ايتالىق, ازاماتتىڭ شارۋا قوجالىعىنان 200-دەي سيىر, 300-دەن اسا جىلقى, 500 باس قوي بيىل قىسقا ءتۇسىپ وتىر. كەيىنگى بىرەر جىلدا ول اقباس سيىر ءوسىرۋدى قولعا الدى. قازىر قوراسىندا 90 اقباس سيىرى بار. مەملەكەت اسىل تۇقىمدى مال باسىنا سۋبسيديا بەرەدى. «مال وسىرەمىن» دەسەڭ, مەملەكەتتىڭ دە وسىنداي قامقورلىعى بار. شارۋاشىلىققا قانداي تەحنيكالار قاجەت, ازاماتتا سونىڭ ءبارى دە بار. قىسقا كەرەكتى دەگەن 600 توننا ءشوبىن ەرتە كۇزدە دايىنداپ تا قويدى. ول الداعى ۋاقىتتا مال بورداقىلاۋمەن اينالىسۋدى كوزدەپ وتىر. بۇعان قاجەتتى قورا-قوپسى, شوپكە قوسا جەمى دە دايىن. تۇراقتى تۇردە ەڭبەك ەتەتىن 3-4 جۇمىسكەرى دە بار. ىسىنە تياناقتى شارۋا وسىنداي بولسا كەرەك-ءتى.
وسىرگەن مالدىڭ ءونىمىن دە ءتيىمدى پايدالانا ءبىلۋ كەرەك. ونىڭ ءسۇتى دە, ەتى دە ەلدىڭ كادەسىنە جاراپ جاتسا, مىنە, شارۋاشىلىقتىڭ پايداسى دەگەن سول. ازامات وسىدان بىرەر جىل كۇرە جولدىڭ بويىنان «ازات» ءدامحاناسىن اشقان بولاتىن. ءدامحانا قىزمەتىنە وتكەن-كەتكەن جولاۋشىلار ءدان ريزا. قولدىڭ ءسۇتى, قايماعى, مايى مەن قۇرتى, ت.ت. داستارقان مازىرىنەن قىسى-جازى ۇزىلمەيدى. ءارى باعاسى دا قالتاعا كۇش تۇسىرە قويمايدى. ارينە, سوسىن جولاۋشىلار ريزا بولماعاندا قايتەدى؟
ازامات شاديەۆ جاقىندا وبلىس ورتالىعى جەزقازعان قالاسىنان ساۋدا پاۆيلونىن اشتى. « ۇلىتاۋ» الەۋمەتتىك-كاسىپكەرلىك كورپوراتسياسى» اق جەزقازعان قالاسىنداعى بۇرىنعى «Uly dala» ساۋدا پاۆيلوندارىن فەرمەرلەرگە بەرۋدى ويلاستىرىپ, ولارعا ۇسىنىس جاساعان ەدى. بۇل ۇسىنىستى ازامات قۋانا قابىل الدى.
– ويتكەنى ۇسىنىستىڭ وتە ءتيىمدى ەكەنىن بايقادىق. كوممۋنالدىق شىعىنداردى عانا تولەيدى ەكەنبىز. الەۋمەتتىك باعىت ۇستانعاندىقتان, ارينە, باعا نارىقتان تومەن بولادى. بىراق بۇدان ۇتىلمايمىز. باعا ارزان بولسا الۋشى كوپ بولادى. مۇندا ءبىز ءوزىمىزدىڭ ونىمدەرىمىزدى, سونداي-اق حالىقتىڭ كۇندەلىكتى تۇتىنۋىنا قاجەتتى ازىق-ت ۇلىكتىڭ بارلىق ءتۇرىن ساتامىز. ءوزىم اۋىلدا شارۋاشىلىقتىڭ باسى-قاسىندا بولامىن, ال مۇنداعى ساۋدانى بالالارىم جۇرگىزەدى, – دەيدى ازامات.
– اۋىلدى كوتەرۋ تۋرالى ءجيى ايتامىز. سونىڭ ءبىر جولى – سول اۋىلداعى شارۋا قوجالىقتارىنا ونىمدەرىن وزدەرى ساتۋعا جاعداي جاساۋ. بۇل ەكى جاققا دا پايدالى, ءتيىمدى. سوندىقتان جەزقازعان قالاسىنداعى بوس تۇرعان ساۋدا پاۆيلوندارىن فەرمەرلەرگە بەرۋدىڭ جولدارىن قاراستىردىق. ءتيىستى تالاپتارىن بەكىتتىك. شارۋاشىلىقتىڭ جاعدايىن, جىلدىق تابىستىڭ كولەمىن, ت.ب. ساراپتاپ, تەكسەرەمىز. ۇسىنىسىمىزدى قابىلداپ, تالاپقا سايكەس كەلگەندەردىڭ ءبىرى «ازات» شارۋا قوجالىعى بولدى. ول قازىر ءوز ونىمدەرىنە قوسا وبلىستىق تۇراقتاندىرۋ قورىنىڭ الەۋمەتتىك ماڭىزى بار ازىق-ت ۇلىك تۇرلەرىن دە حالىققا ۇسىنىپ جاتىر, – دەيدى « ۇلىتاۋ» الەۋمەتتىك-كاسىپكەرلىك كورپوراتسياسى» اق باسقارما توراعاسى ا.جوكەباەۆ.
كاسىپكەرلىكتىڭ اياسىن ۇلعايتا ءتۇسۋ ارقىلى شارۋاسىن ودان ءارى شالقىتۋدى كوزدەگەن ازامات بۇرىن جەڭىس اۋىلىنان شاعىن ءدامحانا اشقان بولسا, ەندى سونداي ءبىر ءدامحانانى جەزقازعان قالاسىنان دا اشۋدى ماقسات ەتىپ, قاراۋسىز قالعان عيماراتتاردىڭ ءبىرىن ساتىپ الىپ, جوندەۋ جۇمىستارىن جۇرگىزۋدە. كوپكە بارماي فەرمەردىڭ بۇل ءدامحاناسى دا حالىققا قىزمەت كورسەتەتىن بولادى.
شارۋاشىلىعى شالقىپ, كاسىبى ورگە باسقان كاسىپكەر-فەرمەر قايىرىمدىلىق شارالارىنان دا شەت قالماي, جوق-جىتىك جاندارعا ارقاشان جاردەمدەسىپ تۇرادى. مىسالى, ول جەزقازعان قالاسىنداعى ساۋدا پاۆيلونىنان اپتاسىنا 50 بولكە ناندى تەگىن تاراتىپ وتىر. بۇل ونىڭ قايىرىمدى شارۋالارىنىڭ بىرەۋى عانا.
ۇلىتاۋ وبلىسى
