بىرىڭعاي پاكەت قانداي وزگەرىس اكەلەدى؟

جاڭا رەفورمانىڭ كوزدەگەنى نە؟

ا.ءالنازاروۆانىڭ ايتۋىنشا, مەدي­تسي­نالىق ساقتاندىرۋ رەفورماسى ايا­سىندا كەپىلدەندىرىلگەن تەگىن مەديتسينا­لىق كومەككە كىرەتىن الەۋمەتتىك ماڭىزى بار 13 اۋرۋ ءتۇرىنىڭ تەك التاۋى عانا تمككك پاكەتىندە قالادى. بۇل: تۋبەركۋلەز, ونكولوگيا, ايتۆ, جيتس, گەپاتيت, سيرەك كەزدەسەتىن اۋرۋلار. قالعان 7 اۋرۋ ءتۇرى بىرتىندەپ ءمامس-كە بەرىلۋى كەرەك.

ەلىمىزدەگى الەۋمەتتىك ماڭىزى بار اۋرۋ­لاردىڭ تىزىمىنە تۋبەركۋلەز, ادامنىڭ يم­مۋن تاپشىلىعى ۆيرۋسىنان (ايتۆ) تۋىن­­داعان اۋرۋ, سوزىلمالى ۆيرۋستىق گەپا­تيت­­­تەر مەن باۋىر تسيرروزى, قاتەرلى ىسىكتەر, قانت ديابەتى, پسيحيكالىق, مىنەز-قۇ­لىق بۇزى­لىستارى (اۋرۋلارى), تسەرەبرال­دى سال اۋرۋى, جەدەل ميوكارد ينفارك­تىسى, رەۆ­ماتيزم, دانەكەر ءتىننىڭ جۇيەلى زاقىم­دانۋ­لارى, جۇيكە جۇيەسىنىڭ دەگەنەراتسيا­لىق اۋرۋلارى, ورتالىق جۇيكە جۇيەسىنىڭ ميەلينسىزدەندىرۋشى اۋرۋلارى, سيرەك كەزدەسەتىن اۋرۋلار كىرەدى.

«نەگىزگى مىندەت – ەشكىمدى مەديتسينا­لىق كومەكسىز قالدىرماۋ. ەكىنشى مىندەت – ازاماتتاردى مەديتسينالىق ساقتان­دىرۋ جۇيەسىنە بارىنشا تارتۋ, ولار دا ءوز دەنساۋلىعى الدىندا مىندەتتەمە الۋى كەرەك», دەدى مينيستر.

ەل تۇرعىندارىنا ارنالعان وتاندىق مەديتسينالىق قىزمەتتەر بۇگىندە ەكى پاكەتكە بولىنگەن – «تەگىن مەديتسينالىق كومەكتىڭ كەپىلدىك بەرىلگەن كولەمى», «مىندەتتى الەۋمەتتىك مەديتسينالىق ساقتاندىرۋ». ال الەۋمەتتىك اۋرۋعا كۇدىكتى ناۋقاستار مىندەتتى مەديتسينا­لىق ساقتاندىرۋ جارناسىن تولەمەسە ولارعا تەگىن دياگنوستيكادان ءوتۋ قۇقىعى بەرىلمەيدى. مەملەكەت باسشىسىنىڭ تاپسىرماسىنا سايكەس بۇل كەمشىلىك الداعى ۋاقىتتا جويىلۋى, مەديتسينانى قارجىلاندىرۋ دۇرىس قۇرىلىمدالۋى قاجەت.

ايماقتارعا نەسىمەن ءتيىمدى؟

مينيسترلىك تاراتقان اقپاراتتارعا سۇيەنسەك, ەلىمىزدە مەديتسينالىق كو­مەكتىڭ بىرىڭعاي پاكەتى 2027 جىلى ىسكە قو­سىلادى. تەگىن مەديتسينالىق كومەكتىڭ كەپىلدىك بەرىلگەن كولەمىن مىندەتتى الەۋمەتتىك مەديتسينالىق ساقتاندىرۋ شەڭبەرىندە كورسەتىلەتىن قىزمەتتەرگە قوسۋ 2025 جىلدان قاراستىرىلا باستايدى. مەديتسينالىق كومەكتىڭ بىرىڭعاي پاكەتى مەديتسينالىق كومەك الاتىن تۇرعىندارعا, سونىڭ ىشىندە وڭىرلەردە تۇراتىن ازاماتتارعا نەسىمەن ءتيىمدى بولادى؟ بۇل ساۋالعا پاۆلودار وبلىستىق دەنساۋلىق ساقتاۋ باسقارماسىنىڭ باسشىسى ءانۋار بۇيراشەۆ جاۋاپ بەردى.

