سۋرەت: ru.freepik.com
وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى التىنگۇل ايمۇراتوۆانىڭ ايتۋىنشا, بيىل جەرگىلىكتى بيۋدجەت ەسەبىنەن رەسەي فەدەراتسياسىندا شىعارىلعان «گريپپول پليۋس» ۆاكتسيناسىنىڭ 65 000 دوزاسى ساتىپ الىنعان. ويتكەنى تۇماۋدى جۇقتىرماۋدىڭ بىردەن-ءبىر جولى – ۆاكتسينا ەكتىرۋ.
«تۇماۋعا قارسى ماۋسىمدىق ۆاكتسيناتسيالاۋ 15 قىركۇيەكتە باستالدى. وسى كەزگە دەيىن 59 510 ادام تۇماۋعا قارسى ۆاكتسينا ەكتىردى. ونىڭ ىشىندە 1 023 ادام ۆاكتسينانى جۇمىس بەرۋشى ەسەبىنەن العان. ۆاكتسينا سالدىرعانداردىڭ اراسىندا 2 594 جۇكتى ايەل, 13 134 بالا بار», دەيدى ا.ايمۇراتوۆا.
ينفەكتسيونيست-دارىگەر اينۇر قازيەۆانىڭ ايتۋىنا قاراعاندا, تۇماۋ يممۋنيتەتى السىرەگەن ادامدارعا تەز جۇعادى. اسىرەسە بالالار مەن ەگدە جاستاعىلار ءجيى شالدىعادى.
«بالالار مەن ەگدە جاستاعى ادامداردا سيمپتومدار جىلدام ءوربۋى, ءتىپتى زاردابى اۋىر بولۋى مۇمكىن. كەيبىر جاعدايدا تۇماۋدىڭ سالدارىنان برونحيت, پنەۆمونيا, گايموريت سىرقاتى اسقىنادى. ال ەگدە جاستاعى ناۋقاستاردا استما, قانت ديابەتى, جۇرەك اۋرۋى سەكىلدى سوزىلمالى اۋرۋلاردىڭ ورشۋىنە اكەلىپ سوقتىرادى. تۇماۋ قوعامدىق ورىنداردا, مەكتەپتەردە, كەڭسەلەردە تەز جۇعادى. سول سەبەپتەن, تۇماۋدى جۇقتىرماۋدىڭ ەڭ ءتيىمدى جولى – جىل سايىن ەكپە الۋ», دەپ مالىمدەدى ا.قازيەۆا.
سونداي-اق مۇنايلى وڭىردە كوكجوتەلدىڭ تارالۋ دەرەگى كوبەيگەنى بايقالادى. اتىراۋ وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ا.ايمۇراتوۆانىڭ مالىمەتىنشە, جىل باستالعالى بۇل دەرتتىڭ 144 جاعدايى تىركەلىپتى. ناۋقاستىڭ باسىم بولىگى اتىراۋ قالاسىندا انىقتالعان.
«كوكجوتەل – جۇقپالى ينفەكتسيالىق دەرت. ونى Bordetella pertussis باكتەرياسى قوزدىرادى. بۇل اۋرۋ, اسىرەسە, بالالارعا قاۋىپتى بولۋى مۇمكىن. وڭىردە كوكجوتەلدىڭ كوپ تىركەلۋى اتالعان ينفەكتسيانىڭ تارالۋ قارقىنى جوعارى ەكەنىن كورسەتەدى. تۇرعىندار كوكجوتەلدەن قورعانۋدىڭ ەڭ ءتيىمدى ادىستەرىنىڭ ءبىرى ۆاكتسينا سالدىرۋ ەكەنىن ەسكەرمەيدى. ۆاكتسينانى تۇراقتى العان ادامدا جۇقپالى اۋرۋلاردىڭ جۇعۋ قاۋپى تومەن بولادى. قوعامدىق ورىنداردا جەكە گيگيەنا شارالارىن ساقتاۋعا ءمان بەرۋ قاجەت. بۇل دا اۋرۋدىڭ تارالۋىن تومەندەتۋگە ىقپال ەتەدى», دەيدى ا.ايمۇراتوۆا.
اتىراۋ وبلىستىق فتيزيوپۋلمونولوگيا ورتالىعىنىڭ ستاتيستيكا جۇرگىزەتىن دارىگەرى الماس قۇماروۆتىڭ دەرەگىنە قاراعاندا, بيىل 9 ايدا 231 ادام تۋبەركۋلەز دەرتىنە شالدىققان. كۇرك-كۇرك جوتەلىپ, قان تۇكىرەتىن ناۋقاستار سانى وتكەن جىلعى كورسەتكىشتەن 15 ادامعا عانا ازايعان. دەگەنمەن تۋبەركۋلەزدىڭ تارالۋ كورسەتكىشى 7,6 پايىزدى قۇراعان.
«بىلتىرعى 9 ايدا تۋبەركۋلەزبەن اۋىرعان 246 ادام انىقتالعان ەدى. ال بيىل وسى دەرتتى جۇقتىرعان ناۋقاستار ازايدى. ءولىم كورسەتكىشى دە وتكەن جىلمەن سالىستىرعاندا 18,6 پايىزعا تومەندەدى. جۇقپالى اۋرۋدىڭ الدىن الۋ ماقساتىندا 4 679 ادام دياسكينتەستىدەن وتكىزىلدى. ونىڭ ىشىندە 2 256 بالا مەن 310 ءجاسوسپىرىم بار. ەرەسەكتەر سانى – 2113», دەپ حابارلادى ا.قۇماروۆ.
دارىگەردىڭ مالىمەتىنشە, اۋىرىپ جۇرگەن ناۋقاستارمەن قارىم-قاتىناستا بولعان 1 430 ادام تەكسەرىلگەن. وكپەسىندە دەرتى بار ناۋقاستارمەن بايلانىس ورناتقانداردىڭ اراسىندا 73 بالا, 650 ءجاسوسپىرىم, 707 ەرەسەك ادام بولعان. سونداي-اق قاۋىپ-قاتەر توبىنا جاتاتىن 3 مىڭعا جۋىق ادام باقىلاۋعا الىنعان.
اتىراۋ وبلىسى
