اتىراۋ وبلىسىندا قۇقىعى بۇزىلعان انالار سوتقا جۇگىنىپ, ادىلدىك ىزدەۋگە ءماجبۇر بولدى. ويتكەنى ولاردىڭ باسقا امالى قالمادى. ماسەلەن, 36 جاسىنا دەيىن ومىرگە ءتورت بالا اكەلگەن انانىڭ ءبىرى 2015 جىلدان بەرى «كوپبالالى وتباسى» ساناتىنداعى باسپانا كەزەگىندە تۇرعان. بىراق 2023 جىلدىڭ جەلتوقسان ايىندا كۇيەۋىنىڭ ۇيگە مەنشىك قۇقىعىن تىركەگەنى انىقتالعان. وسىعان بايلانىستى جەرگىلىكتى اكىمدىك ونى تۇرعىن ۇيگە مۇقتاجدار تىزىمىنەن شىعارىپ تاستاعان.
وبلىستىق سوتتىڭ ءباسپاسوز قىزمەتى ۇسىنعان اقپاراتقا سۇيەنسەك, كوپبالالى ايەل تۇرعىن ءۇي-كوممۋنالدىق شارۋاشىلىق ءبولىمى مەن تۇرعىن ءۇي ينسپەكتسياسىنىڭ بۇل شەشىمىمەن كەلىسپەگەن. ءسويتىپ, ادىلدىك ىزدەپ, سوتقا شاعىم تۇسىرگەن.
«سوتتا ول بۇل جەر تەلىمىنىڭ كۇيەۋىنە ۋاقىتشا پايدالانۋعا بەرىلگەنىن ءتۇسىندىردى. ءۇي سالۋعا قاراجاتى بولماعان وتباسى جەر تەلىمىن سەنىمحات ارقىلى ساتىپ جىبەرگەن. ال ساتىپ الۋشى جەر تەلىمىنە 2019 جىلى تۇرعىن ءۇي سالىپ, كەيىن ونى زاڭمەن رەسىمدەگەن. سوت تالاپ قويۋشىنىڭ كۇيەۋىنىڭ جەكەمەنشىك قۇقىعىندا تىركەلگەن تۇرعىن ءۇي عيماراتى بولعانىمەن, ول تەك ءۇي سالىنعان ۋچاسكەنىڭ يەسى بولىپ تابىلمايتىنىن انىقتادى. «تۇرعىن ءۇي قاتىناستارى تۋرالى» زاڭنىڭ 73-بابىنىڭ 1-تارماعىنىڭ 5) تارماقشاسىنا سايكەس تۇرعىن ءۇي الۋعا مۇقتاج جانە ونى العانعا دەيىن ەسەپتە تۇرعان كوپبالالى انالار مەن وتباسىلار ەسەپتەن شىعارۋعا جاتپايدى», دەپ ءتۇسىندىردى سوتتىڭ ءباسپاسوز قىزمەتى.
سوت زاڭ تالابىن ەسكەرىپ, كوپبالالى ايەلدىڭ تالابىن قاناعاتتاندىردى. تۇرعىن ءۇي-كوممۋنالدىق شارۋاشىلىق ءبولىمى مەن تۇرعىن ءۇي ينسپەكتسياسىنا تۇرعىن ءۇي كەزەگىندە تۇرعان كوپبالالى انانىڭ كەزەگىن قالپىنا كەلتىرۋدى مىندەتتەدى.
تاعى ءبىر كوپبالالى انا ءدال وسىنداي زاڭسىزدىقپەن بەتپە-بەت كەلدى. جەتى بالاسى بار «التىن القالى» انا 2016 جىلى تۇرعىن ءۇي كەزەگىنە تۇرعان. الايدا ماقات اۋدانىنىڭ اكىمدىگى كۇيەۋىنىڭ اتىنا تىركەلگەن ءۇيدى سىلتاۋراتىپ, كوپبالالى انانى باسپانا الۋ كەزەگىنەن سىزىپ تاستاعان. كوپبالالى انا اكىمدىكتىڭ بۇل ۇيعارىمىمەن كەلىسپەي, اتىراۋ وبلىستىق مامانداندىرىلعان اۋدانارالىق اكىمشىلىك سوتىنا شاعىم ءتۇسىردى.
