زاۋىتتىڭ تەحنيكالىق ىسكە قوسىلۋى 2024 جىلدىڭ قىركۇيەك ايىندا ءوتىپ, العاشقى جابدىقتار پارتياسى «Hyundai Trans Kazakhstan» زاۋىتىنا «Tucson» جانە «Elantra» مودەلدەرىنە ورناتۋ ءۇشىن جەتكىزىلدى.
«زاۋىت قازاقستان مەن وڭتۇستىك كورەيا اراسىنداعى ىنتىماقتاستىققا ماڭىزدى ۇلەس قوسادى جانە ەلدەگى اۆتوموبيل سالاسىنىڭ دامۋىنا اسەر ەتەدى. جوبا ەلىمىزدىڭ ونەركاسىپتىك ءوسۋى جولىندا ەرەكشە ماڭىزعا يە. مەملەكەت ينۆەستيتسيا سالۋشى, ءوندىرىس سالۋشى كومپانيالاردى قولدايدى, سونداي-اق كاسىبي كادر دايارلاۋ مەن ەكونوميكانى دامىتۋعا ۇلەس قوسادى. نەگىزگى ماقسات – وتاندىق رەسۋرستار مەن قۇرامداس بولشەكتەردى بارىنشا پايدالانىپ, جوعارى دەڭگەيدە لوكاليزاتسياسى بار ءوندىرىس قۇرۋ», دەدى ونەركاسىپ جانە قۇرىلىس ءمينيسترى قانات شارلاپاەۆ.
«Motrex» كومپانياسىنىڭ باس ديرەكتورى كيم دجۋن سون ىنتىماقتاستىق بولاشاعىنا سەنىم ءبىلدىرىپ, زاۋىتتىڭ سالا ءۇشىن ماڭىزدىلىعىن اتاپ ءوتتى. سونىمەن قاتار وسى كۇنى «استانا موتورس» پەن «Sanico Electronics» كومپانياسى مەموراندۋمعا قول قويدى. وعان سايكەس, ءبىزدىڭ تاراپ مۋلتيمەديالىق جۇيەلەرگە ارنالعان پلاتالار مەن كورپۋستاردى SMT جانە PRESS تەحنولوگيالارىن قولدانا وتىرىپ ءوندىرۋ قۇقىعىنا يە بولادى. كەلىسىم اۆتوكومپونەنتتەر ءوندىرىسىن ودان ءارى ورىستەتۋگە, وتاندىق مامانداردىڭ بىلىكتىلىگىن ارتتىرۋعا ىقپال ەتپەك.
زاۋىت وكىلدەرىنىڭ ايتۋىنشا, ەندى ەلىمىزدە شىعارىلاتىن «Hyundai» اۆتوموبيلدەرى قازاق تىلىندەگى ينتەرفەيستى ۇسىنا وتىرىپ, جەرگىلىكتى پايدالانۋشىلاردىڭ قاجەتتىلىكتەرىنە جاقسىراق وتەي باستايدى. ال 2025 جىلى الماتىدا «Kazakhstan Mobility Engineering»-تە شىعارىلعان قازاق ينتەرفەيسى بار مۋلتيمەديالىق جۇيەلەردى پايدالاناتىن مۋلتيبرەندتىك زاۋىت ىسكە قوسىلادى. بۇل جۇيەلەر وتاندىق اۆتوكولىك جۇرگىزۋشىلەرىنە تەحنولوگيالاردى انا تىلىندە پايدالانۋعا مۇمكىندىك بەرەدى.
«Kazakhstan Mobility Engineering» زاۋىتى الماتىداعى اۋماعى 100 مىڭ شارشى مەتر بولاتىن يندۋستريالىق ايماقتا ورنالاسقان, اۆتوكومپونەنتتەر وندىرەتىن «Astana Motors Engineering» تەحنوپاركىنىڭ ءبىر بولىگى بولىپ سانالادى. وندىرىستىك كەشەننىڭ قۇرىلىسىنا 15,5 ملرد تەڭگە ينۆەستيتسيا قۇيىلدى. قۇرىلىس اياقتالعان سوڭ تەحنوپارك اۋماعىندا تاعى ەكى كاسىپورىن اشىلادى, ولار – اۆتوموبيل ورىندىقتارىن وندىرەتىن زاۋىت جانە اۆتوموبيلگە, سونداي-اق لوگيستيكالىق حابقا ارنالعان پلاستيكا, رەزەڭكە بۇيىمدار وندىرەتىن زاۋىت. اۆتوموبيل ورىندىقتارىن جاسايتىن زاۋىتتى ىسكە قوسۋ بيىل ءتورتىنشى توقسانعا جوسپارلانعان. تەحنوپاركتىڭ وندىرىستىك قۋاتتىلىعى جىلىنا 100 مىڭ جيناق بولادى دەپ كۇتىلەدى. كلاستەر تەرريتورياسىندا 90-نان اسا مامان ەڭبەك ەتەدى, ال وندىرىستىك كەشەننىڭ قىزمەتكەرلەر شتاتى 400 ادامعا ەسەپتەلگەن. ىسكە قوسىلعاننان كەيىن تەحنوپارك ونىمدەرى «Hyundai Trans Kazakhstan» جانە ەلىمىزدىڭ باسقا دا اۆتوموبيل زاۋىتتارىنا جەتكىزىلەدى.
