جاڭا ديالوگ الاڭىنىڭ العاشقى جيىنى Maqsut Narikbayev ۋنيۆەرسيتەتىندە ءوتتى. ءسوز باسىندا ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ ءبىلىم سالاسى ءار كەز مەملەكەت باسشىسىنىڭ نازارىندا ەكەنىن اتاپ ءوتتى.
«پرەزيدەنتىمىز پەداگوگتەر قاۋىمىنا ايرىقشا كوڭىل بولەدى. سونىڭ ءبىر دالەلى رەسپۋبليكا كۇنى قارساڭىندا مەملەكەت باسشىسى ەكى بىردەي پەداگوگتى «قازاقستاننىڭ ەڭبەك ەرى» اتاعىمەن ماراپاتتادى. ەل تاريحىندا تۇڭعىش رەت قاتارىنان قوس ۇستاز وسىنداي جوعارى ماراپاتقا يە بولدى. سونداي-اق قاسىم-جومارت توقاەۆ پرەزيدەنت بولعان كەزىندە العاشقى قول قويعان زاڭى دا – «پەداگوگ مارتەبەسى تۋرالى» زاڭ بولعانىنا نازار اۋدارعىم كەلەدى. ايتا كەتەيىن, كوپتەگەن ەلدە مۇنداي جەكە زاڭ جوق. وسىنىڭ ءبارى – ءبىزدىڭ قوعامدا ۇستازداردىڭ مارتەبەسىن كوتەرۋدىڭ ناقتى, ايقىن مىسالى», دەدى ول.
سونداي-اق ءماجىلىس سپيكەرى وزات وقۋشىلارىمىزدىڭ بەدەلدى حالىقارالىق بايقاۋلارداعى جەتىستىكتەرىن اتاپ ءوتتى. كەيىنگى جىلدارى ەلىمىز حالىقارالىق ماتەماتيكالىق وليمپيادادا 104 ەلدىڭ ىشىندە 25-ورىننان تۇسكەن ەمەس, ال FIDE حالىقارالىق شاحمات سايىسىندا ەلىمىزدىڭ ايەلدەر قۇراماسى وتاندىق شاحمات تاريحىندا العاش رەت كۇمىس جۇلدەنى جەڭىپ الدى. مەملەكەت باسشىسى اتاپ وتكەندەي, زياتكەرلىك سايىستاردا جەڭىسكە جەتكەن وقۋشىلاردى وليمپيا ويىندارىنىڭ جەڭىمپازدارى سىندى ۇلىقتاۋ قاجەت. ياعني ينتەللەكتۋالدى ۇلت تەك تەرەڭ ءبىلىم ارقىلى عانا قالىپتاسادى.
«بۇگىندە ءبىز ەكونوميكاسى دامىعان, ادىلەتتى ءارى تابىستى مەملەكەت قۇرۋ جولىندامىز. ونىڭ نەگىزى – پروگرەسسيۆتى, ينتەللەكتۋالدى ۇلت, قۋاتتى ورتا. ءدال وسىنداي ادامداردى تاربيەلەۋ – قازىرگى مۇعالىمنىڭ باستى ميسسياسى. ەل بولاشاعى – ۇستاز قولىندا. وسى ورايدا, دەپۋتاتتىق كورپۋس پەن پارتيا ارقاشان قاستارىڭىزدان تابىلىپ, بارلىق باستامالارىڭىزدى قولداۋعا دايىن», دەدى ەرلان قوشانوۆ.
سونىمەن قاتار «Amanat» پارتياسى توراعاسىنىڭ ايتۋىنشا, كۇن تارتىبىندە ءوز شەشىمىن تاپپاي كەلە جاتقان ماسەلەلەر دە بار. ولار – ءۇش اۋىسىمدى جانە اپاتتى جاعدايداعى مەكتەپ ماسەلەسى, مۇعالىمدەردى اتتەستاتتاۋ كەزىندەگى كۇردەلى پروتسەدۋرا, سونداي-اق مەكتەپتەگى قاعازباستىلىق. بالالار مەن جاسوسپىرىمدەر اراسىنداعى تسيفرلىق تاۋەلدىلىكتىڭ ارتۋى دا ۇلكەن الاڭداۋشىلىق تۋعىزادى. وعان قارسى كۇرەستە اتا-انالار مەن ۇستازدار قاۋىمىنىڭ ءوزارا بىرلەسكەن ءىس-ارەكەتى قاجەت.
جيىن بارىسىندا وقۋ-اعارتۋ ءمينيسترى عاني بەيسەمباەۆ كەيىنگى بەس جىلدا ءبىلىم جۇيەسى تۇبەگەيلى وزگەرىسكە ۇشىراعانىن اتاپ ءوتتى.