«2016 جىلى 7 بالانىڭ اناسى تۇرعىن ءۇي كوميسسياسىنىڭ شەشىمىمەن «مۇگەدەك بالالارى بار نەمەسە ولاردى تاربيەلەپ وتىرعان وتباسىلار» ساناتىنا الىنىپ, مەملەكەتتىك تۇرعىن ءۇي قورىنان مۇقتاج ازاماتتارعا باسپانا الۋ كەزەگىنە قويىلعان. الايدا 2 جىلدان كەيىن تۇرعىن ءۇي كوميسسياسى كوپبالالى انانى اتىراۋ وبلىسىنىڭ ماقات اۋدانىندا كۇيەۋىنىڭ اتىنا تىركەلگەن ءۇيىن العا تارتىپ, كەزەكتەن شىعارعان. وسىعان بايلانىستى ايەل اتىراۋ وبلىستىق مامانداندىرىلعان اۋدانارالىق سوتىنا شاعىم ءتۇسىردى. شاعىمدا ماقات اۋدانىنىڭ اكىمىنە, تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى بولىمىنە وزىنە قاتىستى حاتتامالىق شەشىمنىڭ ءبىر بولىگىن زاڭسىز دەپ تانۋ, «مۇگەدەك بالالارى بار نەمەسە ولاردى تاربيەلەپ وتىرعان وتباسىلار» ساناتىنداعى الەۋمەتتىك قورعالاتىن وسال توپتارعا جاتاتىن تۇرعىن ۇيگە مۇقتاج رەتىندەگى بۇرىنعى كەزەگىن قالپىنا كەلتىرۋدى مىندەتتەۋ تۋرالى تالابىن قويدى», دەپ مالىمدەدى سوتتىڭ ءباسپاسوز قىزمەتى.
جەرگىلىكتى سوت ءىستى زەرتتەي كەلە, بىرنەشە جايتتى انىقتادى. بىرىنشىدەن, تالاپ قويۋشىنىڭ كوپبالالى انا ەكەنى راستالعان. ەكىنشىدەن, 7 بالانى ومىرگە اكەلىپ, تاربيەلەگەنى ءۇشىن «التىن القامەن» ماراپاتتالعان. ۇشىنشىدەن, ونىڭ وتباسى «مۇگەدەك بالالارى بار نەمەسە ولاردى تاربيەلەپ وتىرعان وتباسىلار» ساناتىنداعى حالىقتىڭ الەۋمەتتىك وسال توپتارىنا جاتاتىنى انىقتالىپ وتىر.
«سوت تالاپ قويۋشىنىڭ وتباسىمەن بىرگە تۇراتىن ءۇيى ماقات اۋىلىنان 22 شاقىرىم جەردە ورنالاسقاندىقتان, مۇمكىندىگى شەكتەۋلى بالانى ۇيدە وقىتۋ ءۇشىن وبلىس ورتالىعىنان پاتەر جالداۋعا ءماجبۇر بولعانىن ەسكەردى. «تۇرعىن ءۇي قاتىناستارى تۋرالى» زاڭنىڭ 73-بابى 1-تارماعىنىڭ تالاپتارىنا سايكەس «التىن القا» القاسىنىڭ يەگەرى مەملەكەت ەسەبىنەن تۇرعىن ءۇي العانعا دەيىن ەسەپتەن شىعارۋعا جاتپايدى», دەدى سوتتىڭ ءباسپاسوز قىزمەتى.
اتىراۋ وبلىستىق مامانداندىرىلعان اۋدانارالىق اكىمشىلىك سوتى وسىعان بايلانىستى كوپبالالى انانىڭ تالابىن ءىشىنارا قاناعاتتاندىردى. اكىمدىك ءبولىمىنىڭ تالاپ قويۋشىعا قاتىستى حاتتامالىق شەشىمىنىڭ ءبىر بولىگى زاڭسىز دەپ تانىلىپ, كۇشى جويىلدى. بولىمگە تالاپ قويۋشىنىڭ بۇرىنعى كەزەگىن «مۇگەدەك بالالارى بار نەمەسە ولاردى تاربيەلەپ وتىرعان وتباسىلار» ساناتىنداعى حالىقتىڭ الەۋمەتتىك وسال توپتارى تىزىمىنە ەنگىزۋدى قالپىنا كەلتىرۋگە مىندەتتەلدى.
ال جوعارعى سوتتتىڭ اكىمشىلىك ىستەر جونىندەگى سوت القاسى جەرگىلىكتى سوتتىڭ قورىتىندىسىمەن تولىق كەلىستى. ءسويتىپ, جاۋاپكەرلەردىڭ كاسساتسيالىق شاعىمىن قاناعاتتاندىرۋسىز قالدىردى.
اتىراۋ وبلىسى
