قىزمەت كورسەتۋ اياسىن كەڭەيتەدى, ولاردىڭ كليەنتتەرىنە كەز كەلگەن بانك­تەر اراسىندا بانكارالىق QR-تولەمدەردى قابىلداۋعا جانە جۇزەگە اسىرۋعا مۇمكىندىك بەرەدى. بۇل تولەم نارىعىنداعى باسە­كە­لەس­تىكتى ارتتىرىپ, تۇتىنۋ­شى­لاردىڭ قۇقىعىن قور­عاۋعا جول اشادى, – دەگەن ەدى ۇب باسشىسى تيمۋر سۇلەيمەنوۆ «Egemen Qazaqstan» گازەتىنىڭ تىلشىسىنە بەرگەن سۇحباتىندا.

«Quick Response» (QR) جۇيە­سىن العاش رەت 1994 جىلى جا­پونيا­نىڭ «Denso Wave» كومپانياسى جاساعان. اۆتو­كو­لىك بولشەكتەرىن جىلدام قادا­عالاۋعا ارنالعان ءادىس قارجى سالاسىن ءدۇر سىلكىن­دى­رەدى دەپ ەشكىم دە ويلا­ما­دى. شتريحكودتارعا قارا­عاندا الدەقايدا كوپ اقپارات ساقتايتىن, سمارتفون ارقىلى لەزدە سكانەرلەۋگە بولاتىنى ونى سان سالاعا سىيىمدى ەتتى. QR كودتىڭ ىشىنە 7 مىڭ تاڭباعا دەيىن ءماتىن, سۋرەتتەرگە سىلتەمە نەمەسە ەلەكتروندى ۆيزيتكا سياقتى مالىمەتتەر سالىنادى. QR كودتار پاندەميا كەزىندە ەرەكشە تانىمال بولدى. ولار بايلانىسسىز تولەمدەر, تاماققا تاپسىرىس بەرۋ, دەن­ساۋ­لىق جاعدايىن باقىلاۋ (Ashyq جۇيەسى سياقتى), ادامدار ارا­سىن­داعى قاشىقتىقتى ساقتاۋعا ءجيى قولدانىلدى.

– بۇل – كۇردەلى تەحنيكالىق تەتىك. دەگەنمەن بانكتەر جالپى العاندا بۇل باستامانى وڭ باعالاعانىن اتاپ وتكەن ءجون. قازىر جۇيە تەحنولوگيالىق تۇر­­عىدان جۇمىسقا دايىن, نا­رىق قاتىسۋ­شىلارىمەن بىرگە بيزنەس-پروتسەستەردى تالقىلاپ, تەحني­كالىق ينتەگراتسيالاۋ جۇ­مىستارى جۇرگىزىلىپ, بانك­تەر جول كارتاسىنا سايكەس جۇيەگە قوسىلىپ جاتىر. قىز­مەت 2024 جىلدىڭ اياعىنا دەيىن ىسكە قوسى­لادى, ال نارىق قاتىسۋ­شى­لارى ءوز كليەنتتەرى ءۇشىن ونىڭ اياسىن 2025 جىلدان باس­تاپ كەڭەي­تە باس­تايدى, – دەدى ۇلتتىق بانك باسشىسى.

ەلىمىزدە بارلىق بانككە بىرىڭ­عاي QR-كود ەنگىزىلەتىنى 2022 جىلى ايتىلعان ەدى. سول ارقىلى قاي بانك­تىڭ كليەنتى بولسا دا, كەز كەلگەن تەرمينالدان QR ارقىلى تولەم جاساۋعا بولاتىنى بەلگىلى بولعان. ءتىپتى ۇب توراعاسى تيمۋر سۇلەيمەنوۆ بيىل 23 اقپانداعى ءباسپاسوز ءماسليحاتىندا بانك­تەردى بىرىڭعاي QR-كود قوسىلۋعا مىندەت­تەۋى مۇمكىن ەكەنىن دە ايتقان.

– بانكتەر ۇلتتىق قارجى ينفرا­قۇرىلىمىنىڭ ارتىق­شى­­لىقتارىن كورۋى كەرەك, ونىڭ نەگىزىندە ولار ءبىر-بىرىمەن ءوزارا ارەكەتتەسۋ مۇمكىندىكتەرى بار. ول ەرىكتى تۇردە جاسالادى. بارلىق بانك­تەر بىرىڭعاي QR-كود بو­يىنشا تولەمگە قوسىلادى دەپ ۇمىتتەنەمىن. ەگەر ەرىكتى تۇردە قوسىلماسا, ءبىز مىندەتتەۋ شاراسىن ىسكە اسىرا الاتىنىمىزدى جوق­قا شىعارمايمىن, – دەگەن ەدى ول.