– بىرىڭعاي پاكەتكە تمككك-نىڭ ەڭ از پاكەتى كىرەدى: جەدەل, پاللياتيۆتىك كو­مەك, الەۋمەتتىك ماڭىزى بار اۋرۋلارعا كۇدىك تۋىنداعان جاعدايداعى كومەك, امبۋلاتوريالىق ءدارى-دارمەكپەن قام­تاماسىز ەتۋ, ساقتاندىرىلماعاندارعا شۇعىل ستاتسيونارلىق كومەك. ال ءمامس بازالىق پاكەتى مەديتسينالىق كو­مەكتىڭ وزگە بارلىق (سوزىلمالى اۋرۋلار مەن الەۋمەتتىك ماڭىزى بار اۋرۋ­لارعا كومەك كورسەتۋدى قوسا العاندا) تۇر­لەرىن قامتيدى. ۇسىنىلعان مودەل قار­جىلاندىرۋ كولەمى جونىندە ءمامس – 70%, تمككك – 30% اراقاتىناسىن قامتاماسىز ەتەدى دەپ كۇتىلىپ وتىر. ەڭ اۋەلى ءمامس پاكەتىنە ديناميكالىق باقىلاۋعا جاتاتىن سوزىلمالى اۋرۋلار, الەۋمەتتىك ماڭىزى بار اۋرۋلاردىڭ جەتى توبى, العاشقى مەديتسينالىق-سانيتارلىق كومەك بىرتىندەپ بەرىلەدى. بۇل جەردە وڭىرلەردىڭ تۇرعىندارىنا كوپتەگەن ارتىقشىلىقتار تۋىندايدى. ونكولوگيالىق سكرينينگتەر پاتسيەنتتىڭ ساقتاندىرۋ مارتەبەسىنە قاراماستان بارشا ازاماتتارعا تەگىن بولادى. بارلىق الەۋمەتتىك ماڭىزى بار اۋرۋلار جونىندە كۇدىك تۋىنداعان جاعدايدا تەكسەرۋلەر پاتسيەنتتىڭ ساقتاندىرۋ مارتەبەسىنە قاراماستان تەگىن جۇرگىزىلەدى. بۇل جەردە كەيبىر تۇرعىنداردا «مەديتسينالىق ساقتاندىرۋعا اقى تولەمەسەم, ماعان مەديتسينالىق كومەك كورسەتپەيدى» دەگەن قورقىنىش تۋىنداۋى مۇمكىن. وزگەرىس وعان جول بەرمەيدى. كەرىسىنشە, ايماقتاردا ءمامس ارقىلى ادامدارعا قىزمەت كورسە­تىپ وتىرعان مەديتسينالىق ۇيىمدارعا تۇسەتىن قاراجات كوبەيەدى. قارجىلان­دى­رۋ ۇلعايسا, مۇمكىندىك تە كوبەيەتىنى ءسوز­سىز. ياعني مەديتسينالىق كومەكتىڭ بىرىڭ­عاي پاكەتىن ەنگىزۋ مەديتسينالىق كومەك­كە قول جەتكىزۋدەگى تەڭسىزدىكتى شەشىپ, مەديتسينالىق ۇيىمداردى نەعۇرلىم اشىق قارجىلاندىرۋعا مۇمكىندىك بەرەدى, – دەپ ءتۇسىندىردى باسقارما باسشىسى.

ءوڭىر مەديتسيناسىنداعى كۇرمەۋلى ماسەلە

«الەۋمەتتىك مەديتسينالىق ساقتاندىرۋ قورى» كەاق پاۆلودار وبلىسى بويىنشا فيليالىنىڭ باسشىسى جانگەلدى شايىمبەتوۆتىڭ پىكىرىنشە, بىرىڭعاي پاكەت وڭىرلەردەگى مەديتسينالىق ۇيىمداردىڭ دامۋىنا ۇلكەن مۇمكىندىكتەر تۋدىرادى. سەبەبى ءمامس ارقىلى كورسەتىلەتىن قىزمەتتەردىڭ سانى وسكەن سايىن ولاردىڭ الاتىن قاراجاتتارى دا كوبەيەدى.

