سۋرەت: qaz.ulysmedia.kz
وبلىس اكىمى سەرىك شاپكەنوۆتىڭ ايتۋىنشا, ەۋرووداق ەلدەرىمەن جاسالعان سەرىكتەستىك پەن ىنتىماقتاستىق قانات جايىپ كەلەدى.
«وڭىرىمىزدە ەۋرووداق ەلدەرىمەن كوپقىرلى ىنتىماقتاستىقتى كەڭەيتۋدىڭ مۇمكىندىگى مول. سەبەبى اتىراۋ وبلىسىنىڭ گەوگرافيالىق ورنالاسۋى ءوزارا ءتيىمدى كووپەراتسيانى كەڭەيتۋگە, ساۋدا-ەكونوميكالىق, مۇناي-گاز, كولىك-لوگيستيكا سالاسىنا قولايلى. وڭىردەگى ينۆەستيتسيالىق تۇراقتىلىقتىڭ ايعاعى – ەۋروپالىق 259 كاسىپكەر ءىسىن دوڭگەلەتىپ وتىر», دەدى س.شاپكەنوۆ.
مۇنايلى وڭىرگە العاش كەلگەن ەۋروپالىق وداقتىڭ قازاقستانداعى ەلشىسى الەشكا سيمكيچتىڭ ايتۋىنشا, اتىراۋ وبلىسىمەن ساۋدا-ەكونوميكالىق قارىم-قاتىناستى ارتتىرۋ ماقساتىندا ترانسپورت سالاسىنا نازار اۋدارۋ قاجەت. ويتكەنى ەۋرووداق ەلدەرىندەگى تاۋار اينالىمىنىڭ 90 پايىزى مۇناي-گاز سەكتورىمەن تىعىز بايلانىستى.
«اسىرەسە تەڭىز پورتىمەن جۇك تاسىمالىنىڭ مۇمكىندىگىن بىلگىم كەلەدى. سەبەبى ءبىزدىڭ وسىعان بايلانىستى ارنايى جوبامىز بار», دەيدى الەشكا سيمكيچ.
بيىل قاڭتار-تامىز ايلارىندا نەگىزگى كاپيتالعا 1 303,1 ملرد تەڭگەنىڭ ينۆەستيتسياسى سالىنعان. بىلتىر وسى كەزەڭدەگى ينۆەستيتسيا كولەمى 1 785,6 ملرد تەڭگە بولعان ەدى. دەمەك, بيىلعى ينۆەستيتسيا 482,5 ملرد تەڭگەگە ازايعان. مۇنىڭ سەبەبىن وبلىستىق كاسىپكەرلىك جانە ونەركاسىپ باسقارماسىنىڭ باسشىسى پولىمبەت حاسانوۆ ءبىر عانا دەرەكپەن ءتۇسىندىردى.
«جىلىوي اۋدانىندا ورنالاسقان «تەڭىز» كەن ورنىندا بىرنەشە جىلدان بەرى كەلەشەك كەڭەيۋ جوباسى ىسكە اسىرىلىپ جاتىر. جوبا قۇرىلىسىن جۇرگىزۋگە ەلىمىزدىڭ ءار ءوڭىرىنىڭ تۇرعىندارى جۇمىسقا تارتىلعان. جوبا قۇرىلىسى اياقتالۋعا تايادى. وسىعان بايلانىستى جوباعا شەتەلدىك ينۆەستورمەن بىرلەسكەن كاسىپورىن اكتسيونەرلەرىنىڭ كەلىسىمىمەن بولىنگەن ينۆەستيتسيالىق قارجىنىڭ كولەمى ازايدى», دەدى پ.حاسانوۆ.
اتىراۋ وبلىسى
