بالالارعا «سامۇرىق-قازىنا» كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورى ارقىلى قاجەتتى كيىم-كەشەك, قۇرال-جابدىق, ۆەلوسيپەدتەر مەن كولىكتەر ساتىپ الىنىپ بەرىلدى. سونداي-اق جوبا اياسىندا, «سارىارقا» ۆەلوترەگىندە 16 قاراشادا قور باسشىلىعى مەن بالالاردىڭ بىرلەسكەن جاتتىعۋى ءوتتى.
«جاتتىعۋدى جاقىندا عانا باستاساڭىزدار دا, قازىردىڭ وزىندە جاقسى ناتيجە كورسەتىپ جاتىرسىزدار. كوماندانىڭ ءبىر بولىگى استانا قۇراماسىنا ەنگەنىن بىلەمىن. ال ءتالىم الۋشىلاردىڭ ءبىرى داستان ورداباي فرانتسيادا وتكەن حالىقارالىق بەدەلدى جارىستا كۇمىس جۇلدەگەر اتانعانىن ەستىپ قۋاندىق», دەپ اتاپ ءوتتى «سامۇرىق-قازىنا» اق باسقارما توراعاسى نۇرلان جاقىپوۆ.
باسقارما توراعاسى سونىمەن بىرگە, قور ەرەكشە بالالاردى تاربيەلەۋ مەن الەۋمەتكە ىقپالداستىرۋعا قاتىستى جوبالاردى ۇنەمى قولدايتىنىن باسا ايتتى.
ء«بىز وڭالتۋ ورتالىقتارىن, مەكتەپتەردە ينكليۋزيا كابينەتتەرىن, تەگىن سپورت سەكتسيالارىن اشىپ, اۋىلداردا سپورت الاڭدارىن, وڭىرلەردە ءىرى سپورت كەشەندەرىن سالىپ جاتىرمىز. وسىلايشا ءبىز سپورتتى بالالارعا قولجەتىمدى ەتكىمىز كەلەدى», دەدى قور باسشىسى.
ن.جاقىپوۆ شارا قورىتىندىسىندا, جاس سپورتشىلاردى قولداۋ ماقساتىندا بالالارعا 30 ۆەلوسيپەدتىڭ سەرتيفيكاتى مەن جاڭا كولىكتىڭ كىلتىن تابىس ەتتى.
«بالام ۆەلوسپورت سەكتسياسىنا قاتىسقالى وي-زەيىنى جاقسارىپ, جالپى دەنساۋلىعى دا وڭالىپ كەلەدى. بۇلشىق ەتى شيراپ, ادامدارمەن ارالاسىپ, اشىلۋى دا كوبەيدى. جاتتىقتىرۋشىلارعا, وسىنداي بىرەگەي ءىستى حالىقارالىق جوعارى دارەجەدە ۇيىمداستىرۋشىلارعا شىدام مەن جىگەرلەرىنە, مەيىرىمدەرى مەن قامقورلىقتارىنا العىس ايتامىن», دەپ ويىن ءبىلدىردى 14 جاستاعى دانيلدىڭ اناسى يۋليا بوروۆيكوۆا.
«نەمەرەم بۇرىنعىداي ەمەس. بۇرىن قورقىپ, وتىرا المايتىن. قازىر اجەپتاۋىر ۇيرەندى. ۆەلوسيپەدپەن جۇرەدى, جاقسى جۇگىرەدى. ءوزى دە ۆەلوسيپەدتى ۇناتادى», دەيدى 11 جاستاعى ءامىردىڭ اجەسى ىرىستى قابدۋللينا.
«ۆەلوسپورت – بارشاعا» جوباسى ءوز جۇمىسىن 2024 جىلدىڭ تامىز ايىنان باستادى. از ۋاقىتتىڭ ىشىندە اتالعان جوبانىڭ قاتىسۋشىلارى بيىك بەلەستەردى باعىندىرىپ جاتىر. وعان دالەل, جوبانىڭ 16 جاستاعى تۇلەگى, جالپى ۆەلوسپورتپەن اينالىسىپ كەلە جاتقانىنا 6 جىل بولعان داستان ورداباي 13-14 قىركۇيەك ارالىعىندا وتكەن «Virtus Cycling Open Time Trial»-عا قاتىسىپ, 17,3 كم قاشىقتىقتا جەكە ۋاقىت جارىسىنىڭ ءىى-3 ساناتىندا (اۋتيزم سپەكترىنىڭ بۇزىلۋى) كۇمىس جۇلدەنى جەڭىپ الدى. جارىستا الەمنىڭ تۇكپىر-تۇكپىرىنەن كەلگەن 16 پاراسپورتشى باعىن سىنادى. ايتا كەتۋ كەرەك, ەلىمىز بۇل جارىسقا العاش رەت قاتىستى.