– ەرتىس-بايان وڭىرىندەگى دەنساۋلىق ساقتاۋ سالاسىندا نەگىزگى ءۇش ماسەلە بار. ەڭ اۋەلى, مەديتسينالىق ۇيىمداردىڭ تسيفرلانۋى كەنجەلەپ تۇر. ناقتى ساپاعا قول جەتكىزۋدە بارلىق اقپاراتتار مەيلىنشە قولجەتىمدى بولۋى كەرەك. ەكىنشى ماسەلە, مەديتسينالىق ۇيىمدار اراسىنداعى مالىمەتتەردىڭ كىرىكتىرىلمەۋى. ۇيىمداردىڭ قولداناتىن اقپاراتتىق جۇيەلەرى ءارتۇرلى بولعاندىقتان, قىزمەتتەر مەن پاتسيەنتتەردىڭ اۋرۋلارىنا قاتىستى اقپاراتتاردى الماسا المايدى. سوڭعىسى, مەديتسينالىق مامانداردىڭ تاپشىلىعى. بۇل ماسەلە پاتسيەنتتەر تاراپىنان ارىز-شاعىمنىڭ جيىلەۋىنە سەبەپ فاكتوردىڭ ءبىرى. دەنساۋلىق ساقتاۋ مينيسترلىگى مەن جەرگىلىكتى اتقارۋشى ورگاندار وسى ماسەلەلەردىڭ شەشىلۋىنە باسىمدىق بەرگەنى ءجون. ال مەديتسينالىق ۇيىمدارعا قور تاراپىنان تولەم جاساۋ بۇرىنعىشا دەنساۋلىق مينيسترلىگى بەكىتكەن تاريفكە سايكەس جۇرگىزىلە بەرەدى. ولاردىڭ كورسەتكەن قىزمەتى اقپاراتتىق جۇيەلەر ارقىلى بىزگە تۇسەدى. بۇل جەردە بىردەن قاراجات اۋدارۋ دەگەن ءسوز جوق. اۋەلى فيليالداعى مەديتسينالىق كومەكتىڭ ساپاسىن باعالاۋ جانە شارتتىق مىندەتتەمەلەردى مونيتورينگتەۋ ءبولىمى كورسەتىلگەن قىزمەت ساپاسىن تەكسەرەدى. وندا 16 تاجىريبەلى ساراپشى جۇمىس ىستەيدى. ماماندارىمىز بارلىعىن ساپالى تەكسەرىپ شىققان سوڭ, ناتيجەگە وراي قىزمەت قاراجاتى تولەنەدى, – دەيدى فيليال باسشىسى.

تۇرعىنداردىڭ ءمامس-كە اۋداراتىن جارنالارى قورعا ەمەس, بىردەن ۇلتتىق بانكتىڭ ەسەپشوتتارىنا تۇسەدى. قور – وسى قاراجاتتى كورسەتىلگەن قىزمەتتەرگە بولەتىن وپەراتور عانا. ماماندار شاعىممەن وتە كوپ جۇمىس ىستەيدى. ەگەر ەمدەلۋشىگە مەديتسينالىق مەكەمەدە بەيىندى دارىگەرگە, كەيبىر مەديتسينالىق اناليزدەرگە جولداما بەرمەسە نەمەسە قىزمەتتى اقىلى الۋعا جىبەرسە, ت.ب. ماسەلەلەرگە كەزىكسە, بىردەن سول ۇيىمداعى «پاتسيەنتتەردى قولداۋ» قىزمەتىنە جۇگىنۋى كەرەك. ال ول جەردەن ماردىمدى جاۋاپ بولماسا, قورعا شاعىمدانعانى ابزال. شاعىم نەگىزدى بولسا جوسپاردان تىس مونيتورينگ جۇرگىزىلەدى. بۇدان بولەك, اعىمداعى, جوسپاردان تىس, نىسانالى, پرواكتيۆتى مونيتورينگ تۇرلەرى بار.

