وليمپيا ويىندارىنىڭ باعدارلاماسىنا ەنبەگەنىمەن, سامبو كۇرەسىنە قىزىعۋشىلاردىڭ قاتارى قالىڭ. «سامبو فەدەراتسياسى بىرنەشە جىلدان بەرى اۋقىمدى جارىستاردىڭ ۇيىمداستىرىلۋىنا, سپورتشىلاردىڭ الەمدىك دودالارعا قاتىسۋىنا ەكپىن بەرىپ كەلەدى. بۇگىندە ەلىمىزدە 43 مىڭنان استام ادام وسى كۇرەس تۇرىمەن كاسىبي شۇعىلدانادى», دەيدى سامبو فەدەراتسياسىنىڭ باس حاتشىسى ەرنازار بەكسۇلتانوۆ.
سامبو كۇرەسىنەن 1973 جىلى يران ەلىندە تۇڭعىش رەت الەم چەمپيوناتى جالاۋىن كوتەردى. ارادا وتكەن 50 جىلدىڭ ىشىندە 46 رەت الەمدىك الاماندا جالاۋىمىز جەلبىرەدى. «جىل سايىنعى ەل چەمپيوناتىنان بولەك, 2022 جىلى اقتاۋدا ازيا كۋبوگى ۇيىمداستىرىلدى. بىلتىر ەلوردا تورىندە ازيا چەمپيوناتى ءوتتى. بيىلعى مامىر ايىندا اقتاۋ قالاسىندا ازيا جانە وكەانيا چەمپيوناتى ۇيىمداستىرىلىپ, دوداعا 25 ەلدەن 500-دەن استام بالۋان قاتىستى. ەندى الەم چەمپيوناتىن جوعارى دەڭگەيدە اتقارۋعا بارىمىزدى سالامىز», دەدى ە.بەكسۇلتانوۆ. باس حاتشى كەلەسى جىلدان باستاپ كلۋبتىق جۇيەنى جەتىلدىرىپ, جاستار, جاسوسپىرىمدەر, جەتكىنشەكتەر اراسىندا سامبو كۇرەسىمەن شۇعىلدانۋشىلاردىڭ قاتارىن ارتتىرۋدى كوزدەپ وتىرعاندارىن ايتتى.
سامبو فەدەراتسياسىنىڭ ءبىرىنشى ۆيتسە-پرەزيدەنتى ماناربەك بيسەكەنوۆ 19 جىلدان كەيىن ەلىمىزگە اينالىپ كەلگەن جاھاندىق دودانىڭ ماڭىزى جوعارى ەكەنىن ءمالىم ەتتى. «استانادا جالاۋى جەلبىرەيتىن الەم چەمپيوناتىندا 85 ەلدەن 600-دەن استام بالۋان قاتىسۋعا ءوتىنىشىن جولدادى. بالۋاندارمەن قاتار باپكەرلەر, دارىگەرلەر باستاعان 150-دەن اسا مامان كەلەدى», دەدى م.بيسەكەنوۆ.
الەمدىك دودانىڭ جالپى جۇلدە قورى – 311 مىڭ اقش دوللارى. چەمپيون اتانعان بالۋان – 4 مىڭ, كۇمىس جۇلدەگەر – 3 مىڭ, قولا مەدال ەنشىلەگەن بالۋاندار 2 مىڭ دوللار سىياقى الادى. زاعيپ جاندار ءۇش سالماق دارەجەسىندە سىنعا تۇسەدى. توپ جارعان, جۇلدەگەر اتانعان بالۋانعا 1000 اقش دوللارى مولشەرىندە سىياقى بەرىلەدى.
ۇلتتىق قۇرامانىڭ باس باپكەرى ءبىرجان يماحانوۆ الەم چەمپيوناتىندا بەلدەسۋگە تۇسەتىن بالۋاندار 24 قازاننان باستاپ قورىتىندى وقۋ-جاتتىعۋ جيىنىن استانا قالاسىندا وتكىزگەنىن ايتا كەلىپ: «الەم چەمپيوناتىنا ەلىمىزدەن 28 بالۋان قاتىسادى. ەرلەر دوداسىندا الەم چەمپيونى سەرىك نۇربول, ايەلدەر سىنىندا عالامدىق دودادا توپ جارعان ارايلىم ابەنوۆا, گۇلدانا المۇحانبەتوۆاعا ەرەكشە سەنىم ارتامىز», دەدى. باس باپكەر ەلىمىزدە وتەتىن چەمپيوناتتان 2 التىن مەدال ولجالاۋ مىندەتتەمەسى جۇكتەلگەنىن دە اتاپ ءوتتى.
كەلەسى جىلى قىتايدا دۇنيەجۇزىلىك جەكپە-جەك ويىندارى جالاۋىن جەلبىرەتەدى. وسىناۋ ايتۋلى دوداعا قاتىساتىن بالۋانداردىڭ ءتىزىمى الەم چەمپيوناتىنداعى ناتيجەگە وراي تۇزىلمەك.