«بۇل قادام مۇعالىمدەردىڭ ەڭبەك جاعدايىن جاقسارتۋعا, بالالارعا ساپالى ءبىلىم بەرۋ ورتاسىن قۇرۋعا باعىتتالعان. ول ءوز كەزەگىندە وقىتۋ جۇمىسىن ساپالى جۇرگىزۋگە ىقپال ەتەدى. 600 مىڭعا جۋىق پەداگوگتىڭ ەڭبەگى جوعارى باعالانىپ, ولارعا قولداۋ كورسەتۋ ماسەلەسى مەملەكەت ساياساتىنىڭ باسىم باعىتتارىنىڭ بىرىنە اينالدى», دەدى مينيستر.
كەلەلى كەڭەستە اباي اتىنداعى جامبىل گۋمانيتارلىق جوعارى كوللەدجىندەگى مۋزىكا ءپانىنىڭ وقىتۋشىسى زابيدا حۋداتاەۆا ەرەكشە قاجەتتىلىگى بار تاربيەلەنۋشىلەرمەن جۇمىس ىستەۋ كەزىندە پەداگوگتىڭ قانداي قيىندىقتارعا تاپ بولاتىنىنا نازار اۋداردى. پەداگوگ تاربيەلەگەن زاعيپ ستۋدەنت ايسۇلۋ تۋرالى وقيعا بارشا قاتىسۋشىنى تەبىرەنتتى.
«ول ماعان ءبىلىم الۋعا دەگەن ەرەكشە ىنتامەن, ەرىك-جىگەرمەن كەلدى. ءبىزدىڭ وسىناۋ ورتاق جولىمىز ءتۇرلى قيىندىققا تولى بولدى. ءبىز ءبىلىم بەرۋدىڭ جاڭا ءادىسىن ازىرلەپ, ەرەكشە ءبىلىم الۋعا دەگەن قاجەتتىلىگى بار بالالارعا ارنالعان وقۋ قۇرالدارىن دايىندادىق. مەن ءۇشىن وقۋشىمنىڭ كەدەرگىلەردى جەڭىپ, ءوز ماقساتىنا جەتكەنىن كورۋدەن ارتىق باقىت جوق», دەدى ز.حۋداتاەۆا.
بۇدان سوڭ اقتوبە قالاسىنداعى جوعارى پوليتەحنيكالىق كوللەدجدىڭ وقىتۋشىسى دارحان شاڭباەۆ جۇمىسشى ماماندارىن دايارلاۋ بويىنشا ءوز تاجىريبەسىمەن بولىسسە, الماتىدان كەلگەن قازاق ءتىلى مەن ادەبيەتى ءپانىنىڭ مۇعالىمى گۇلناز ءشامي «گادجەتسىز دەمالىس» جوباسى تۋرالى ءسوز قوزعادى. قاراعاندىداعى اباي اتىنداعى مەكتەپ-گيمنازيانىڭ ديرەكتورى جادىرا بايمولدينا بالالار مەكتەپتە العاشقى ءومىر سىناعىنان ءوتىپ جاتقانىن, سوندىقتان مەكتەپ ولاردىڭ ەكىنشى ۇيىنە اينالۋعا ءتيىس ەكەنىن اتاپ ءوتتى. ال ورال قالاسىنداعى تاريح ءپانىنىڭ مۇعالىمى الەكساندر مياسنيكوۆ بالالاردىڭ سىني ويلاۋ قابىلەتىن دامىتۋداعى پىكىرتالاس قوزعالىسىنىڭ ماڭىزىنا توقتالدى. پەتروپاۆلدان كەلگەن العاشقى اسكەري دايىندىق ء(ااد) مۇعالىمى دارحان قوسپانوۆ جاستاردى اسكەردە قىزمەت ەتۋگە دايارلاۋ جۇمىسى مەكتەپتە پاتريوتتاردى تاربيەلەۋدەن باستالادى دەگەن سەنىمدە. قىزىلوردا وبلىسى تەرەڭوزەك اۋىلىنان كەلگەن ماتەماتيكا ءپانىنىڭ مۇعالىمى زامانبەك امانبەكوۆ جاس ارىپتەستەرىن اۋىلدا جۇمىس ىستەۋگە شاقىرسا, استاناداعى بيولوگيا ءپانىنىڭ مۇعالىمى ءىلياس ساكيموۆ وليمپياداعا دايىندىق كەزىندە وقۋشىلارعا قالاي قولداۋ كورسەتۋ كەرەك ەكەنىن جەتكىزدى.
كەزدەسۋ سوڭىندا بىرقاتار پەداگوگقا كاسىبي قىزمەتىندەگى ەڭبەگى جانە قوعامدىق جۇمىسقا قوسقان ەلەۋلى ۇلەسى ءۇشىن «Amanat» پارتياسىنىڭ «ۇستاز – ۇلت ايناسى» ارنايى توسبەلگىسى تابىستالدى.