ستاتيستيكالىق دەرەكتەرگە دەن قويساق, ءمامس جۇيەسى ەنگىزىلگەلى ايماقتىڭ دەنساۋلىق ساقتاۋ بيۋدجەتى ەكى ەسە وسكەن. 2019 جىلى ول 42,5 ملرد تەڭگەنى قۇراسا, قازىر بۇل كورسەتكىش 101,1 ملرد تەڭگەگە جەتىپ وتىر. مەديتسينالىق وڭالتۋ مەن كونسۋلتاتسيالىق-دياگنوستيكالىق كومەك كورسەتۋگە 15 ەسە كوپ قاراجات ءبولىنىپ, ءمامس ارقىلى تولەنەتىن جوعارى تەحنولوگيالىق وپەراتسيالاردىڭ 28 ءتۇرى ورىندالىپ جاتىر. وڭىردە جىلدىڭ العاشقى 8 ايىندا جالپى قۇنى 1 ملرد تەڭگەدەن اساتىن سوماعا وپەراتسيالار جۇرگىزىلگەن. ءبىر وپەراتسيانىڭ قۇنى – 1-10 ملن تەڭگە ارالىعىندا. قورمەن شارت جاساسقان, ياعني ءمامس-تەن اقشا الىپ, تۇرعىندارعا مەديتسينالىق قىزمەت كورسەتۋ جاۋاپكەرشىلىگىن يەلەنگەن مەكەمەلەر سانى – 72. ولاردىڭ 32-ءسى عانا مەملەكەتتىك مەكەمەلەر.

ءمامس قاراجاتى مايشەلپەك ەمەس

ءمامس ارقىلى وڭىردەگى ەمدەۋ ۇيىم­دارىن قارجىلاندىرۋدىڭ ەڭ ۇل­كەن ۇلە­سى باستاپقى ەمحانالىق دەڭگەي­دەگى كومەك (65) پەن ستاتسيونارلىق جاع­داي­داعى مامانداندىرىلعان مەديتسي­نا­لىق كومەككە (24%) تيەسىلى. ال كونسۋل­تا­تسيالىق-دياگنوستيكالىق كومەكتىڭ ۇلەسى – 14,2%.

– ءبىزدىڭ ماماندار جىلدىڭ العاشقى 8 ايىندا ەمدەۋ ۇيىمدارىنىڭ قىزمەت كورسەتۋ ساپاسىنا بايلانىستى 43 070 اقاۋدى انىقتادى. ناتيجەسىندە, 634,8 ملن تەڭگەگە ەكونوميكالىق ىقپال ەتۋ شارالارىن قولداندىق. بۇل ماسەلە بار­لىق مەكەمەلەرگە قاتىستى. ال جىل باسىنان ولاردىڭ قىزمەتىنە تۇرعىندار تاراپىنان 877 شاعىم ءتۇستى. بىلتىر ءدال وسى كەزەڭدەگى شاعىمدار سانى 949 بولعان. كورسەتكىشتىڭ جاعىمدى جاققا قاراي وزگەرۋىنە مەديتسينالىق مەكەمەلەردە ساپا بولسا, قارجى كوبىرەك تۇسە­تىنىن تۇسىنە باستاعانى اسەر ەتتى, – دەيدى ج.شايىمبەتوۆ.

جالپى, بۇگىندە پاۆلودار وبلى­سىن­داعى تۇرعىنداردىڭ 85,4%-ى نەمەسە 650 مىڭ­نان استام ادام ساقتاندىرىلعان. بۇلار­­دىڭ ىشىندە 400 مىڭ ازامات – 15 جە­ڭىلدىك ساناتىنا كىرەدى, ولارعا تيەسىلى جارنالاردى مەملەكەت تولەپ وتىر. ال قال­عان 250 مىڭ ادام – قىزمەتكەرلەر, جۇمىس بەرۋشىلەر, ءوزىن ءوزى جۇمىسپەن قامتۋشىلار, ەكونوميكالىق تۇرعىدان بەل­سەندى ازاماتتار.

مەملەكەت باسشىسى ساقتاندىرىلماعان ازاماتتاردىڭ سانىن ازايتۋ تۋرالى تاپسىرما جۇكتەگەنى ءمالىم. ماماندار بۇل باعىتتا جۇمىس جۇرگىزە كەلە, جىل باسىنان جاڭادان 21 377 ادامدى ساقتاندىرعان. بىراق وبلىستا ءالى دە 111 مىڭنان استام ادام ساقتاندىرىلماعان. قازىر بۇل ماسە­لەنى شەشۋگە قور مەن وبلىس بيلىگى بىرلەسە جۇمىس جاساپ جاتىر.

