جاڭا مەكتەپتىڭ اشىلۋ سالتاناتىنا وبلىس اكىمى ناريمان تورەعاليەۆ, ءبورلى اۋدانىنىڭ اكىمى ەركەبۇلان يحسانوۆ, كپو باس ديرەكتورىنىڭ ورىنباسارى مۇحتار مانكەەۆ, مەردىگەرلەر مەن تۇرعىندار قاتىستى.
كپو باس ديرەكتورىنىڭ ورىنباسارى مۇحتار مانكەەۆ جارسۋات اۋىلىنىڭ تۇرعىندارىن جاڭا نىساننىڭ پايدالانۋعا بەرىلۋىمەن قۇتتىقتاپ, بارلىق قاجەتتى قۇرال-جابدىقپەن قامتىلعان جاڭا مەكتەپتە وقۋشىلاردىڭ ءبىلىم الۋىنا قولايلى جاعداي جاسالعانىن جەتكىزدى. مەملەكەت باسشىسى قاسىم-جومارت توقاەۆ جولداۋدا بالالاردىڭ اۋىلدا دا, قالادا دا ساپالى ءبىلىم مەن تاربيە الۋعا تەڭ جاعداي جاساۋ قاجەتتىگىن بىرنەشە رەت اتاپ وتكەن ەدى. بۇگىنگى ءىس-شارا سونىڭ ءبىر دالەلى دەسەك بولادى.
جاڭا مەكتەپ بارلىق تالاپقا ساي سالىنىپ, بالالاردىڭ ساپالى ءبىلىم الۋىنا بارىنشا قولايلى جاعداي جاسالعان. جوبا بويىنشا مەكتەپتە 108 وقۋشى ءبىلىم الۋعا ءتيىس. نىسان وقۋ, سونداي-اق سپورت جانە ءماجىلىس زالى بار كورپۋستان تۇرادى. مەكتەپتە قاجەتتى وقۋ قۇرال-جابدىقتارى مەن كابينەتتەر, سونىڭ ىشىندە ءماجىلىس زالى, بولەك سالىنعان جۋىنۋ جانە اجەتحاناسى بار سپورت زالى, قازىرگى زامانعا ساي اسحانا مەن اكىمشىلىك بولمەلەرى ورنالاسقان. جوبا اياسىندا شاعىن جيناقتى مەكتەپ اۋماعىن اباتتاندىرۋ جۇمىستارى جۇرگىزىلىپ, شاف ورناتىلدى. سونىمەن قاتار وقۋشىلارعا ارناپ سپورت الاڭى مەن جۇگىرۋ جولى جاسالعان.
ايتا كەتەيىك, وبتك بويىنشا الەۋمەتتىك مىندەتتەمەلەر شەڭبەرىندە «كاراچاگاناك پەتروليۋم وپەرەيتينگ ب.ۆ.» كومپانياسى جىل سايىن جەرگىلىكتى بيلىك ورگاندارىمەن بىرلەسىپ, كوپتەگەن الەۋمەتتىك جانە ينفراقۇرىلىمدىق جوبالاردى جۇزەگە اسىرىپ كەلەدى.
