العاش رەت وتكەن ءدۇبىرلى دوداعا رەسپۋبليكامىزدىڭ ءار وڭىرىنەن 22 اقىن قاتىسىپ, ايتىستىڭ العاشقى كۇنى 11 جۇپ بولىپ باق سىناستى. ۇلتىمىزدىڭ بىرەگەي ونەرىن قولداۋ ماقساتىندا وقۋ-اعارتۋ ءمينيسترى عاني بەيسەمباەۆ, پارلامەنت ءماجىلىسىنىڭ دەپۋتاتتارى امانجول ءالتاي, جاناربەك ءاشىمجان, ل.ن.گۋميلەۆ اتىنداعى ەۇۋ رەكتورى ەرلان سىدىقوۆ ارنايى كەلىپ, جاس ورەندەردىڭ ونەرىنە ساتتىلىك تىلەدى.
«ايتىسقا جاس اقىنداردى بالا كەزىنەن باۋلۋ ماقساتىندا ءجۇرسىن ەرمان باسقاراتىن ايتىس اقىندارى مەن جىرشى-تەرمەشىلەردىڭ حالىقارالىق وداعى بيىلعا ارنالعان باعدارلاماسىن بەكىتكەن ەدى. سول باعدارلامادا ۇرپاق ساباقتاستىعىن ەسكەرە وتىرىپ, ءۇش ساتىلى ايتىستى وتكىزۋدى قولعا العانبىز. اۋەلگى ءبىرىنشى ساتى – «قولا دومبىرا». بۇعان سەرىكزات دۇيسەنعازى جەتەكشىلىك ەتەدى. ەكىنشى ساتى – ەركەبۇلان قاينازاروۆ جەتەكشىلىك ەتەتىن «كۇمىس دومبىرا» جوباسى. ءۇشىنشى ساتىسى – قازىرگى مايتالمان اقىندارىمىز باق سىنايتىن, جىلدا جەلتوقسان ايىندا ەلوردانىڭ تورىندە بايراعىن كوتەرەتىن «التىن دومبىرا» ايتىسى», دەدى سالتاناتتى دودانىڭ شىمىلدىعىن اشقان پارلامەنت ءماجىلىسىنىڭ دەپۋتاتى امانجول ءالتاي.
ءسوز سايىسىندا ايتىسكەر وقۋشىلار جاستارىنا ساي ادەمى ازىلدەسىپ, قوعامدىق ماسەلەلەردى دە كوتەرىپ, تاقىرىپتى دا تاپقىر جىرلاي ءبىلدى. وسىلايشا, قازىلار القاسىنىڭ شەشىمىمەن ىرىكتەلگەن 8 اقىن كەلەسى كەزەڭگە ءوتتى. ولاردىڭ اراسىنان سوڭعى سىنعا 5-سىنىپ وقۋشىسى, شىمكەنتتىك يسلام ءالي ءبىرجان ۇلى مەن 11-سىنىپ وقۋشىسى, ماڭعىستاۋلىق بەيبىت بايجىگىت سۋىرىلىپ شىعىپ, ءسوز سايىسىن جانداندىرا ءتۇستى.
ايتىستىڭ قورىتىندىسىندا شىمكەنت قالاسىنان كەلگەن يسلام ءالي ءبىرجان ۇلى توپتان وزىپ, تۇڭعىش «قولا دومبىرا» يەگەرى اتاندى. جۇلدەلى ءبىرىنشى ورىندى ماڭعىستاۋلىق بەيبىت بايجىگىت, ەكىنشى ورىندى اقتوبەلىك اراي نۇرادين مەن استانالىق ايعانىم ماقسۇتحانوۆا يەلەندى. ال ۇزدىك ۇشتىكتى الماتىدان كەلگەن ەراسىل سەيىتجان ۇلى مەن راۋان نۇرشابەكوۆ, قوستانايلىق نۇريسلام روگاتوۆ تۇيىندەدى. سۋىرىپسالما ءسوز سايىسىنا قاتىسقان وزگە اقىندارعا قانىشا رايىسوۆا, ەسەنقۇل جاقىپبەك, نارتاي بەكەجانوۆ اتىنداعى ارنايى جۇلدە مەن باعالى سىيلىقتار بەرىلدى. سونىمەن قاتار اقىنداردىڭ تالىمگەر-ۇستازدارىنا وقۋ-اعارتۋ ءمينيسترىنىڭ العىسحاتى تابىستالدى.
تاعى ءبىر قۋانارلىق جايت, جاس ايتىسكەرلەردى ماراپاتتاۋ سالتاناتىندا ءسوز العان وقۋ-اعارتۋ ءمينيسترى عاني بەيسەمباەۆ مەكتەپ وقۋشىلارى اراسىندا وتەتىن بۇل ايتىستىڭ اۋقىمىن الداعى جىلى كەڭەيتە تۇسەتىنىن ايتسا, ل.ن.گۋميلەۆ اتىنداعى ەۇۋ رەكتورى ەرلان سىدىقوۆ رەسپۋبليكالىق «قولا دومبىرا» وقۋشىلار ايتىسىنىڭ جىل سايىنعى جەڭىمپازىنا ەۇۋ ءبىلىم گرانتىن تاعايىندايتىنىن جەتكىزدى.
