جۇرەك پىشىندەس كول ال-كۋدرا ءوازيسىنىڭ ماڭىندا ورنالاسقان. اۋماعى 550 000 شارشى مەتر. كول ءتىپتى عارىشتان دا كورىنەدى. وندا ءجۇز مىڭداعان بۇتا, 16 مىڭنان استام اعاش پەن ءتۇرلى ءتۇستى گۇلدەر ەگىلگەن. ماحاببات كولى 2018 جىلى قاراشا ايىندا اشىلعان. الايدا مۇراگەر حانزادا شەيح حامدان يبن مۇحاممەد ءال ماقتۇم Instagram پاراقشاسىنا كولدىڭ اۋەدەن تۇسىرىلگەن سۋرەتىن سالعاننان كەيىن عانا بۇل ورىن كوپشىلىكتىڭ نازارىن اۋدارا باستادى.
سۋ اعاشى
چەرنوگوريانىڭ دينوشا اۋلىندا ەرەكشە اعاش بار. جەرگىلىكتى تۇرعىندار ونى «چەرنوگوريانىڭ سۋ اعاشى» دەپ اتاپ كەتكەن.
بۇل اعاش جاڭبىرلى ماۋسىمدا سۋبۇرقاققا اينالادى. ويتكەنى ول جەراستى بۇلاقتارىنىڭ ۇستىندە ءوسىپ تۇر. نوسەردەن كەيىن بۇلاقتار تولىپ, سۋ جەر بەتىنە شىعادى. اعاشتىڭ ءىشى قۋىس بولعاندىقتان, سۋ ونىڭ دىڭىمەن قۇبىر سەكىلدى ءوتىپ, جارىقتاردان سۋبۇرقاق بولىپ اتقىلايدى. سوندىقتان جاڭبىرلى كۇندەرى جەرگىلىكتى تۇرعىندار مەن تۋريستەر وسى ەرەكشە تابيعي قۇبىلىستى تاماشالاۋعا ءجيى كەلەدى.
ەڭ قىسقا رەيس
الەمدەگى ەڭ قىسقا رەيس نەبارى بىرنەشە مينۋتقا سوزىلادى.
شوتلانديانىڭ ۋەسترەي مەن پاپا-ۋەسترەي ارالدارى اراسىندا قاتىنايتىن ۇشاق جولاۋشىلاردى دىتتەگەن جەرىنە بەس مينۋتقا جەتەر-جەتپەس ۋاقىتتا جەتكىزىپ تاستايدى. ادەتتە, رەيس ۇزاقتىعى جەلگە بايلانىستى 58 سەكۋندتان 3 مينۋتقا دەيىن سوزىلادى. ەكى ارالىقتاعى قاشىقتىق 2,7 شاقىرىم. جۇمىس كۇندەرى رەيس ەكى باعىتتا دا قاتىنايدى. ال سەنبى كۇنى ۇشاق ۋەسترەيدەن پاپا-ۋەسترەي باعىتىندا ۇشسا, كەرى قاراي جەكسەنبى كۇنى ۇشادى. بۇل رەيستى نەگىزىنەن جەرگىلىكتى تۇرعىندار, اسىرەسە ۋەسترەيدەن كەلەتىن ستۋدەنتتەر مەن مۇعالىمدەر پايدالانادى. كەيدە دارىگەرلەر مەن ەمدەلۋشىلەر دە وسى رەيسپەن قاتىنايدى. ويتكەنى پاپا-ۋەسترەيدە مەديتسينالىق مەكەمەلەر جوق. ۇشاقتى ءبىر ۇشقىش باسقارادى, جولاۋشىلار سالونىندا سەگىز ورىن بار, ال ءبىر ورىن ۇشقىشتىڭ جانىندا ورنالاسقان.