وسى ورايدا كەيبىر تۇرعىنداردىڭ كوكەيىندە: «قول-اياعىم ساۋ, ەشقاشان مە­ديتسينالىق ۇيىمنىڭ تابالدىرىعىنان اتتاپ كورمەپپىن. ەندەشە مەن قورعا نەلىكتەن اي سايىن جارنا اۋدارىپ تۇ­رۋىم كەرەك؟» دەگەن ساۋالدىڭ تۋىنداي­تىنى جاسىرىن ەمەس. بۇل سۇراققا دا ج.شايىمبەتوۆ تولىمدى جاۋاپ قاي­تاردى: «جالپى, ءمامس جۇيەسى دەنى ساۋ ادامنىڭ ءوز جارناسى ەسەبىنەن وزگە ناۋ­قاس ادامعا كومەكتەسۋى قاعيداسى نەگىزىن­دە جۇرگىزىلەتىنى راس. كەيبىر ادامدارعا ءمامس-كە دەيىن كوپتەگەن مەديتسينالىق كومەك پەن قىزمەت تۇرلەرى قولجەتىمسىز ەدى. قازىر وڭالتۋ شارالارىنا ناۋقاستار كەز كەلگەن ۋاقىتتا بارا الادى. جىل باسىنان 6 مىڭعا جۋىق ادام وڭالتۋدان وت­كەن, سونىڭ ىشىندە مي قان اينالىمىنىڭ بۇزىلۋى بار پاتسيەنتتەردىڭ 85,2%-ى ءوز دەنساۋلىقتارىن تۇزەدى. مۇنىڭ سىرتىندا «اڭساعان ءسابي» باعدارلاماسى اياسىندا 3 جىل ىشىندە پاۆلودار وبلىسىندا 180-گە جۋىق بالا دۇنيەگە كەلدى. بيىل ءمامس شەڭبەرىندە ەكۇ-عا تاعى 266 كۆوتا ءبولىن­دى. قارجىلاندىرۋ مەديتسينالىق كومەكتىڭ­ 2 مىڭنان استام تۇرىنە جۇرگىزىلەدى. وسى­نىڭ بارلىعى ايماقتاعى مەديتسينالىق قىزمەت تۇرلەرىنىڭ كوپشىلىككە قولجەتىم­دى بولا تۇسكەنىنىڭ ايعاعى. قور فيليا­لى الەۋمەتتىك ءال-اۋقاتى داعدارىس جاع­دايىنداعى ازاماتتاردى ءمامس جۇيەسىنە تارتۋمەن اينالىسىپ جاتىر. «ە» سانا­تىنا كىرەتىن ازاماتتار انىقتالىپ, ولار­دىڭ تۇرعىلىقتى جەرى, الەۋمەتتىك مار­تەبەسى, ساقتاندىرۋ مارتەبەسىنىڭ بولماۋ سەبەپتەرىنە ەگجەي-تەگجەيلى تالداۋ جاسالدى. قازىرگى ۋاقىتتا «ە», «D» ساناتىنداعى ازاماتتاردىڭ ساقتاندىرۋ جارنالارىن بيۋدجەت ەسەبىنەن تولەۋ ارقىلى ولاردى جۇيەگە تارتۋ جايى قاراستىرىلىپ وتىر».

قارىزعا باتقان مەكەمەلەر

بۇعان دەيىن پاۆلودار وبلىسىن­داعى بىرنەشە ەمدەۋ مەكەمەسى كرەدي­تور­لىق قارىزعا بەلشەسىنەن باتىپ وتىر­عانى تۋرالى ماسەلە كوتەرگەنبىز. انىقتا­عانىمىزداي, مەديتسينالىق مەكە­مەلەردىڭ كرەديتورلىق بەرەشەكتەرى ۇيىمداردىڭ باسىم بولىگىنە ءتان ءارى بۇل ءۇردىس ءبىراز جىلدان بەرى جالعاسىپ كەلە جاتقانى بايقالادى. بۇعان دالەل – وڭىرلىك دەنساۋ­لىق ساقتاۋ باسقارماسىنان الىنعان مىنا رەسمي جاۋاپ:

