- 15-18 قاراشا ارالىعىندا اقتوبەدە دزيۋدودان ەرلەر مەن ايەلدەر اراسىندا قازاقستان چەمپيوناتى وتەدى. بۇل جارىستا رەسپۋبليكامىزدىڭ بارلىق ايماعىنان كەلگەن 500-گە تارتا بالۋان باق سىنايدى دەپ كۇتىلىپ وتىر. سوڭعى كۇنى ارالاس كوماندالىق سايىستار ۇيىمداستىرىلادى. جەڭىمپازعا قازاقستان كۋبوگى تابىس ەتىلەدى.
- وڭتۇستىك كورەيانىڭ كۆانجدۋ قالاسىندا اياقتالعان تەننيسشىلەردىڭ ITF J300 تۋرنيرىندە كورت قوجايىنى حويونگ روحپەن جۇپ قۇرعان ءامىر ومارحانوۆ باس جۇلدەنى ولجالادى. فينالدا ولار جەرگىلىكتى ويىنشىلار – يەنس دجەيونگ پەن دجانگجۋن كيمدى 6:2, 6:2 ەسەبىمەن قاپى قالدىردى. ال جەكەلگەن سايىستا ءامىر ءۇشىنشى كەزەڭگە دەيىن جەتىپ, جاپونيالىق حيروماسا كوياماعاعا جول بەردى – 6:3, 4:6, 4:6. ءدال سول تۋرنيردە زاڭعار نۇرلان ۇلى فينالدا ونەر كورسەتىپ, شەشۋشى تۇستا حويونگ روحقا ەسە جىبەردى – 4:6, 2:6. قىزداردىڭ جۇپتىق ويىنىندا ماليكا امىرعاليەۆا مەن تايپەيلىك يۋ چەن لين باس جۇلدە ءۇشىن تارتىستا جەڭىلىس تاپتى.
- يتاليالىق روبەرتو مانچيني ساۋد ارابياسىنان كەتكەننەن كەيىن جالاقىسى ەڭ كوپ جاتتىقتىرۋشىلاردىڭ ءتىزىمىن حوسەپ گۆارديولا باستادى. «مانچەستەر سيتي» فۋتبول كلۋبىنىڭ باس باپكەرىنىڭ ءبىر جىلدىق تابىسى – 20 ميلليون فۋنت-ستەرلينگ. ال مانچيني اتالعان مەملەكەتتە ءوز ارىپتەسىنەن 1,5 ميلليون ارتىق تابىس تاپقان ەدى. ەكىنشى, ءۇشىنشى ورىنداردا – ميكەل ارتەتا («ارسەنال») مەن ديەگو سيمەونە (اتلەتيكو). ولاردىڭ ەڭبەكاقىلارى تيىسىنشە 15, 13 ميلليون شاماسىندا.
- فۋتبولدان قازاقستان پرەمەر-ليگاسىنىڭ 24 تۋر ويىندارى مىناداي ەسەپتەرمەن اياقتالدى: «جەتىسۋ» – «قايرات» 1:2, «اتىراۋ» – «ەلىماي» 1:0, «ورداباسى» – «جەڭىس» 1:2, «شاحتەر» – «قىزىلجار» 1:1 , «استانا» – «اقتوبە» 2:0, «تۇران» – «قايسار» 0:1.
- بيىلعى ماۋسىمدا جەڭىلىستەن ءبىر باس كوتەرمەي, جانكۇيەرلەردى ابدەن مەزى ەتكەن «استانا» باسكەتبول كلۋبىنىڭ باس باپكەرى فوتيوس تاكيانوس قىزمەتىنەن كەتتى. گرەكيالىق مامان ەلوردالىق كوماندانى بيىلعى اقپان ايىنان بەرى جاتتىقتىرىپ كەلدى. ازىرگە بۇل مىندەتتى ۋاقىتشا ونىڭ كومەكشىسى گلەب پلوتنيكوۆ اتقارادى.
- قازاقستان ۆولەيبول فەدەراتسياسىنىڭ پرەزيدەنتى بولىپ قارجى ءمينيسترى ءمادي تاكيەۆ سايلاندى. استانادا وتكەن جيىندا وعان 43 دەلەگات داۋىس بەردى. سونداي-اق ۇمىتكەرلەر قاتارىندا الماتى وبلىستىق فەدەراتسياسىنىڭ پرەزيدەنتى اماندىق باتالوۆ پەن بەلگىلى ۆولەيبولشى باقىتجان بايتورەەۆ بولدى. ولاردىڭ ارقايسىسى بەس-بەس داۋىستان جيدى. ال بۇعان دەيىن وسى قىزمەتتى 32 جىل بويى تاپجىلماي نۇرتاي ابىقاەۆ اتقارعان ەدى.