«ارمانىمىز ورىندالدى دەسەم, ارتىق ايتپاسپىن. داستاننىڭ جەتىستىگىنە قاراپ, ءبىزدىڭ بالالار دا وسىنداي اسۋعا قول جەتكىزسە دەيمىز. ونىڭ ۇستىنە بالامىزعا ساي كەلەتىن سپورت ءتۇرىن ۇزاق ىزدەدىك. بۇعان دەيىن ءجۇزۋ, فۋتبول سىندى سەكتسيالارعا بارىپ كوردىك. قالامىزدا ۆەلوسپورت كلۋبىنىڭ اشىلعانىنا وتە قۋانىشتىمىز. ەرسۇلتان بۇگىن جىلدامدىقتى ادەتتەگىدەن ارتتىرىپ, جاقسى ناتيجە كورسەتتى. بۇل ونىڭ فيزيكالىق داعدىلارىن دامىتىپ, الەۋمەتتىك ورتاعا سىڭىسۋىنە ىقپال ەتەدى. الداعى ۋاقىتتا ۇلكەن تۋرنيرلەردە بوي كورسەتەمىز دەگەن سەنىمدەمىن. بۇگىن عاجايىپ كۇيگە ەنىپ وتىرمىز. قور باسشىسىنىڭ جەكە ۇلگى-ونەگە تانىتىپ, جاتتىعۋعا قاتىسۋى, قاسىمىزدان تابىلۋى دا ءبىزدى قاناتتاندىردى. سەبەبى ەرەكشە بالعىنداردىڭ اتا-انالارىنا ينكليۋزيۆتى سپورت تاقىرىبى وتە ماڭىزدى. وسىنداي ىستەر ءۇمىتىمىزدى وياتىپ, جىگەرىمىزدى جانيدى. باپكەرلەرىمىزدىڭ ەرەن ەڭبەگى دە كوز الدىمىزدا», دەپ تەبىرەندى 11 جاستاعى ەرسۇلتاننىڭ اكەسى الماز سادىقوۆ.
سونىمەن قاتار جوبانىڭ 10 تاربيەلەنۋشىسى ۆەلوسپورتتان استانا قالاسى قۇراماسىنىڭ مۇشەسى اتانىپ وتىر. باستى ماقسات – ەرەكشە بالالاردىڭ سپورتپەن اينالىسۋىنا تەڭ جاعداي جاساپ, ءاۋتيزمى بار جانداردىڭ دا قوعامنىڭ ءبىر بولىگى ەكەنىن تانىتۋ. جەتكىنشەكتەرگە ءتورت كاسىبي ءارى بىلىكتى باپكەر ۆەلوسيپەد تەبۋدى ۇيرەتىپ جاتىر. «Velolegend» سەكتسياسىندا اپتاسىنا ءۇش رەت جاتتىعۋ وتكىزىلەدى.
«بىزدە ەڭ باستى ماقسات – سپورت ناتيجەسىن كورسەتۋ. ول جاي عانا سەكتسيا ەمەس. ءار بالاعا جەكە قاراۋ كەرەك. بالالار ءارتۇرلى. كەيبىر بالالار 2-3 جاتتىعۋدان كەيىن ۇيرەنىپ كەتەدى. كەيبىر بالاعا 3-4 اي كەرەك. بالانىڭ مىنەز-قۇلقىنا, دەنە دايىندىعىنا, كوڭىل كۇيىنە مۇقيات زەر سالۋعا تىرىسامىز», دەيدى «Velolegend» كلۋبىنىڭ جاتتىقتىرۋشىسى قايرات حادىلبەك.
قور دەنساۋلىق ساقتاۋ, ءبىلىم بەرۋ, بۇقارالىق سپورت سالالارىنداعى, ونىڭ ىشىندە ينكليۋزيا, كرەاتيۆتى يندۋستريا باعىتتارىنا ەرەكشە نازار اۋدارادى. ونىڭ ىشىندە سالاماتتى ءومىر سالتىنىڭ قانات جايۋىنا ايرىقشا باسىمدىق بەرىلىپ وتىر. وعان دالەل, بيىل قازان ايىندا قوردىڭ قولداۋىمەن قىزىلوردا قالاسىندا تەننيس ورتالىعى اشىلدى, جىل سوڭىندا تۇركىستان قالاسىندا سپورت كەشەنى ىسكە قوسىلادى. جىلدا قور قولداۋىنىڭ ارقاسىندا 23 قالادا ەرەكشە قاجەتتىلىگى بار 1 100 بالا بەيىمدەلۋ, سپورت سەكتسيالارىنا تەگىن بارادى. مۇندا بالالار قوعامعا بەيىمدەلەدى, قاجەتتى داعدىلاردى ۇيرەنەدى. ءتيىستى سەكتسيالارعا قاتىساتىن جانداردىڭ كوبى پاراليمپيادا قۇرامالارىنىڭ مۇشەسى. ولار رەسپۋبليكالىق, حالىقارالىق جارىستاردا جۇلدەلى ورىندار الىپ ءجۇر.
قور سوڭعى بىرنەشە جىلدا وڭىرلەردە 40-قا جۋىق سپورت كەشەنى مەن ويىن الاڭىن سالىپ, بۇقارالىق سپورتپەن 90 مىڭنان استام وتانداسىمىز قامتىلدى. بارشاعا ءمالىم, اۋىلداردا جاستارعا ارنالعان ارنايى ورىندار سانى از. ەندى جاستاردىڭ بوس ۋاقىتىن ءتيىمدى وتكىزىپ, سپورتپەن شۇعىلداناتىن نىساندار سانى كوبەيىپ كەلەدى.
«Samruk-Kazyna Trust» كق ارقىلى قوردىڭ كومپانيالار توبى 2024 جىلدىڭ 10 ايىندا بىلتىردان بەرى جالعاسىپ كەلە جاتقان 13, بيىل قولداۋ تاپقان 36 الەۋمەتتىك جوبا ارقىلى 550 مىڭنان استام ادامعا قايىرىمدىلىق كومەگىن كورسەتتى. جىلدىڭ اياعىنا دەيىن بۇل ساندى 700 مىڭ ادامعا جەتكىزۋ كوزدەلىپ وتىر. اتالعان بەلەس وتكەن جىلعا قاراعاندا 40 پايىزعا جوعارى بولماق.
الدابەرگەن كەمپىرباي
