ستۋدەنتتەر ءۇيىنىڭ سالتاناتتى اشىلۋىنا ج.تاشەنەۆ اتىنداعى ۋنيۆەرسيتەتتىڭ باسقارما توراعاسى, ۇعا اكادەميگى, پەداگوگيكا عىلىمدارىنىڭ دوكتورى, پروفەسسور وڭالباي اياش ۇلى, ۋنيۆەرسيتەت رەكتورى پروفەسسور قانات بايبولوۆ, ءو.جانىبەكوۆ اتىنداعى وڭتۇستىك پەداگوگيكالىق ۋنيۆەرسيتەتىنىڭ رەكتورى مىندەتىن اتقارۋشى گۇلجان سۇگىرباەۆا, ستراتەگيالىق دامۋ جانە الەۋمەتتىك ماسەلەلەر جونىندەگى پرورەكتور بارشاگۇل يسابەك, سونداي-اق جەكە كاسىپكەرلەر قاسىمباي جاحان ۇلى مەن حيللولا انارمەتوۆالار قاتىسىپ, ءبىلىم الۋشى جاستارعا ىزگى تىلەكتەرىن جەتكىزدى.
ء«بىلىم ورداسىنداعى بار يگىلىك ستۋدەنتتەر ءۇشىن ارنالىپ وتىر. ۋنيۆەرسيتەتتە ءبىلىمپازداردىڭ ءىلىم توقىپ, ءوز بەتىنشە ىزدەنۋگە بار جاعداي جاسالعان. وقىتۋشىلاردىڭ دا بىلىكتىلىگى جوعارى. ۇستازداردىڭ كوپشىلىگى شەتەلدە وقىعان. ادال ەڭبەك پەن ساپالى قىزمەتتىڭ ناتيجەسىندە بۇگىندە ستۋدەنتتەردىڭ دە ءبىلىم دارەجەسى ارتىپ كەلەدى. سونىمەن بىرگە تاياۋدا ستۋدەنتتەر كۇنىنە وراي «Tashenev tandauy-2024» اتتى كەش ۇيىمداستىردىق. وعان شاكىرتتەرمەن بىرگە ۋنيۆەرسيتەتتىڭ ۇستازدارى, باسشىلىق قۇرامى تۇگەل قاتىستى. سول كەشتە تاربيەسىمەن, بىلىمىمەن وزگەلەرگە ۇلگى بولعان ۇزدىك ستۋدەنتتەر ماراپاتتالدى. بۇل كەش تەك كوڭىل كوتەرۋ ءىس-شاراسى ەمەس, جاستاردىڭ ءوز ونەرلەرىن ورتاعا سالاتىن, تالانتىن اشاتىن, سونداي-اق شاكىرت پەن ۇستاز اراسىنداعى بايلانىستى جاقىنداتا تۇسەتىن مەرەكە», دەدى ۋنيۆەرسيتەت رەكتورى ق.بايبولوۆ.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس ەلىمىزدە ءبىلىم سالاسى دامىپ كەلەدى. بۇل رەتتە ەلىمىزدىڭ ءۇشىنشى مەگاپوليسى – شىمكەنت قالاسى دا وزگە وڭىرلەردەن قالىسپاي, ءبىلىم ساپاسىن جاقسارتۋعا كۇش سالىپ وتىر. ال شىرايلى شاھاردا بولاشاق پەداگوگتەردى دايارلايتىن ماڭىزدى وقۋ ورىننىڭ ءبىرى – ج.تاشەنەۆ اتىنداعى ۋنيۆەرسيتەت. ونىڭ تاريحى 90-جىلداردىڭ اياق كەزىنەن باستالادى. 1998 جىلى قازىرگى تۇركىستان وبلىسىنىڭ جەتىساي قالاسىندا جاستاردى جوعارى بىلىممەن قامتاماسىز ەتۋ ماقساتىندا اتالعان ۋنيۆەرسيتەت «سىرداريا» دەگەن اتپەن اشىلعان بولاتىن. وسى ۋاقىت ارالىعىندا ءبىلىم ورداسى ءوز ءداستۇرى مەن تاجىريبەسى قالىپتاسقان, الدىڭعى قاتارلى جەكەمەنشىك جوعارى وقۋ ورىندارىنىڭ بىرىنە اينالدى. وسىعان قاراي بۇگىنگى تاڭدا ۋنيۆەرسيتەتتى ەلىمىزدىڭ وڭتۇستىك ولكەسىندەگى سان الۋان وقىتۋ باعدارلامالارىن ۇسىنىپ وتىرعان ءبىلىم مەن عىلىم ورداسى دەۋگە بولادى. 2022 جىلى عىلىم جانە جوعارى ءبىلىم مينيسترلىگىنىڭ ۇيعارىمىمەن ۋنيۆەرسيتەت شىمكەنت قالاسىنا كوشىرىلدى. كەيىن وقۋ ورنىنا كورنەكتى مەملەكەت جانە قوعام قايراتكەرى جۇمابەك تاشەنەۆتىڭ ەسىمى بەرىلدى. قازىر اتالعان جوعارى وقۋ ورنىندا ءتورت فاكۋلتەت, ون بەس كافەدرا بار. ءبىلىم ورداسى جاستاردىڭ قوعام ومىرىندە بەلسەندى بولۋىنا مۇمكىندىك جاساپ, باعىت-باعدار سىلتەپ كەلەدى.