«2022 جىلدىڭ قىركۇيەگىنەن باس­تاپ دەنساۋلىق ساقتاۋ باسقارماسى باس­شىسىنىڭ بۇيرىقتارى نەگىزىندە ماي, ۋسپەن اۋداندىق اۋرۋحانالارىنىڭ, №1 پاۆلودار قالالىق اۋرۋحاناسىنىڭ (ەكى رەت), ەكىباستۇز قالالىق اۋرۋحاناسى­نىڭ كرەديتورلىق بەرەشەگىن تومەندەتۋ بويىنشا ادىسنامالىق كومەك كورسەتۋ جونىندەگى جۇمىس توبىنىڭ ساپارلارى جۇزەگە اسىرىلدى. توپ جوعارى­دا اتالعان اۋرۋحانالاردىڭ نەگىزگى كور­سەتكىشتەرىنە تالداۋ جۇرگىزدى, كرە­ديتورلىق بەرەشەكتىڭ وسۋىنە اكەپ سوق­تىراتىن بىرقاتار سەبەپ انىقتالدى. كاسىپ­ورىندار اكىمشىلىگىنە بەرەشەكتىڭ ءوسۋىن تومەندەتۋگە قاتىستى ءىس-شارالار قابىلداۋ جونىندە ۇسىنىس­تار بەرىلدى. ۋاقتىلى قابىلدانعان شارا­لارعا ساي­كەس 2023 جىلدىڭ سوڭىنا قاراي كرە­ديتورلىق بەرەشەكتى تولىعىمەن 3 مەديتسينالىق ۇيىم (ەرتىس, ماي, تەرەڭكول اۋداندىق اۋرۋحانالارى) وتە­سە, 4 مەديتسينالىق ۇيىم ايتارلىق­تاي قىسقارتتى (ۋسپەن, جەلەزين, اققۋلى اۋداندىق اۋرۋحانالارى مەن پاۆلو­دار وبلىستىق بالالار اۋرۋحاناسى)».

باسقارما بۇعان قوسا كرەديتورلىق بەرەشەكتىڭ وسۋىنە سەبەپ بولاتىن فاكتورلاردى كەلتىردى: ۋرگەنتتىك, جوعارى شۇعىلدىق (جۇمىس رەجىمى 24/7); كاسىپ­ورىنداردىڭ قابىلداۋ بولىمشەسىنە قا­تىستى تىكەلەي شىعىندارى; جانساق­تاۋ بولىمشەسىندەگى قىزمەتتەر بويىن­شا وتەلمەيتىن شىعىندار, اقىسىز سيمۋلياتسيالىق وپەراتسيالار, گيستو­لو­گيا­لىق زەرتتەۋلەرگە اقى تولەۋ.

قازىرگى ۋاقىتتا پاۆلودار وبلىسىن­دا كرەديتورلىق بەرەشەك 5 مەديتسينا­لىق ۇيىمدا بار, ولاردىڭ جالپى سوما­سى 4 ملرد 545,3 ملن تەڭگەنى قۇراي­دى («№1 پاۆلودار قالالىق اۋرۋحاناسى», «ەكىباستۇز قالالىق اۋرۋحاناسى», «№3 پاۆلودار قالالىق اۋرۋحاناسى», «پاۆ­لودار وبلىستىق بالالار اۋرۋحاناسى», «پاۆلودار قالاسىنىڭ №5 ەمحاناسى»). دەنساۋلىق ساقتاۋ باسقارماسى اتال­عان ۇيىمداردىڭ ءبىرىنشى باسشىلارىن تارتىپتىك جاۋاپكەرشىلىككە تارتۋ جۇر­گىزىلىپ جاتىر دەپ مالىمدەدى.

ماماندار بۇل ماسەلەگە ەمدەۋ ۇيىم­­دارىنىڭ قارجىسى ەش باقىلان­باي­تىنى سەبەپ دەيدى. ياعني ەمدەۋ ۇيىم­دارىنداعى قاراجاتقا, سىرتتان ساتىپ الۋلار جۇرگىزۋ كولەمىنە قاداعالاۋ جۇر­گىزىلمەيدى. وعان زاڭ رۇقسات بەرمەيدى. سال­دارىنان مەملەكەتتىك مەديتسينا­­لىق ۇيىم­داردىڭ كرەديتورلىق قارىزى ­وسە بەرەدى. بۇل ماسەلە 2027 جىلى ەنگى­زى­لەتىن مەديتسينالىق كومەكتىڭ بىر­ىڭ­عاي پاكەتىندە قاراستىرىلىپ, باقى­­لاۋ تەتىك­تەرى ۇيىمداستىرىلعانى ابزال. سەبەبى بۇگىندە ءمامس ارقىلى پاۆ­لو­دار وبلىسىنا كەلەتىن قاراجاتتىڭ ­­70 پا­­­يىزىن مەملەكەتتىك ەمدەۋ ۇيىم­دارى يەلەنىپ وتىر.

پاۆلودار وبلىسى