سۋرەت: olympic.kz
«بيىلعى ماۋسىمداعى دايارلىق جۇمىستارىن جاڭا فورماتتا وتكىزىپ جاتىرمىز, – دەدى قازاقستان ۇلتتىق قۇراماسىنىڭ باس باپكەرى الەكساندر پانفيلوۆ. – الدىمەن بۇكىل كوماندا مۇشەلەرىنىڭ باسىن قوسىپ, وقۋ-جاتتىعۋ جيىنىنا قاتىستىق. سونىمەن قوسا, شاكىرتتەرىمىزدى ءتورت توپقا ءبولىپ, بارلىعىنىڭ جەكە دايىندىق باعدارلاماسىن جاسادىق. ماسەلەن, الداعى جاۋاپتى جارىستاردا ايەلدەردىڭ 500, 1000 مەترلىك سپرينتىندە الينا داۋرانوۆا, ينەسسا شۋمەكوۆا, كريستينا سيلاەۆا, مارگاريتا گاليەۆا, داريا گاۆريلوۆا ونەر كورسەتەدى. ولار – الەم كۋبوكتارى مەن جاستاردىڭ الەم بىرىنشىلىكتەرىندە جەڭىس تۇعىرىنا كوتەرىلگەن تانىمال سپورتشىلار. قىسقا قاشىقتاردا سايىسقا تۇسەتىن سۇلۋلارعا قۇرامانىڭ كەڭەسشى-باپكەرى سەرگەي كلەۆچەنيا جاۋاپتى».
سەرگەي كلەۆچەنيا – 53 جاستاعى رەسەيلىك مامان, كەزىندە بەلدى كونكيشىلەردىڭ ءبىرى بولدى. 1994 جىلعى ليللەحاممەر وليمپياداسىنىڭ كۇمىس, قولا جۇلدەگەرى, الەم چەمپيوناتىنىڭ تولىق جۇلدە جيىنتىعىنىڭ يەگەرى, سپرينتتىك كوپسايىستان ەكى دۇركىن الەم چەمپيونى. سەرگەي وليمپيا ويىندارىنا ءتورت رەت قاتىسىپ, رەسەي رەكوردىن 12 مارتە جاڭارتتى. كەيىننەن ءوز ەلىنىڭ باس كومانداسىنىڭ اعا باپكەرى بولدى. 2012 جىلدان بەرى قازاقستان قۇراماسىن جاتتىقتىرادى.
ەرلەر اراسىنداعى سپرينتشىلەر جارىسىندا ەۆگەني كوشكين, التاي جاردەمبەك ۇلى, ارتۋر گاليەۆ, نيكيتا ۆاجەنين, رومان بينازاروۆ, اندرەي سەمەنوۆقا سەنىم ارتىلىپ وتىر. ولار دا رەسەي مامانىنىڭ باقىلاۋىندا. 36 جاستاعى الەكسەي ەسين 2010 جىلى ۆانكۋۆەر, 2014 جىلى سوچي وليمپيادالارىندا باق سىناپ, الەم چەمپيوناتى مەن دۇنيەجۇزىلىك ۋنيۆەرسيادادا قولا مەدال يەلەندى.
«پولشادان كەلگەن مايتالمان پاۆەل ابراتكەۆيچ ورتا, الىس قاشىقتىقتا سىنعا تۇسەتىن سپورتشىلاردى دايارلايدى. بۇل كوماندا ساپىندا نادەجدا موروزوۆا, ەليزاۆەتا گولۋبەۆا, باقداۋلەت ساعاتوۆ, ۆيتالي ششيگولەۆ, اقجول ءنۇرالى, اندرەي زۋەۆ, اسقار ابدۋمالىك, ميحايل گلۋششەنكو, دەميان گاۆريلوۆ بار. ال جاستار قۇراماسىنا جەرگىلىكتى باپكەر الەكساندر جيگين جاۋاپتى», دەدى الەكساندر پانفيلوۆ.
جۋىردا ماسكەۋ وبلىسىنداعى كولومنا قالاسىندا وقۋ-جاتتىعۋ جيىنىن وتكىزىپ قايتقان جەرلەستەرىمىز كوپ كەشىكپەي گەرمانياعا ساپار شەكتى. نەمىس جەرىندەگى 20 كۇندىك دايارلىق بارىسىندا ولار ەكى بىردەي الەم كۋبوگىنىڭ كەزەڭدىك سايىستارىندا باق سىناۋدى جوسپارلاپ وتىر. ودان كەيىن جاپونيانىڭ حاتينوحە مەن ناگانو قالالارىندا, قىتاي استاناسى بەيجىڭدە حالىقارالىق تۋرنيرلەردىڭ تۇساۋى كەسىلەدى. بۇل باسەكەلەرگە ەل قۇراماسى دا قاتىسادى. ال ازيا ويىندارىندا باق سىنايتىن سپورتشىلار 18–20 جەلتوقسان ارالىعىندا جالاۋى جەلبىرەيتىن ەل چەمپيوناتىندا انىقتالادى.