ۋنيۆەرسيتەت قازىر زاماناۋي ادىستەمەلەر بويىنشا پەداگوگ مامانداردى دايارلايدى. ماتەريالدىق-تەحنيكالىق بازاسى ستۋدەنتتەرگە ءبىلىم مەن تاجىريبەنى بىرگە ۇشتاستىرۋعا ۇلكەن مۇمكىندىك بەرەدى. بۇگىنگى تاڭدا ەلىمىزدە ءبىلىمدى دە جان-جاقتى مۇعالىم ماماندارىنا سۇرانىس جوعارى. ال ەڭبەك نارىعىن ءوز ماماندىعىنا ساي پەداگوگ ماماندارمەن تولىقتىرىپ وتىرعان وقۋ ورنىنىڭ ءبىرى – تاشەنەۆ ۋنيۆەرسيتەتى. بۇل وقۋ ورداسىن ۇستازدار ۇستاحاناسى دەپ اتاۋعا بولادى. بۇگىنگى ستۋدەنتتەر اراسىندا پاتەر جالداپ تۇراتىندار بار. بۇل, جالپى العاندا, الەۋمەتتىك ماسەلەنىڭ قوعامداعى ءبىر كورىنىسى. وسى ورايدا مەملەكەت باسشىسىنىڭ تاپسىرماسىنا سايكەس جوعارى وقۋ ورىندارى ستۋدەنتتەردىڭ جاتاقحانا ماسەلەسىن بىرتىندەپ شەشىپ كەلەدى. بۇل ءارى ۋنيۆەرسيتەتتىڭ تولىققاندى قالىپتاسقانىن كورسەتەدى. بىلىممەن قوسا ماتەريالدىق بازاسىنىڭ جاقسى ەكەنىن بىلدىرەدى. وسىنداي دارەجەگە جەتكەن تاشەنەۆ ۋنيۆەرسيتەتىنىڭ تابىستارىنا, ارينە, قۋانۋ كەرەك.
ەل بولاشاعى بۇگىنگى جاستار قولىندا. سوندىقتان جاستار تاربيەسى قوعامدا ەرەكشە مانگە يە. وسكەلەڭ ۇرپاقتىڭ تاربيەلى بولىپ قالىپتاسۋىنا ۇستازداردىڭ دا ايرىقشا ءرولى بار. جاستارعا جولداعان ۇندەۋىندە پرەزيدەنت قاسىم-جومارت توقاەۆ: «مەن بۇعان دەيىن «ادال ازامات» ۇعىمىن ۇسىندىم. وسى ورايدا جاستارىمىزعا ارنايى ۇندەۋ جولداعىم كەلەدى. ەلىمىزدە جۇزەگە اسىرىلىپ جاتقان ءاربىر باستاما, ەڭ الدىمەن, سىزدەرگە ارنالادى. قازىرگى رەفورمالاردىڭ يگىلىگىن كورەتىن دە, ەلدىك ىستەردى جالعاستىراتىن دا – سىزدەر. شىن مانىندە, كەز كەلگەن مەملەكەتتى تۇرعىندارىنا قاراپ باعالايدى. ياعني ءبىزدىڭ قانداي ەل بولارىمىز وسكەلەڭ ۇرپاققا بايلانىستى. سوندىقتان جاستارىمىز وتانشىل, ءبىلىمپاز, ەڭبەكقور, ۇنەمشىل, ءادىل ءارى جاناشىر بولۋى قاجەت. جاستار سپورتپەن, دەنە شىنىقتىرۋمەن اينالىسۋى كەرەك. مەن مۇنى ۇنەمى ايتىپ ءجۇرمىن. وسى قۇندىلىقتاردى بارىنشا ناسيحاتتاپ, تاراتۋ قاجەت. سوندا جەكە ادامنىڭ قاسيەتى تۇتاس ۇلتتىڭ قاسيەتىنە اينالادى», دەگەن ەدى. ءوز كەزەگىندە تاشەنەۆ ۋنيۆەرسيتەتى جاستاردى ءبىلىم مەن تاربيە نارىمەن سۋسىنداتۋدا ۇلكەن ءىس اتقارىپ كەلەدى.
جالپى, بيىلعى وقۋ جىلىنىڭ ناتيجەسىنە ۇڭىلسەك, 20 – التىن بەلگى, 50 – ۇزدىك اتتەستات, 14 حالىقارالىق جانە رەسپۋبليكالىق وليمپيادا جەڭىمپازدارى, 12 IELTS سەرتيفيكاتتارىن يەلەنگەن وزات مەكتەپ تۇلەكتەرى وسى ۋنيۆەرسيتەتكە ستۋدەنت رەتىندە قابىلدانۋعا تاڭداۋ جاساعان. قازىرگى تاڭدا اتالعان وقۋ ورنىندا مەملەكەتتىك گرانتپەن – 96, «تاشەنەۆ تارتۋى» بويىنشا – 150, «قازاقستان حالقىنا» قورى قاراجاتىنا – 5, قالا اكىمىنىڭ گرانتىمەن – 49 ستۋدەنت ءبىلىم الىپ جاتىر.
شىمكەنت
