تالاپ قويۋشى دارىگەردىڭ ءتىستى ساپاسىز ەمدەۋىنە بايلانىستى قايتادان سول ەمحاناعا جۇگىنگەن. ەم-شارادان كەيىن ءتىسى قايتا اۋىرعاندىقتان, سول ستوماتولوگقا تاعى بارعان. الايدا دارىگەر ءتىسىن قاراماي, تەك ىسىنگەن جاعدايدا عانا كەلۋىن ايتىپ, ەمدەلۋشىنى قابىلداماعان.
ءتىسى ءىسىپ كەتكەننەن كەيىن تالاپ قويۋشى تاعى دا سول دارىگەرگە بارۋعا ءماجبۇر بولدى. بۇل جولى دارىگەر وعان وبلىستىق اۋرۋحاناعا جولداما بەرىپ جىبەرگەن. اۋرۋحانادا تالاپ قويۋشىعا بەتتىڭ ىرىڭدەۋى سالدارىنان وتا جاسالىپ, ۇزاق ۋاقىت بويى ەم العان.
«سوت تالقىلاۋى بارىسىندا تاراپتار ءىستى مەدياتسيا تارتىبىمەن رەتتەۋ تۋرالى كەلىسىمگە كەلدى. كەلىسىم بويىنشا, جاۋاپكەر جشس تالاپ قويۋشىعا 100 مىڭ تەڭگە كولەمىندە مورالدىق زيان وتەماقىسىن جانە ءدارى-دارمەككە كەتكەن شىعىنداردى وتەۋگە مىندەتتەندى. تالاپ قويۋشى ءوز تالابىنان باس تارتتى. سوت اتالعان مەدياتسيالىق كەلىسىمدى بەكىتتى, جانە بۇل سوت اكتىسى زاڭدى كۇشىنە ەندى», دەلىنگەن حابارلامادا.
