AIGA چەمپيوندار ليگاسى – ءبىزدىڭ ەلدە نەگىزى قالانىپ, الەمدە كەڭىنەن تانىمال بولعان بىرەگەي حالىقارالىق تۋرنير. ءۇشىنشى ماۋسىمنىڭ جۇلدە قورى سپورتتىڭ بۇل تۇرىندە بۇرىن-سوڭدى بولماعان 1 000 000 اقش دوللارىن قۇراپ وتىر. ونىڭ فورماتى كورەرمەندەرگە بارىنشا قىزىقتى ءارى اسەرلى بولاتىنىنا ەش كۇمانىمىز جوق. كوماندالار جەتى سالماق دارەجەسىندە «جەكەلەي قارسىلاسپەن يىق تىرەسىپ سايىسۋ» قاعيداسىنا ساي ايقاسادى. العاشقى ەكى جارىس تۇركيا مەن برازيليادا ۇيىمداستىرىلدى. ول كەزدە فينالدىق كەزەڭگە انگليانىڭ «Euro Trash», برازيليانىڭ «Kasai» كوماندالارى ءوتتى.
اقش-تاعى تۋرنيردە التى كوماندا ەكى توپقا ءبولىنىپ, ءبىر-بىرىمەن كۇش سىناستى. قىزىقتى ءارى تارتىستى بەلدەسۋلەردىڭ ناتيجەسىندە «CheckMat», «10th Planet» كوماندالارى فينالعا شىقتى. قوس مىقتىنىڭ ءوزارا تارتىسى «CheckMat» كلۋبىنىڭ پايداسىنا شەشىلدى. دەگەنمەن «10th Planet» ۇجىمى دا فەدەراتسيادان «wild card» الىپ, كەلەسى كەزەڭگە ءوتتى. ءسوز ورايى كەلگەندە, AIGA چەمپيوندار ليگاسى گرەپپلينگ الەمىندەگى مارتەبەسى اسا جوعارى ءارى ەڭ بەدەلدى جارىس ەكەنىن اتاپ وتكەن ءجون. بۇل باسەكەلەردىڭ تىكەلەي رەپورتاجى الەمدەگى جەتەكشى ستريمينگتىك-سەرۆيس – «Flograpplingتە» كورسەتىلەدى.
ەندى AIGA چەمپيوندار ليگاسىنىڭ ءتورتىنشى ىرىكتەۋ كەزەڭى كەلەسى ايدا استانادا ۇيىمداستىرىلادى. سول كەزدە جەر-جاھاننىڭ باسقا دا ازۋلى كوماندالارى فينالدىق كەزەڭنىڭ سوڭعى جولدامالارىن ساراپقا سالادى.
