سۋرەت: ru.freepik.com
- شايبالى حوككەيدەن ەلىمىزدىڭ ايەلدەر قۇراماسى قىتايدىڭ باس شاھارى بەيجىڭدە وتكەن ازيا چەمپيوناتىن قولا مەدالمەن قورىتىندىلادى. شەشۋشى ويىندا بۇرىمدىلارىمىز وڭتۇستىك كورەيامەن شەبەرلىك بايقاستى. نەگىزگى ۋاقىت 4:4 ەسەبىمەن اياقتالدى. وۆەرتايمدا دا جەڭىمپاز انىقتالعان جوق. ال بۋلليت سوعۋدا جەرلەستەرىمىزدىڭ جولى بولدى.
- قۇرلىقتىق حوككەي ليگاسىنىڭ (قحل) ەڭ ۇزدىك باپكەرلەرىنىڭ رەيتينگى جاڭارتىلدى. استانانىڭ «بارىسىن» جاتتىقتىراتىن عالىم مامبەتاليەۆ 23 ماماننىڭ اراسىندا ازىرگە 18-ورىندا. كوش باسىندا – يگور نيكيتين. ءسوز ورايى كەلگەندە ءياروسلاۆلدىڭ «لوكوموتيۆ» كلۋبىنىڭ تىزگىنىن ۇستاعان 51 جاستاعى نيكيتين وسكەمەننىڭ تۋماسى ەكەنىن ايتا كەتكەن ابزال. سپورتتىق مانسابىن جەرگىلىكتى «تورپەدودا» باستاعان ول بىرەر جىل ەلىمىزدىڭ ۇلتتىق كومانداسى ساپىندا ونەر كورسەتتى.
- كانادانىڭ مونرەال قالاسىندا شورت-ترەكتەن World Tour ءتۋرنيرىنىڭ ەكىنشى كەزەڭى اياقتالدى. وكىنىشكە قاراي, بۇل جارىستا بىردە-ءبىر جەرلەسىمىز جەڭىس تۇعىرىنا كوتەرىلە المادى. ەڭ ۇزدىك ناتيجەگە دەنيس نيكيشا قول جەتكىزدى. ول ۆ توبىنداعى 500 مەترلىك سايىستا ەكىنشى ورىندى ەنشىلەدى.
- ءتورت جىل بويى UFC-دە ونەر كورسەتكەن ارالاس جەكپە-جەك شەبەرى ماريا اگاپوۆا 16 قاراشادا اقش-تىڭ اتلانتيك-سيتي قالاسىندا كاسىپقوي بوكستان ءوزىنىڭ ەكىنشى كەزدەسۋىن وتكىزەدى. ول جەرگىلىكتى بىلعارى قولعاپ شەبەرى ستەيشا ساتتلسپەن سايىسقا تۇسەدى. وسىعان دەيىن وتانداسىمىز گەرمانيانىڭ وكىلى نيكول شەفەرمەن شەبەرلىك بايقاسىپ, تەڭ تۇسكەن ەدى.
- فۋتبولدان ليگا كۋبوگىنىڭ فينالى 23 قاراشادا تۇركىستاندا وتەدى. اتالعان جارىستىڭ باس جۇلدەسىنە ەلوردالىق قوس ۇجىم – «استانا» مەن «جەڭىس» تالاسادى. كۋبوك يەگەرى 129 ميلليون تەڭگە السا, فينالدا ۇتىلعان كوماندا 89 ميلليوندى ەنشىلەيدى.
- رەسەيدىڭ ۆتب ليگاسىندا ونەر كورسەتەتىن «استانا» باسكەتبول كلۋبى ەكاتەرينبۋرگتە جەرگىلىكتى «ۋرالماشتان» 62:72 ەسەبىمەن ۇتىلدى. ءسويتىپ, ەلوردالىق كلۋب قاتارىنان 12 رەت جەڭىلىستىڭ كەرمەك ءدامىن تاتتى.
- ساۋد ارابياسىنىڭ ەر-رياد قالاسىندا ءوتىپ جاتقان WTA-نىڭ قورىتىندى تۋرنيرىندە ەلەنا رىباكينا ءساتسىز ونەر كورسەتىپ جاتىر. «كۇلگىن» توبىنداعى وتانداسىمىز تۇساۋكەسەر كەزدەسۋىندە جاسمين پاولينيگە (يتاليا) 6:7, 4:6 ەسەبىمەن ەسە جىبەرسە, كەلەسى باسەكەدە چجان تسينۆەنگە (قىتاي) جول بەردى – 6:7, 6:3, 1:6. ەندى ول سوڭعى تۋردا ارينا سوبولەنكومەن (بەلارۋس) سايىسقا تۇسەدى.
